عظم الله أجرك يا غسّان

هالبوست غير عن باجي البوستات يا جماعة الخير

اليوم أكتب كتابة واجبة علي و ماهي إختيارية .. اليوم أحط هالبوست و كلماته لازم تطلع منّي و مو بكيفي أقمتها

**

أعزي بإسمي و إسم غيري من الإخوان و الخوات أخونا غسّان اللي توفى والده الله يرحمه و يغمد روحه الينّة

**

ماجورين يا غسّان و كلّه بميزان حسناتكم إنشالله

**

الوالد الله يرحمه متهني بالخير اللي سوّاه بدنيته و أول الخير اهو اللي قال عنه الرسول صلى الله عليه و سلم : ولد صالح يدعو له

هذا اللي يحتاجه كل ميت .. حتى الصالحين منهم .. الدعوة الطيبة ثم الدعوة الطيبة ثم الدعوة الطيبة

**

اللي الله كاتبه فيه الخير .. و عسى أن تكرهوا شيئاً و هو خيرٌ لكم

**

و تذكروا جميعاً .. إنّ كل من عليها فان .. و الله سبحانه و تعالى اهو الحي اللي ما يموت .. الرسل و الانبياء عليهم السلام انقبضت ارواحهم الطاهرة .. ملوك ماتوا .. أمم ما نلقاها الا بالمقابر

و يبقى الذكر الطيب و الصدقة الجارية و الذرية الصالحه

**

اللهم وسع مدخله واكرم نزله وغسله بالماء والثلج والبرد ونقه من الخطايا كما ينقى الثوب الابيض من الدنس ونور قبره و اجعله روضة من رياض الجنة

**

فمان الله و حفظه

لاهي

اي نعم لاهي .. هذا أنا هاليومين .. لاهي و مشغول و مضغوط و حدّي منضك

الدوام من صوب و ردّتي الكويت من صوب ثاني و هم عندي ظروف وخّرتني وايد عن الكتابة هني

**

يِلدِز و شهادة الفروسية .. الوزير زكي و البوسة العجيبة ! .. الحداق و بنت الآغا .. معرض التحف و سردابنا المهجور .. سيارتي مع النيجيري و الصيني .. و غيرها من السوالف اللي ودّي أحطها هني .. بس مثل ما قلت ودّي بس الهوا ضدّي

**

سبق إنّي وعدت و ما كنت قدها ! .. و الإعتراف بهالحالة فضيلة -منهي فضيلة؟- .. كنت قايل إني بييب طاري اليوم اللي صرت فيه ماسوني ! و هم بتحجى عن التوم اللي تبنيتهم ! .. بس الله ما كتب إنّي اتفرغ حق هالشي .. نذكرها بالتفصيل إذا الله احيانا لي ذيج الحزّة

**

صدفة .. إنَّ وايد من ربع البلوقات -المدونات- لاهين و مشغولين .. يعني حالهم حالي .. و عسى الله يسهل على الجميع .. بس العوض ولا القطيعة ، يعني ندش نسلم و نعلّق عالطاير و نأجل المواضيع الطويلة و الهذرة الزايدة لي حزة اللي الواحد يتفرغ فيها .. ترى اكو اولويات غير النت .. اهل و دراسة و أمور ثانية تستحق الإهتمام .. هالنصيحة حقي قبل غيري

**

أهَقى .. و حسب تقديري الشخصي .. و بناء على جدولي الياي .. إنّي بدش النت كل جم يوم .. بس ماراح أقدر أفضاله عدل مدل إلا عقب حروة الشهر أو 5 أسابيع بالكثير

**

طرى على بالي هالبيت .. مادري شحقّه !؟

إنّما الدنيا فناء && ليس للدنيا ثبوت

إنّما الدنيا كبيت && نسجته العنكبوت

**

فمان الله

20 : WeekEnd

سالفتين ودّي أصارحكم فيهم باجر و اللي عقبه -إذا الله أحيانا- .. بس مادري بأهي أبتدي ! بخلي زوّار مدونتي -يا ثقل هالكلمة- يقرّرون و يحدّدون على كيف كيفهم .. و يا جماعة الخير .. اللي ناوي يعلق على الحجي الياي خل يختار موضوع من الموضوعين اللي بذكرهم الحين عشان تصير المسألة جنها تصويت مثل سالفة الأفلام و ما يطلبه المشاهدون بقناة إم بي سي 2 ..

