الاثنين، مارس 28، 2005

Twelfth : !! رسالة حق .. عشّاق صدّام

السلام عليكم و رحمة الله .. شلونكم و شعلومكم ؟ .. أبشركم تراني بالكويت و رديت من لندن أخيييراً .. ماتشوفون الديرة منوره ؟ :)) .. صارلي جم شهر مو قادر اعبر عن اللي بقلبي و لا امعبّر انّي اطلع حرّتي لانه اللابتوب اللي كان معاي هناك عطاكم عمره و فنقش .. و البي سي اللي عندي مافيه عربي ! :( بس الحين و بعد مارديت حسيت اني اقدر اطلع اللي مكنون بصدري ( قويه -المكنون- صح ؟ هيهي ) فخلكم معاي يا جماعة الخير ..

بتكلم بصفتي كويتي .. و يمكن أكو خليجيين لهم نفس وجهة النظر .. يمكن .. الحرب شغالة الحين و القصف مستمر على العراق .. و بالوقت هذا شفنا وايد من البشر مركزين على سب أمريكا و التسفل بالكويتيين(بتهمة ضرب العراق) ! و انا اليوم احب ارد على هذيله بجم كلمه اتمنى انها تردهم حق صوابهم .. انحاول .. و الباجي على الله

#باختصاااار : ليش (احنا و ملايين الناس) نكره المدعو : صدام حسين التكريتي ؟ و ليش ندعي ليل نهار ان الله يخسف بحزب البعث اللي مسيطر على العراق ؟

1-

صدام حسين السافل احتل دولة مسلمة اسمها الكويت سنه 90 و سوى فيها الهوايل اللي راح نتطرق حق بعضها بعد شوي ..

2-

صدام حسين الطاغية حارب دولة مسلمة اهي ايران لأكثر من 8 سنين فتره الثمانينات .. للعلم بس .. أنا سني مو شيعي .. لكن المسلم مسلم
3- صدام حسين السفاح قتل الأكراد في شمال العراق و قضى عليهم بالكيماوي و غاز الخرد بمنطقة ( حلبجة ) و أكثرهم حريم و ياهال مو رياييل مسلحين ..

4-

صدام حسين الخسيس أطلق صواريخ سكود على دول اسلاميه .. الكويت .. السعودية .. قطر .. ايران .. بغض النظر عن نتيجة القصف اذا كان يصيب أو يخيب ..

5-

صدام حسين المتعجرف احتل أراضي تابعة لدولة مسلمة اهي السعودية ( الخفجي ) و قتل سعوديين كانوا فيها ..

6-

صدام حسين المدمر (أخاف آرنولد بس) دمر نفط المسلمين و حرق بلايين الدنانير و الدولارات .. نفط ايران و نفط الكويت و هم نفط العراق نفسه .. آبار و محطات و ناقلات نفط ..

7-

صدام حسين المجرم سوى مذابح بحق شيعة العراق في مناطق الجنوب و الاهوار و النجف و كربلاء .. قتل علماء دين .. على قولة الشيعة ( سادة ) .. أنا اختلف معاهم بأكثر من شغلة .. بس مايجوز نقتلهم .. حرام

8-

صدام حسين المنافق وعد و أخلف .. و هذي من آيات المنافقين .. لما قال حق الملك فهد و الرئيس حسني مبارك و غيرهم .. انه ماراح يستخدم القوة ضد الكويت (هالكلام كان قبل 2-8-1990) يعني قبل اجتياحه الغادر للكويت .. حجي بالهوا بس .. يعني طار بالهوا شاشي و نمنا على الكاشي

9-

صدام حسين المهزوم بعد ما قتل ملايين البشر بحربه مع ايران و بعد ما ضيع بلايين الدولارات في ذيج المعارك .. قدم كل الاراضي اللي كانت تحت سيطرته للايرانيين و استسلم لهم بس عشان ما يهاجمونه لما كان محتل الكويت !!!

10-

صدام حسين حلل قتل المسلمين .. بالعراق و الكويت و السعوديه و ايران بالحرب و كذلك ضد المدينيين العزل مو بس العسكريين .. و احيان كثيرة جدام اهلهم .. بالرصاص .. بالسجاجين (جمع سكّين) .. بالاحماض .. الشنق .. السحق بالدبابات ..

