السبت، أبريل 16، 2005

18 : ! الفروسية .. و البيت المسكون




يِلدِز .. مدربتي بنادي الفروسية .. عمرها بأول الخمسينات او على الأقل آخر الأربعينات .. مربربة و قصيرونة .. شقرة و عويناتها مخوضرة .. اللي يشوفها يسأل : جم حفيد عندها ؟ .. بس اهي مو متزوجة .. و متخصصة بقفز الحواجز -اللي اهو برنامجي معاها- .. تتكلم إنجليزي و طبعاً تركي و شوية عربي .. تقول إنها اشتغلت بالسعودية حروة السنة عند اميرة في اسطبل و ميدان و مضمار مْغَطّى .. نشيطة ماشالله عليها مو مثل حريمنا -أصابع إيدك مو سوى- اللي اذا الوحده دشت بال 35 نست شي اسمه صحة و رياضة و حركة و نشاط .. كثير من الحريم هاليومين يركزون على المظاهر اللي تقصر العمر و تتلف الجسم و ما تعطيها أي مردود إيجابي بصحتها مثل المكياج و عمليات الشد و غيرها من الخرابيط اللي هابين فيها بإيران و لبنان و مصر و انت رايح ، و كل ما بعدت عن الكويت زاد السعر ! .. خلصت دورتي مع يِلدِز و المفروض تييبلي شهادة دورة قفز الحواجز من نادي الفروسية .. هاليومين
***
بيت الرعب .. هذا اهو الموضوع اللي وعدت بعضكم اني أييب طاريه اليوم ! تخيل انك تعيش بالمكان التالي : شقة 4غرف و 4 حمامات و صالتين -كبيرة و صغيرة- و مخزن او غرفه الغسالة و بلكونتين .. بروحك .. الصبح تييك خدامه عيوز تكون برة البيت متحجبة و بالبيت تربط حجابها على اليبهه جنها رامبو ! -شكلها عادّتني أصغر عيالها- !! .. تالي الليل اذا طليت من دريشة هالمكان بالزور تشوف لمبه ! الشارع مافيه شبّات و المباني اللي حولك يا يغطيها الشيَر أو إنها أصلا امظلمة ! يعني خرمس بمعنى الكلمة .. بالشتا ما تسمع إلا صوت قرقعه الجينكو او البيبان اللي تتصافق بسبة الهوا ! بليالي الصيف تسمع اصوات قطيع الجلابه -كرمكم الله- اللي تنابح و تعوي مثل الذيابة ! هالمكان كل نص ساعه تسمع فيه صوت ساعه كوك و خشب عمرها حروة ال50 سنة -طنننن طننننن طننننن- و الصوت له صدى بعد لأن الأرض مو مفروشة ، يا رخام او خشب ! اكو كائنات غيرك بهالمكان -مو ذا أذَرز اللي مثلت فيه نيكول كيدمان- بس لما تسمع الميااو او الوااو راح تعرفهم ! -أسولف عنهم تالي إنشالله- .. الوضع بالنهار مختلف تماماً لأنه يا أخضر من الزرع او أبيض من الثلج .. المكان من برة مبني من رخام احمر على عنّابي ، أكشخ مبنى بالمنطقة .. بس بنفس الوقت يعتبر اكثرهم بشاعه و رعب لما تظلم الدنيا !! .. دوّر هالمكان ، اذا لقيته نادني من برة السور .. بس ذنبك على جنبك إذا طلعلك عزيمَت أو رستم !! .. نسولف عنهم بعدين
***
تعشينا بشركة أحمد المقاول .. كنت انا معاه و الدكتور و هاندان هانم و تالي يانا نوري و خطيبته ! كان عشانا خفيف -همبرقع و جيبس- و تالي سولفنا عن سُعاد أخو أحمد -ترى ماهي بدلية- سعاد دش التجنيد و قطّوه بمنطقة -وان- اللي على الحدود التركية الإيرانية -يعني امقوينه- و بعدها انتقلنا للحجي عن عرس نوري و خطيبته .. نوري من عايلة محافظة و كذلك زوجة المستقبل المتحجبة -بس عادي عندهم الطلعه خلال فترة الخطبة- .. عندهم نظام مثل العانيّة بس على شكل أذرب ، يا فصوص او عملات ذهب .. او انك تطلب لستة احتياجاتهم و تحدد اللي بتتكفل فيه .. طاولة او مايكرويف او انك تتشارك مع احد بالثلاجه مثلاً .. اتفقنا انا و الدكتور و المقاول إنه نلبِّس أرضية شقة نوري بخشب عازل مادري شيسمونه ، نوري ما رضى -حالتهم المادية ممتازة- بس احنا أصرّينا -المقاول بيضبطنا بسعر زين- .. الدكتور سولف عن نغزة حلوه يستخدمونها بلبنان اذا بغوا يفتكون من لوية الياهال بالعروس ، يقول انهم يكتبون على الكرت : جَنَّةُ الأَطفالِ في دِيارهم ! .. على وزن : تتعشى ؟ ولا تنام خفيف أحسن ؟
***
صج انّ الويك إند بلَّش .. بس نام بكّير و اصحى بكّير و شوف الصحة كيف بتصير
***
خوش كلام

هناك 26 تعليقًا:

Eb9ara7a and his Wife يقول...

