السبت، مارس 19، 2005

Eleventh : ! بو دميعة


كالعادة .. الكلمات الياية امغبرة و ماهي بَتي .. بس انشالله تفهمونها لأني مادري شلون كتبتها ذيج الحزة :))

هلا بالطش و الرش و البيض المنقش (المفقش في رواية أخرى) و ماي الورد المحطوط بغرش (جمع قرشة) .. ولهنا عليكم يا جماعة الخير ( لاتصدقون عاد ) و لكم وحشة و فريَة على قولتهم ( أخاف صج ) و قعدتكم ما تنمل كلش ملش ( صاروخ ) هيهيهي .. همممممم .... اليوم بهالحلقة الهدعش او الحادية عشر مادري الهادية عشرة ( اتحداكم تقولونها ست مرات بسرعة ) ودي أسولف لكم عن موضوع مهم للغاية و Very Very important ya3ne 2 X V I P ...
مابي أكون امبالغ و مزودها حبتين بس ترى صج اللي بقوله ..... منو منكم يا جماعة الخير ما يزعل ؟ منو منكم ما تدمع عيونه ؟ هممم .. مابي أقرق وايد لأن ريجي بينشف بعد شوي من الهذرة .. خلكم معانا

1) أكو مترادفات مرتبطه ابعضها بلغتنا الفصحى و حتى باللهجة العامية للكويت خصوصا و الخليج العربي عموما و العرب بشكل أعم .. و من اكثر المترادفات ( ادري ان نصكم مو عارفين شنو يعني مترادفات و متنحين جبال الشاشة أظن و اذا ماني غلطان انها كلمات تتشابه بمعانيها بس تختلف بلفظها و كتابتها) .. و المثال اللي بنتكلم عنه اليوم اهو التالي :
الهم .. الغم .. الزعل .. النكد .. التكدر .. الضيجة .. الغلقة .. الحزن .. مد البوز ( متعارف دوليا ان مدة البوز حدها شبرين و تطول هذه المسالفه في أفريقيا و ربما بعض قطع كيفان على حسب حجم البرطم و قدرته على التمدد ) و الكلمات اللي سردتها عليكم قبل شوي مفهووومه و ما له داعي لشرحها طبعا .. عدل و لا أنا غلطان ؟

2) شنهي الكائنات اللي تزعل ؟ .. أظن و بناء على دراستي العميقة طوال سنوات عمري المديدة ( نصكم ما يدري اني بالعشرينات لما الحين ) اكتشفت و بالرجوع لبرنامج عالم الحيوان و متابعة قناة ديسكفري ان كل من له قلب فهو قابل للشعور بالكلمات اللي سبق ذكرها في النقطة الاولى من مقالتنا .. يعني الانسان يزعل .. و الحيوان كرمكم الله كذلك يحس بالهم و الغم و يشمل ذلك الطيور ( المطيرجية و اللي يتهاوشون بدياجة يحترمون نفسهم رجاء ) و جان اكو احد عنده كائنات اخرى تحس يطرشلي ايميل .

3) اليوم طبعا نبي نتحجى عن البشر بس .. مو فاضين حق البهايم (عزكم الله) لان الاقربون اولى بالمعروف و ما اتصور ان فيكم احد عنده صلة قرابة بأي خروف او غيره من ذوات الاربع ! و العيادة البيطرية لها اكثر من فرع .. طعمت قطوتي مرة بحولي و نوبة ثانيه سوولها عملية قيصرية فاشلة بالشويخ .. اقولكم سالفتها بعدين .

4) شنهي أسباب الحزن ؟ شنهو اللي يخليك يا فلان ماد بوزك شبرين ؟ شنهو اللي يزعلج يا فلانه ؟ الاجابة الاولى عندكم انتوا لانكم انتوا الادرى بأنفسكم .. الاجابة الثانية نلقاها عند اللي حولنا من أهل و ربع و زملاء دراسة و عمل .. اما الاجابة الثالثة فهي مشتركة بيننا جميييييييعا .. شلون يعني ؟ الشرح بالنقطه التالية .