11-

صدام حسين السفاح أباح تعذيب المسلمين بابشع الوسائل .. بالكويت و السعوديه و العراق و ايران .. بأبشع الوسائل اللي ماني قايلها ..

12-

صدام حسين القذر ما منع اغتصاب المسلمات .. بالكويت و العراق و ضد الاكراد و ايران ..

13-

صدام حسين باق و لهف (سرق) و استولى على أموال و أملاك المسلمين و حلل لزمرته فعل الشي هذا .. بالكويت و ايران و العراق و السعوديه ..

14-

صدام حسين الجبان ما فكّر يرد على الاسرائيليين لما فجروا المفاعل النووي العراقي و تم مثل القطو المندعس و القملة المقصوعة منخش بملجأ تحت الأرض لا يهش و لا ينش ..

15-

صدام حسين المجرم أسر و مازال يأسر الالاف من المسلمين في سجونه .. كويتيين و سعوديين و ايرانيين و غيرهم من المعتقلين العراقيين و الجنسيات الاخرى ..

16-

صدام حسين الفاسق حط لنفسه 99 لقب !! لان الله سبحانه و تعالى له 99 اسم .. استغفر الله العظيم ..

17-

صدام حسين المينون مازال يقول انه انتصر بحرب تحرير الكويت و سماها ام المعارك !! لوووووووووووووووووول .. ادري الموضوع جد بس صج الشي هذا يضحك هيهي .. يقولوله شلون انتصرت ؟ قال انا حاربت جيوش ضخمة و عدة دول مو بس دولة وحده !! شوف النظرة الغبيه .. اي واحد فينا يقدر يروح نادي ملاكمة او حديد او مصارعه و يصارخ بنص الصالة : مالت عليكم كلكم .. يغسلون شراعه و يدوسون ابمردانه و يشقون ويهه !!! .. يعتبر منتصر بعدها ؟ ام المعارك هذي ؟

18-

صدام حسين اللي يدعي الاسلام .. ماخلّى بالعراق زاويه او شارع او ربعة الا نصب فيها
صنم حقه
.. أصنامه بالعراق اطول من مآذن المسايد ! يعلها الهدم على راسه قولوا آمين

19-

صدام حسين أكبر عدو للبيئة في العالم كله و في الوطن العربي بشكل خاص .. لوّث الخليج بعد ما ضخ النفط الكويتي فيه !! حرق الآبار الكويتية بعد ما فجرها كلها !! .. دمر الأهوار في العراق و جفف الانهار هناك !! سحق النخل العراقي اللي كان الافضل في العالم فبقي ثلثه فقط ! دخان برج (جمع بركة) النفط الكويتي و العراقي خلى المطر أسسسسسود (أسود سواد الليل جلاّب الهموم) و اللي كان بالكويت ايام الغزو شافها .. و التقارير الدولية لها شواهد بيئية ثانية ضد صدام و زمرته ..

بعد هذا كله تعتقدون (الكلام موجه للمخدوعين فيه) ان صدام احسن من الأمريكان ؟! و ما زلتوا تؤمنون انه شروره أقل من شرور أمريكا ؟! .. في المقالة هذي قلنالكم شنهي بلاوي صدام الطاغية .. المره اليايه نقولكم شنهي مزايا الأمريكان و ليش نحترم الجيش الامريكي اللي عندنا بالكويت (ما أتكلم عن اماكن ثانية بالعالم) .. الصبر زين

نلتقي على الخير قريبا انشالله

هناك 15 تعليقًا:

Ra-1 يقول...

الله يرحم شهداءنا
:'(

maha يقول...

الحمد لله اللي فكنا منه و من شره

لكن مو معنى إنه كان على غلط

يصيرون الأمريكان صح
و نواياهم طيبة

السالفة كلها مصالح

*************************
بصراحة

المدونة هذي صارت ضمن
(الفيفرت عندي)

و حاولت أكتب بالفصحى
لكن ما قدرت ، لهجتنا اهني تصير أحلى

^-^

Eb9ara7a and his Wife يقول...