W.
LOOOOOL
ماشالله عليج
شكلهم جذي ! قالوا محنا مارينها ولا هم يحزنون
و الظاهر بوستات الكراسي و اللوحات كلها تمويه بتمويه :P

غسان يقول...
أزال أحد مشرفي المدونة هذا التعليق.
غسان يقول...

استحاحِش بالبيت بروحي:( مع ان البيت مافيه إلا خالتي وجدتي، وهم اذا طق جرسهم ارتعشوا من الخوف بس الوِحدة بالبيت مليقة:(

اربع غُرف وصاله؟ خوش! بزورك قريباً:P

أسأل مصادك عني وخبرني شيقول:P

..

الخدامة ببيت يدتي تلبس حجاب، ومره زفت السايق لأنه دخل بدون لايطق الباب وهي ماكانت متحجبة، بس جدامي وجدام خواني وخالي تفصخه!

غسان يقول...

بوصقر قعدت افكر من مصدرك مالقيت الا ربعك بالائتلافية. للأمانة ماعرف الا شخص واحد منهم وهمه على دِراسته مو الانتخابات. ياني بيوم الإنتخابات، غسان طلبتك! خير يا بوفلان؟ عطنا صُوتك بالجمعية وان شاء الله ماصوت لنا بالاتحاد. لازم احارشه، فقلت له انت شعلاقتك بالانتخابات؟ قالي مالي علاقة بس عشان الصُوت الإسلامي المُحافظ! صوت لهم بالجمعية، وفازت عليهم المُستقِلة. ويقولون ماكو قبابيس بالجامعة!

esTeKaNa يقول...

اهااا الحين عرفت منو يلدز:D
على طاري بعض الحريم:في ناس مو راضين يستوعبون ان لكلك عمر جماله وحلاته مما ادى لزيادة المتصابيات:)
عسى الخدامة تعرف تتكلم خابرتهم نادر ما تلقى احد يفهم لغة غير التركية:)
المياااو والوااااو!!!
اللة يحفظك من كل شر هذا كلش ما ينفع معاي لاني شجاعة بهالسوالف مثل ما تعرف:P
حتى بالكويت يكتبون هالنقزة
جنة الاطفال منازلهم
نوما هنيئا لاطفالكم
يعني لا تيبونهم وتعفسون العرس اللة يعافيكم:)

Ra-1 يقول...

افااا هذا وانت امكلمني أمس وما يبتلي طاري إنك كاتب ثلاث مواضيع
:\

سوسو وتوتو يخرعون الواحد واهو نايم! جم مرة انقزوا علي يوم كنت عندك
:p
صج رعب
;)

Eb9ara7a and his Wife يقول...

غسّان :))
اي شفت شلون .. 3 الله يحفظكم و هم مستاحشين .. عيل انا شقول ؟
حياك ربي .. زورني بأقرب فرصة .. سبق إنّ الربع يوني و طبعاً الاهل وايد يمروني
أثاري خدامتكم عادتك محرم ! و هم خدامتي الدايخه !! لووول
و لو سمحت .. لا تصوت نوبه ثانيه :PpP

Eb9ara7a and his Wife يقول...

mano0ra :D
صاجّة .. الخدامة ما تتحجى غير تركي ! و انا أطبق اللي درسته عليها
و سالفة المتصابيات على قولتج ، فحدّث ولا حرج .. اكو عيايز يلبسون لبس و يلطخون ويوهم اكثر من بنات الجامعه !!
و اول مره ادري انه اللي ينكتب بلبنان على الكرت هم ينكتب بالكويت ! :)

Eb9ara7a and his Wife يقول...

Ra.1 :P
أقولج ليش ؟ حضرتج تطاردين بالعبدلي مع بَفي و خيولج .. يعني مهيصة بمعنى الكلمة :))
و سالفة سوسو و توتو أتفق معاج فيها .. و الحين صاروا 4 ! يعني أهلاً أهلاً :s

True Faith يقول...

You are just like sister with animals; I think I should give you Boodi to join your gang.

جنة الحواس يقول...

الفروسية هوايتي المفضلة اللي اتقطعت عنها بعد ما تحجبت .. و الله ذكرتني بنوف العيسى و بطولات يوم الخميس بنادي الفروسية .. كانت أيام حلوة

:/

maha يقول...

عاد تصدقون

احنا ثمانية في البيت
غير ( هفد ) و مع
هذا أحس مرات وايد إني مستاحشة
!!

صج ما يملي عين ابن آدم إلا التراب

=/

****************

و بيني و بينكم

الحريم ما ينلامون

الجو عندنا ما يساعد إن الوحدة تكون نشيطة
و لازم الويه ينشد بين فترة و فترة
لأنه يذوب مع الحر

=Pp~

Eb9ara7a and his Wife يقول...