5) أسباب الزعل اللي نلقاها عندك بسيطه لانها داخلك و انت ادرى فيها فما له داعي نطرحها لانكم بنفسكم راح تتجنبونها و ما اعتقد ان اكو صاحي يزعل روحه او يتنطز على نفسه مثلا !! همممم .. النوع الثاني من أسباب مدة البوز و اللي قلنا انها معروفة عند ريلج او عند خطيبتك او عند امهاتنا او مدرسينا او ربعنا او ربعاتنا ( على قولة فلان ) وهذي الأسباب تنعرف مع الوقت .. يعني مع العشرة و الاحتكاك راح ادري ان نصور يتضايق من علوقته ( بو يبههة ) وغنيمة ماتحب طاري الريجيم و بليييز لازم تخففين .. و مشاري مايشتهي الصراخ و بدرية ماتحب احد يدق عليها الظهر و بليل لانها حزة نومتها (نامت عليج العافية) و هلمة جرة (حلوة مني هالكلمه معنه السبيلنج غلط) .. اما الاسباب الاخيرة و اللي قلنا انها مشتركة بين جميع الناس فهي كللللللل ما يضايق الانسان الطبيعي و كلللللللل ما يزعل الكائن البشري السوي .. الشخص الصاحي يزعل من السب او الزف العلني او مدة الايد .. الانسانة الطبيعية ماتحب الخيانة ولا تشتهي احد يجذب عليها ولا ترضى بانه احد يوعدها و يخلف .. الناس السيدة ما يحبون الوصاخه و القلاقة و الريحة المعفنة .. مو شي ييديد ادري .

6) أنواع الزعل .. أو بالأصح أمثلة على هالانواع لان انواع ضيجة الصدر كثيرة .. منها ضيجة طويلة الامد (حليب) أو زعل مؤقت .. هني كان مقياسنا الفترة .. و في مقياس آخر لانواع الحزن .. هم و غم بسبب صحي .. هم و حزن بسبب تصرف الآخرين تجاهنا .. هم و زعل بسبب شعورنا تجاه آخرين نعزهم و صارلهم شي سيء ( الله يكافينا الشر) .. انا مادري شقلت بس طاف محد شاف

7) اخواني و خواتي .. لازم نتذكر انه كل شي ايي من الله حياه الله .. و الآية تقول ( قل لن يصيبنا الا ما كتب الله لنا ) و القضاء و القدر شي لااازم نؤمن فيه و نصدق انه من رب العالمين و ترى الخيرة فيما اختاره الله سبحانه .. صح الساني ؟

8) معروف ان الصبر واجب بدينا الاسلامي .. و مثل ما قالوا ترى الصبر مفتاح الفرج .. و كل ما تصبر على مصيبتك الله ياجرك .. و كل ما تتحملين البلاوي اللي تحوشج الله يزيد من ثوابج .. و كل ما نتصبر على المصاعب يثقل الله موازين حسناتنا .. قولوا آآميييييييين ... قولوا يعلكم العافيه .

9) شصير بالانسان لما يزعل ؟ .. اكو واحد ممكن يبجي من ادنات الدون .. و اكو وحده يمكن لو تصير فيها بلاوي الدنيا و مافيها ما ترمش عويناتها ( يمكن ليش تارستها مسكره ) .. بس هل هذا صح ؟ ترى الانسان بطبعة حساس و عادي انه يزعل مره و يضحك مرة ثانيه .. انما هني المقياس يكون نفسية البشر و هل اهي تتحمل او لا .. على قولة ذاك الدايخ : انا انسان حساس و الفاس طاح بالراس !!

10) البجي مو عيب .. و الدموع نعمه من الله لانها اول شي تغسل العين و ثانيا تفرغ اللي بالقلب و تنفس عن الانسان .. ترى الكبت (مو اللي يحطون فيه هدوم) يولد الانفجار و يخلي الواحد يسوي اشياء عكسية و للكبت ردود فعل ماهي زينه .. فرغ اللي بقلبك و طلع اللي قامته من ضيجة و هم و ابجييييييي شنو المشكله ؟ ما قلنا قلبوا الدنيا مناحة و مجعوا كشيشكم بالشوارع و طقوا روسكم بالطوف !! بس اكو ناس تبجي من قرآن و ناس تبجي من عوار ضرس و ناس تبجي من الخرعه و ناس تبجي من الاحساس بانها انظلمت .. و ناس تبجي من الوله و الشوق .. اييييييييه كلمن في قلبه شقى اللي له .

