***
ساركان الله يرحمه
قبل جم يوم كتبت عن اخو هاندان زوجة الدكتور محمود و شلون ان مخه مات .. اليوم راح الدكتور منطقة تركية اسمها -دوزيا- و اهي من أشهر مناطق مزارع العيش التركي عشان يصلون عليه و يدفنونه
الله يرحمه و يغفرله و يصبر اهله
عمره محاري 22 .. بيبي فيس و مملوح و يتميز بانه هادي جداً لما يتكلم .. كان يدرس ادارة الاعمال بجامعة -اسكي شهير- .. يقولون انه توفى بسبة خطأ طبي لما حطوله درب او سووله تخطيط قلب -ماني متأكد- .. المهم انه شرحوه امس بالطب الشرعي ! لا حول ولا قوة الا بالله
***
كولولوووش
اليوم من صباح الله خير -بالنسبة لي 11- و بعز الويك اند قعدتني دقدقة و موسيقى و طبول و هرنات سيارات ! جان اطلع البلكونة و انا لابس روبي الأصفر - جني رشدي أباظه- واتطمش على زفة ولد او بنت ييراننا .. الجو كان روعه بس هم حسيت انه العرس تضيع نكهته اذا ماكان تالي الليل ! الحريم يصفقون و الفرقة الشعبية بطبولها و ابواقها و رباباتها داشه جو طرب .. عالبركة
***
أذربيجان
اثبتت الرؤية اخيراً .. 26 الشهر بروح أذربيجان .. بقعد جم ساعه ترانزيت بأسطنبول و تالي بشلع حق العاصمة الأذرية -باكو- .. بتم هناك محاري ال 5 أيام .. شغل طبعأً ماهي رحلة سياحية .. البوس مالي بيي عقبي بيوم
يا جماعة الخير .. اللي يدل فيها مكان او يعرف فيها شي يسوى اني آخذه .. خل يقول
***
حماس
كل شريكين بمشروع لازم يكون تفاعلهم فيه متساوي أو على الأقل متموج بحيث اني أنا أتحمس الحين و أشجعك معاي في مقابل إنك تتحمس باجر و تشجعني معاك
ترى الواحد يحوشه إحباط اذا لقى نفسه يكرف بريحاته في مقابل إن اللي جدامه بارد و يالله يالله يقدم الأساسيات ! عدل ولا انا غلطان ؟
و الإيد الوحدة ما تصفق
***
آلِش فرِش = تسوق باللغة التركية
اليوم الصبح طقيت الشبح 95 ! و طرت فيها السوبرماركت -من طقة سيف وي و مركز سلطان- و ترست العربانه باللي اكو و ماكو .. و كانت هذي أبرز الغنايم
طبق بيض .. 3 جياس توست أسمر .. 6 بطول حليب -حقي و حق قطاوتي- .. 6 بطول ماي صحة .. همبرجع .. فيش فينقر .. جيكين نقتس .. عصير مشمش .. عصير خوخ .. عصير برتقال .. نوعين من اكل القطاوة .. كجب -بالغلط يبت الحار- .. كيلو كرز أسود
اقلط يا ولد
***
بطيخة
غدى اليوم ما ترس بطني .. بطلت الثلاجة جان أشوفها متنعزة بريحاتها بالربعه .. تلق .. مربربة .. مخوضرة شوي .. جان أكمشها و أصوبنها بالمغسلة و تالي سمّيت و قجيتها بالسجينه ! الحين نصها بالثلاجة .. و النص الثاني ابطني -الحمدلله- .. حلوة و معسلة و على قولة القايل : مشيَّر من ضاقه تحيَّر
***
برد على عادتي القديمه .. بنقل شغلات عتيجة قريتها بمدونات غيري و لقيت انها تستحق النشر
**
في أمان الله
هناك 14 تعليقًا:
W.
LOL ! :))
الله يبارك فيج .. لا هذيله ماعرفهم .. اصلاً احنا من كثر السيكيوريتي اللي على مبنانا قاموا الييران يكشون منّا ! بس تصدقين اني اطل من بلكونتي على بيت تاجر سلاح تركي و مرته السعوديه .. و عندهم 4 جلاب كرمج الله
و لا تطلعين علي اشاعه الزواج :) تراها شراكه شبه تجارية
قطاوتي .. امهم سوسو يابت5 و ما بقى منهم الا 2 .. يعني الحين 4 مع ابوهم توتو
تبين تضحكين ؟ أنا كنت عضو بساحة الاقلاع و كان لي نكنيم ابدوي و ياما كتبت بلهجة ابدوية على سعودية :P
الله يرحمه !
عرس منو ؟ولد المليونير؟
عصير مشمش
في تركيا أمشي و بطل عصير المشمش بإيدي
إبوي كان يقوللي ما راح نرد لكويت إلا و شجرة مشمش نابته فوق راسج :P
Imagine that; Looool
اللله يرحم اخو هاندان:(
والعرس اذا ما صار تالي الليل وييت وانته راسك بينبط من الصيحة والوية ما يصير عرس:)
نبي صورة حق الروب الاصفر...شاريه من اوزدلك؟للحين اوزدك عنده اشيا حلوه ولا صار خربوطة؟
وعلية على الرقية اجرمت في حقها...بس هني وعافية
سؤال...قاعد تسوي رجيم؟
طلب...ترجمة تصوبن والنقوص لغير الناطقين بالكويتية
طبعا مو انا:)
Ra.1
NO
عرس ناس ساكنين بوحده من العماير مو البيوت .. يعني لا مليونيريه ولا هم يحزنون :))
..
T.F !
LOL
عاد المشمش عندهم مو طبيعي .. شكلكم كنتوا في بورصه لانه احسن مزارع مشمش هناك .. ماشالله جنه تفاح من كثر ما اهو احمر و لي قرمتيها تتلفج من زود العصير اللي فيها :))
اي عاد اذا اطلعت براسج اشيرة مشمش يبيلج طربال مكان الحجاب
:P
..
Estekana :D
طبعاً اخبار العروس عندج .. انتوا اعلم باللي يصير فيها تالي الليل
و ابشرج ، ترى اوزلدك فاتح جم فرع من هالسوالف الطيبه اللي تعجبج اسعارها حق الصوايغ
و اي ريجيم الله يهداج ! من الكرشه ولا المتن ؟ الحمدلله ما اعتاز ريجيم
اما الترجمه .. تصوبن من صابون و غسيل .. يسبع الشي يعني يرشرش او يقطه بالماي على الطاير :)
و اخلي النقوص و النقصه عليج
:/ tara mo zein kila fish fingers o chicken nuggets
ماكو خضرة ؟ ترى أهم شي
----
off topic
تصوبن ؟ بتئوول تصوبن ؟ يبئا انت اللي أتلت بابايا
ashwa ;p
ray :s
منكم نستفيد
كلامج عدل
انزين شتنصحيني فيه اذا ماعرف اسوي سلطه ؟!؟
..
Ra.1
شحقه ؟!؟
Ha ! >:/
شيبيلها السلطة ؟
بعد هذا مو طبخ
البوست الياي فيه كم سلطة
ray !
ماعرف .. معني احبها و ادري انها تفيد
waiting for your post about it
..
aljadel
Yes , Why ?
أول مره تسمعين عن توست أسمر ؟
اللي غنى عنه عبدالكريم : آه يا الأسمر يا زين :P
..
Le0 :D
Yes , Hamburge3 khazzan
Keep up the good work » »
Keep up the good work » » »
Very cool design! Useful information. Go on! »
Enjoyed a lot! » »
إرسال تعليق