T.F :D
LOL يحليييله
طبعاً انا رجعت حق مدونتج عشان أقرى سيرته الشخصيه :P
Boodi is an artist (as he believes); he likes to paint and do art works he also likes animals so much that he has his own little zoo at home. And he is a good imitator.
يتربى بعزكم ابو الجراقي ;)

Eb9ara7a and his Wife يقول...

broken :)
Ra1. still with the hourses مع انها متحجبه
مو شرط تدشين بطولات او تركبين باماكن مزدحمة بالشباب
و أيام نادي الصيد ما انساها .. كنت أركب الفير ! اتجنب لوية العصاري

Eb9ara7a and his Wife يقول...

maha :D
ماشالله 8 ! هممم .. احنا جنه اكثر .. الله يحفظ الجميع و يطول باعمارهم
و منهو هفد ؟ :s
و سالفه الحريم .. ترى بعضهم مو كلهم مأساة .. كل سن له مكياجه و ألوانه و لبسه .. عدل ولا انا غلطان ؟ .. على شنو لابسه ستريتج و الويه جنه أراقوز !

Ra-1 يقول...

Broken ...
كنتي بنادي الفروسية؟؟؟
me too :)

maha يقول...

آمين

و كلامك عن الحريم
عدل
=)

----------------------------

إذا ودك تعرف منو ( هفد ) تقدر تزور هالرابط

^_^

http://mahaq8.blogspot.com/2005/01/blog-post.html

Eb9ara7a and his Wife يقول...

W. :D
شقردية ماشالله عليج
المفروض الناس جذي تستغل وقتها .. مو لاني ما توظفت اقعد مجابل التلفزيون او اطارد بالسكيك من قهوة لي سوق
..
أعشق شي اسمه دورات و شهادات ! درست تركي و قاعد ادرس عبري و حرصت حتى رياضتي تكون لها شهاده .. و اللي اهي قفز الحواجز
..
شوفي .. اذا عندج ميول فنية على سبيل المثال .. لا تجبرين نفسج على ربطها بوظيفتج .. اعرف عسكري أديب .. و طبيب شاعر .. و مدرسة رياضيات ترسم .. و إمام مسيد يلعب كرة قدم
..
و الله يوفقج باللي تشتغلين عليه هاليومين ;)
..
ma3laish I'm talkative :x
لول ! بالعكس .. احنا نندمج مع اللي يقرقون و يكونون هذرة بمعنى الكلمة

Eb9ara7a and his Wife يقول...

maha :))
LOL
عاد انتي مو لايق عليج الضفدع كامل ! اللي يتقرّا بكتاباتج يحس انج غير
بس الناس اذواق و امزجة :D

Eb9ara7a and his Wife يقول...

W. :D
Right
شقرديه shegardeya
اهي و (سنعه) مدح و ثناء .. بس الشقردي او الشقردلي اهو اللي عند ويهك .. وقت الشدايد شديد
;)
السنع .. اهو الذرابه و الاخلاق الطيبه و غيرها من الامور الزينه بشكل عام

Eb9ara7a and his Wife يقول...

W.
LOL :D
صج اني ما فهمت معنى -سكيرتي- بس بطوفها لج اليوم بس :P

Eb9ara7a and his Wife يقول...

W.
LOOOL !!
هذا ابوي الله يحفظه عنده شركة سيكيوريتي .. و مرة قرر يفتح قسم نسائي حق تفتيش الحريم و حراسة الاماكن اللي فيها وايد بنات
و صدفة كنت مار الشركة يوم رواتب موظفات الامن .. اللهم لا شماتة ، بس كانوا 5 صوماليات -اتصور خوات- مستحيل يكونون يايين بسيارة وحده من كثر ما اهمه متان و مصاكّه
:s
..
أشهد إنّج سيكيوريتي :P

Eb9ara7a and his Wife يقول...

w.
مصاكة و مفردها مصك .. معناها : اللي أجسامهم ضخمه و شبه عمالقه ويمكن نطلق هالكلمة على المعضل اللي يدق حديد :)
اكو كلمات ثانية بنفس معنى مصك
جنديف - يثل

غير معرف يقول...

Looking for information and found it at this great site... macintosh pop up block yahoo toolar and popup blocker free pics gay big dicks celebrex addiction http://www.hair-removal-atlanta-5.info/1958-aston-martin-mark-iii.html Norwegian dawn cruise reviews Advantage camera digital slr Undergrad education degrees online http://www.japanese-bondage-girls-torture.info/guys-fist-fuck-dildo.html Poker and bumper pool tables

غير معرف يقول...

You have an outstanding good and well structured site. I enjoyed browsing through it »

غير معرف يقول...

Best regards from NY! get fit stop smoking mybestworkathomebiz.com challenge.htm http://www.running2.info/Payperclickadult.html cosmetics lord of the rings clinique Video conferencing bridge cheap calls ethiopia Types of parental controls Klonopin over switch xanax xr Antique tudor toys physicians formula cosmetics concerns cablevision virus protection Ballpoint merchant account Black ebony ass parade porn Motorola v 60 cell phone