11) يبنا طاري التنفيس و تفريغ مافي القلب .. شلووون ؟ .. اكو ناس يكلمون روحهم بالسياره جنها حاطه سماعه او يتحجى بالتليفون و يمكن يزف و يصارخ و بعدها يرتااااااح ... اكو ناس يقعدون على اليال و يجابلون البحر و يسرحون و يروح بالهم بعيييييييد .. اكو ناس ( و هذي احسن طريقة برايي الشخصي ) يقولون اللي عندهم حق شخص ثاني .. لازم يكون ثقة و أمين لسببين .. الاول عشان لايفضح و يكون بخور السوق .. و الثاني عشان ينصح نصايح عدلة و زينه مو اي كلام يا عبدالسلام و اي حكي يا بو زكي !! و ترى التفريغ حق شخص ثاني ممكن يكون بالمسنجر و الجاتينج .. ممكن يكون بالتليفون و ممكن يكون ويه بويه و على الهواء مباشرة .

12) فرغي اللي بقلبج حق رفيجتج بدون ذكر أسامي و تفاصيل دقيقة .. قول اللي مضايقك حق أخوك بدون مجامله عشان يقدر ظرفك .. احلى شي لما تفرغ و انت مع امك او أبوك .. عشان اللمة تكون صج بوقتها aweele 3ala el Huuuuuug

13) أكو ناس ناس و ناس مداس (كرمكم الله) .. فمو اي واحد نشكيله و نتحلطم جدامه .. اكو مصبنه مصلحجيه تلقاهم بالنت يعيشون البنيه الدووور و يصير طبيب نفسي و يشتغل تنظير (من نظريات) و تفلسف عشان تهد خطيبها اللي لك عليه مثلا او تطلق ريلها اللي مأذيها و تالي اهو يستلمها لما اييب راسها على قولتهم !! هالنوعية سفلة (سوري على الكلمه ) و اهي غبيه كمخه هبله .. لا تنرفزوني عاد !

14) كل شي زاد عن حده انقلب ضده .. لا نخلي من الحبه قبة ! ترى اكو مشاكل صغيرة الواحد يكبرها و يخليها جنها الحرب العالميه العاشرة .. ناقشوا كلشي بحجمه الطبيعي .. النجرة لا نسميها هوشة .. و النشلة لا نسميها سرطان الله يكافينا الشر .. و فراق واحد و وحده كانوا يتحجون بالنت لا نخليها جنها طلاق بعد 10 سنين زواج .. تيك ات ايزي يا عزيزي

15) ذكر الله زين .. لما تتنرفز قول لا اله الا الله .. لما تعصبين لا تمجعين شعرج و قومي تيددي و صليلج ركعتين .. بالسياره لما تحس انك بتبجي لا تسمع حبايبنا و شالدنيا بلاكم !! اسمع قرآن و ترى لاحقين على الاف ام ..

16) اكو ناس عندهم سولة مو حلوة .. لما تزعل الوحده تقرض اظافرها! او لما يتضايق ينتف شواربه .. عسى ماشر يبه ؟!؟

17) يقولون الصراخ بصوت عالي يريح .. انا جربتها بس بأكسفورد سيتي مو بسوق شرق ! و كانت ناجحة .. كنت منقمت (مقموت في رواية ثانية) حدي و مغلق من هالمنطقة المملة .. بس صج كانت حلوة و مناظرها الطبيعية زوينه .. وقفت عند النهر و بين الشير و قاريي يمي (القاري اهو الدراجة الهوائية) جان اصرخ بصوت عالييييييييييي !! (سكنهم مساكنهم) و سمعت الصدى (الصدى بالانجليزي طبعا) بس المشكلة اني بعدين فطنت حق واحد متشرقد و قاط صنارته ذاك الصوب .. حصل خير