Ra.1
آمين .. الله يتغمدهم برحمته و يحشرنا معاهم بجنات النعيم
و عسى ربي يصبر أهاليهم
و ترى لما الحين قاعدين نسمع عن إكتشاف رفاة شهداء يدّد مدفونين بمقابر جماعية بعد ما أعدمهم صدام و شلته الفاسدة
..
Maha
صاجّة .. لهم مصالح بطبيعة الحال .. ماكو شي لله ايينا من هذيله .. بس يبقون أخف الضررين مقارنة مع البعثيين .. و هالنقطة لي فيها مقالة من العتيج المتجدد :)
مشكورة على إطرائج الحلو .. و تبقى مدونتج متميزة كذلك

Eb9ara7a and his Wife يقول...
أزال أحد مشرفي المدونة هذا التعليق.
Eb9ara7a and his Wife يقول...

W.
اول شي .. العراقيين مثلهم مثل غيرهم من البشر .. طبقات و درجات .. ناس ناس و ناس مداس على قولة القايل :s
و غالباً تكون طبقتهم المريشة و الغنيه من جماعه صدام و اللي كانوا يبوقون فلوس العراق .. في مقابل شريحه كبرى من الشعب مو لاقيه غداها او عشاها
..
شوبنق بالقاف
G = ق
..
بالنسبة للامريكان .. انا اخش رايي حق حزة المقالة اليايه .. ماني مسولف عنهم الحين .. بس انا اتفق معاج بانهم مثل ما انفعونا .. ضرونا
..
للحديث بقية :)

Eb9ara7a and his Wife يقول...

W.
hehe :P
yeah , بس ترى لها اكثر من معنى :)
..
النملة لي قرّب زوالها .. تريّش ! و هم الجرج و ولد الفلوس انسميه : امريّش
..
و سلامتج

Eb9ara7a and his Wife يقول...

W.
CHarCH = غني
و لها ألفاظ مختلفة بلهجتنا العتيجة ..
مثل
Zangeen زنقين
Mrayesh امريش
ولد فلوس .. ولد بيزات
..

Eb9ara7a and his Wife يقول...

W.
You mean : ريالات او هللات

Ra-1 يقول...

LOL
:)

Eb9ara7a and his Wife يقول...

W.
الله يخليلكم الموجودين و يرحم المتوفين :))
و احنا هم كنّا نستخدم كلمة بيزات .. و الحين صارت فلوس
..
و ترى بيمرونج :PpP

Eb9ara7a and his Wife يقول...

W.
LOL !
لا عاد انتوا عندكم الوضع غير .. احنا لهجتنا وحده مع اختلاف في بعض الالفاظ :)
اما عندكم .. فتلقين الجداويه و تلقين الحجازيه و تلقين اللي من اليمن و البدو و الحساويه .. و تعال فجج
فجج يعني فكك يعني فرّق بينهم و حل الشرباكه :P

Eb9ara7a and his Wife يقول...

W.
هالحين الفجر يا شقحه .. و هسّه راح أرقد لما بكرة المسا لأنه ويك اند :PpP
..
هذا بدوي خواله عراقيين و دارس بالجامعه الامريكيه بمصر :))
..
انتي كثري من طاش ما طاش و انشالله لهجتج تصير مضبوطه :D

Eb9ara7a and his Wife يقول...

W.
LOOOOL !!
اي كانت معانا وحدة أيام لندن .. الله يذكرها بالخير .. من جدة و امها مصرية .. بس الحجي و الشكل مصري درجة اولى ولا جنها خليجية
..
حدنا طلعنا عن موضوع صدّام :)

Eb9ara7a and his Wife يقول...

W.
على طاري الاخبار .. ليلحين تلفزيون المملكة فيه أخبار باللغة الفرنسية ؟

غير معرف يقول...

Very cool design! Useful information. Go on! small business credit cards Land rover discovery 2006 communications systems global satellite phones look for automobile navigation systems and automobile gps http://www.forextrading1.info/Rhinoplasty-new-york-orange-county-nose-surgery.html Leasing audi minor rhinoplasty 3000cc breast implants new orleans Seo salvador affiliate marketing Small business liability insurance clear http://www.ferrari-7.info/pictures-of-enzo-ferrari.html consignment designer handbag louis vuitton rhinoplasty and swelling