! اليوم اللي صرت فيه ماسوني

!! اليوم اللي تبَنّيت فيه التوم -توأم- و رضعتهم

***

رئيس هندي أَسبق زاير تركيا .. له كتاب عن القائد الهندي العتيج -نهرو- و الجماعه هني مسويله عشا بالهيلتون على شرفه اهو و مرته -طبعاً أثنينهم مشدقين 75 و 90 سنه- .. طلعت جريب المغرب مع الدريول و مرينا أبو العَبِد .. الصدفه اللي ما تدش المخ إن رفيجي الدكتور محمود اهو اللي عالج ضروس مرت الرئيس الأسبق قبل العزيمة بيوم ! .. سبحان الله ، من بين آلاف الدكاترة اللي هني ما نادوا الا رفيق السلاح

دشينا القاعة .. على الييسار قنفات حق الضيف و مرته و السفيرة الهنديه -اللي اهي بنت الضيف نفسه!!- و كبار الشخصيات على قولتهم .. على الييمين معرض سواري و أقمشة كشميرية -حق التطمش مو البيع- بالويه تشوف البوفيه و اللي فوقه رازّين شاشة عووودة تعرض فلم هندي حق أشواريا و شاروخ خان -شكلي خبصت بالأسامي- و طبعاً الامريكان و الاوروبيين يموت على هالسوالف ، اما أنا و أبو العبد فعقب ما سلمنا اشتغلنا حش -الصج ينقال- و أثاري اللبنانيين من طقّة الدكتور ينظرون للهندي مثل ما ننظرله بالكويت !! شي يضحك و يفشل بنفس الوقت

***

منطقة -قول باشي- معناتها -منطقة بحيرة الباشا- .. فيها أحد أشهر الأسواق الدورية .. مرة وحده بالشهر .. جبرة عودة حيل و مكشوفة -في العراء على قولتهم- و فيها بسطات و طاولات مصفوفة على شكل لاينات .. متخصصة بالانتيك و التحف و الأشياء العتيجة .. كنا 3 مجاميع : انا و الدكتور و هاندان هانم و نوري + الجنرال و زوجته + بو أحمد و حرمه المصون .. عقب التسوق اللي قضيناه من 10 الصبح لي 3 العصر نتج عنه -بالنسبة لي- التالي

واحد : ساعة تيسوت .. صناعة الستينات .. مينا ابيض و برواز فضي و سير يلد كحلي .. حالتها لا باس فيها .. تشتغل على الحركة .. محفور على ظهرها : هالساعه هدية فلان بمناسبة شغله معانا خلال 25 سنة

أثنين : ولاّعة عتيجة حيل لونها ذهبي و عليها 3 طيور -أبيض و أحمر و أزرق- و مصنوعة بألمانيا .. النوع اللي ينحط على طاولة و ما ينحط بالمخبا .. ماركتها

SIMSON

ثلاثة : معجم عثماني - فرنسي .. طباعه عتيجة .. صغيرونو بحجم قاموس اوكسفورد .. مؤرخ في 1304 هجري

أربعة : كتاب ضخم من 632 صفحة .. عربي و طباعة قديمة .. الغلاف يلد طبيعي .. عليه ملاحظات و تصحيحات جثيرة .. بس للأسف ماكو تاريخ ! ما نبّشت بالكتاب عدل بس اللي فهمته إنّ عن الفصحى و علم اللسان بس بشكل تخصصي مو مبادئ و كلام سهل

خمسة : 3 نسخ مختلفة من -سند خاقاني- و تواريخها الهجرية كالتالي : 1329 و 1331 و 1309