18) لا نخلي الحزن يغلبنا .. الواحد يا جماعه الله معطيه روح و مخ .. خل روحك قوية و شغل مخك .. كل شي له حل .. كل ازمه اذا فكرنا شوي راح نلقى لها مخرج .. و اللي ما ينحل نغيره .. استغرب من بعض اللي يتحلطمون على اوضاع ميؤووووس منها .. يا اخي دفعه مردي و الهوى شرجي ! شلك بالمناحة و عوار الراس ؟ و الله يعوض .. بس هم اقروا النقطة اليايه

19) الامل موجود .. و اليأس كلمة ما يقولها الا ضعاف النفوس .. مادري شقلت بس حصل خير

20) اذا تذكرت ماضيك اللي انت ولهان عليه او حسيت بقمته بسبة حالتك اللي انت فيها .. لهي نفسك بشي ثاني .. اقعد مع ناس و لا تصير بروحك .. سولف .. دق تليفون على أحد تعرف انه هذرة .. دير بالك تقعد بروحك مع همومك ترى تغلبك غالبا ..

انا سولفت وايد اليوم (كالعادة) و ادري ادري اني ماعطيت الموضوع حقه للأسف !! لاني مرتبط بعد شوي و مو خوش وقت اللي قاعد اكتب فيه هالمقالة بس العوض و لا القطيعة يا جماعة .. اعتذر عن اي تقصير و استقبل منك كل ملاحظاتكم .. اخاف نجيب محفوظ بس

هناك 20 تعليقًا:

Ra-1 يقول...

منو أم دميعة؟
;p

وقفت عند النهر و بين الشير و قاريي يمي (القاري اهو الدراجة الهوائية) جان اصرخ بصوت عالييييييييييي !! (سكنهم مساكنهم) و سمعت الصدى (الصدى بالانجليزي طبعا) بس المشكلة اني بعدين فطنت حق واحد متشرقد و قاط صنارته ذاك الصوب .. حصل خير
LOoOoooooL

Eb9ara7a and his Wife يقول...

LOL
شدراني منهي ام دميعة ! تلفتي مني مناك و راح تلقينها :PpP
tara bacher enshallah ba7awel elbeezat .. Cause still WeekEnd welBanks 9akeen ;)

AnGeL يقول...

hi,
to be honest..... i didn't read the whole thing, it was 6weeeeel 7ada
bs lefat na`6ary il isloob il 5a6eer oo ily yshid ( i went back to all ur posts ;) they were amazing

ray يقول...

nice

والله جان زين الواحد يقدر يبجي

مو حضرتي ... مخترعة حدي اليوم و اللفت طاح فيني طابقين ... البنات يبجون و أنا أضحك

heh

ماكو ولا ريآكشن صح

Eb9ara7a and his Wife يقول...

Angel
شكراً شكراً .. لا داعي لا داعي :P
نصيحة .. اللي بالقلب خل يصير على للسان .. حزتها بيكون الكلام له أثر لأنه بيدش بأذون السامع لين يوصل قلبه .. و نظرية بو قليب تقول التالي .. قلب ثم لسان ثم أذن ثم قلب :))

Eb9ara7a and his Wife يقول...

Ray
ترى كل انسان و طبيعته .. و انا عطيت مثال عن الريال اللي يبجي على أدنات الدون في مقابل البنية اللي صعب تتأثر .. الناس أجناس :)
قبل جم سنه كنت مع واحد من الربع بمسيد .. و عقب الصلاة تكلم المطوع يزاه الله خير عن الخشوع و تأثر المؤمن بالقرآن الكريم .. جان يقول رفيجي : تصدق يا بو فلان اني ما قط بجيت بصلاة الجيام ايام رمضان ؟ بس مره تغصبت و تعصرت جان تدمع اليمنه بروحها :)))
و على قولة القايل : شر البلية ما يضحك

غسان يقول...

بصراحة شينقالك؟ بو منو؟

بيزات؟ ..... لا لا لا ماقدر انت حدك قديم.... باخذ كورس لهجة كويتية قديمة عِندك خبرك اللهجة الحين مادري شلون صايره.





قسان على قوله اهل شرق;)

Eb9ara7a and his Wife يقول...

اي و الله صدقت .. الحين ربعنا حجيهم قرقيعان .. ناس بدليات و ناس نص انجليزي و نص عربي ! و اعترف اني من النوع الثاني :)) و الوهقة اني قمت اخلط التركي معاهم
و ازيدك من الشعر بيت .. الاسبوع الياي ببدي دراستي العبرية ! لغة اليهود :s

Eb9ara7a and his Wife يقول...

What ?! :s
أول مرة أسمع هالكلمة -مقرش- هممم .. اكو بيض منقش و مرنقش و مفقش :)
عموماً .. الله يخليلج اميمتج الغالية

Eva يقول...

hi
ana awwal mara adsh your page
actually , kint bchaik 3ala sh'3La eb some blog oo agom mn elnet
bas 9arly foog elsa3a a7os eb your blog
it's funny.. oo it's true;p

ooo ALLAH ya36eek el3afyaaa :D i realy liked ur blog

Eva يقول...

-9- خففوا شوي من الهرنات و هم الليت العالي ماله داعي نحرق عوينات العالم !! و اللي عنده جيب او يوكن او جمس بليييييز عند الاشارة خليطفي الليت ترى يذبح الكشاف لما يعكس بالجام

__

طبعا هذا من موضوع ثاني قدييم هم قاعدة أقراه ألحيين
قعدت أضحك و اقوول يا الفشلة
انا قعدت سنة اسوق الجيب بعدين استوعبت انه في ليت قوي و ليت عادي
طبعا طوول هالسنة اشوف الناس يأشرولي بأييدهم بس مادري شفيني كنت مقفلة ما كنت أدري أنه قصدهم عن الليت حييل قوي:p

Eb9ara7a and his Wife يقول...

Eva :)
اول شي .. حياج الله بموقعي .. ماني قايل المتواضع لانه كلمن يقولها تفلسف :PpP
عاد هالمقالات كلها من عتيج الصوف ! يعني امغبره و ماهي من اللي تنكتب و تنحط بَتي أول بَول
مشكورة مرة ثانية على تشجيعج لي :)
و ماعليج أمر شوي شوي على العالم و انتي شابة العالي :P

Eb9ara7a and his Wife يقول...

Mydream
Everyday Come :P

Ra-1 يقول...

mashaAllah 15 comments :p
yalla put NEW POST!

Eb9ara7a and his Wife يقول...

Ra.1 :D
I'll .. wait o U will see enshallah

maha يقول...

البوست وايد وايد وايد حلو

تعليقك كان ممتاز عن حجينا الحين

**********************
**********************
الحين ربعنا حجيهم قرقيعان
**********************
**********************

=Pp~

Eb9ara7a and his Wife يقول...

Maha :D
مشكورة
مو لايق عليج هالحجي .. تعودنا منج المقالات الفصيحة :)

Eb9ara7a and his Wife يقول...

W.
شوفي يا بنت الحلال .. التنفيس و تطليع الحرّة شي ضروري و وايد احسن من اللي يقمت ! و على قولة القايل : الفنون جنون .. و الجنون فنون
يعني الواحد يبدع .. اللي يصرخ من قمة راسه و اللي يدابج لما ينهد حيله و اللي يخر اللي بقلبه حق آدمي يرتاحله و اللي يصليله ركعتين و الخ الخ الخ :)
و الجمبزة اللي انتي تحجيتي عنها نوع جيد من انواع التفريغ .. دام اهي رياضة و تامل بنفس الوقت
..
مشكورة على التسيورة

Eb9ara7a and his Wife يقول...

Leo :D
Thanks على الزيارة الأولى
..
الإنسان الحساس شبه مريض .. بس يكفي إنه إنسان و قلبه حي
;)

غير معرف يقول...

That's a great story. Waiting for more. » »