***
تغدينا على يال البحيرة كلش ملّش .. يعني لو في موي جان طشر علينا رذاذه .. كان الجو روعه حد الدوسة .. بس هبت علينا شوي و بغت الشماسي تطير ! بالنسبة للاتراك تعتبر هالفترة (بيّاع الخبل عباته) و للأسف يومها كان معانا وايد مخابيل !! .. الامن تم مستتب بهالغدوة الحلوة ماعدى ذاك القرسون الدايخ اللي طلبنا منّه 4 كنافات تركية -كنّا 8 أشخاص- و عقب ثلث ساعه يابلنا كنافة وحدة مقسمة 4 قطع ! سكنهم مساكنهم
***
كلام طيّب
http://kuwait-n-islam.blogspot.com/2005/02/whom-does-allah-love-why-dont-we-want.html#comments

19 : ليش أحبها ؟

معنّه ويك إند .. إلاّ إنّي ما ارتحت .. هايلنا من مكان لي مكان .. فزعت من صباح الله خير بسبّة الدكتور محمود .. شكّل علي من عيادته و انا معطيه طاف حد الدوسة ! .. تريقت كورن فليكس .. بالكويت أشربه مع حليب حار بس هني تعودت على البارد .. دق أبو العَبِد نوبة ثانية جريب صلاة الظهر جان أرد عليه و بدون مقدمات قال : ها شْريك وايناك ؟ بائيلي مريض واحد بَدّو حشوة و بعدها خلاص ماعَندي شي ، شو لِبلان ؟ -يعني شنهي الخطّة؟- .. هني بدت طلعتنا !

رحنا المطار مع أحمد المقاول عشان انييب اخوه سُعاد -الاسم متعوب عليه- اللي أخيراً خلّص 5 شهور من الخدمة الإلزامية -تجنيد- وبالمطار بغت تدمع عينه يوم شافنا لان ما هقى انَّ نتعنى عشانه .. علاقتنا فيه سطحية

تالي زرقنا على سوق الجمارك .. يبيعون فيه البضاعه المتروكة في الشحن او اللي تصادرها الحكومة او المهربة ! طب و تخيّر .. العبرة من الروحة اهي التطمش و التمشي مو التشري .. شرينا مدّتين-بساطين- حق كشتاتنا -نسولف عنها تالي انشالله- و عقب ما هدّينا احمد و سعاد طلعنا مع هاندان زوجة الدكتور و رافجنا نوري التحفة .. رحنا الشارع السابع -قهاوي و مطاعم- و هناك نوعين من القعدات .. اكل و شرب أو جنجفة و شطرنج و دامه و اوكي -القمار ممنوع بكل تركيا- قررنا نلعب كوت بو 4 -معلمهم الكويتية طبعا- و لعبنا قيمين 51 و 51 فزت انا و هاندان بالاول و فاز أبو العَبِد و نوري بالثاني .. و التسميات بلغتهم كالتالي : الحاس = كُبّا ، الديمن = كارو ، الكلفس = سِنيك ، السبيت = ماجا

***

أحبها .. و اللي مثلها لازم تنحب .. و مقتنع إنها متميزة .. و غيري هم يحس إنّ اللي عنده اهي المتميزة .. احلف انها اول من حبيته .. و ما زالت الأولى .. هفواتي تنساها من كثر ما تموت علي .. و ما قط شفت تجاهي و من صوبها زلّة .. محد يخاف علي كثرها .. و من سابع المستحيلات إني أكسر كلمة قالتها لي .. بجت عشاني من سنين .. حاتتني يوم طوَّلت بغيبتي .. اشتاقتلي لما امتدّت سفرتي .. وَلَهت و مازلت ولهان عليها .. ادعيلها بصلاتي و احس اني مهما سويت فماراح اوفيها الحق اللي يتوجب علي .. أبَد

ليش انا متأكد إن أمّي غير ؟ مع إني متيقن إن كلمن يقرا هالكلمات بيقول نفس الشي عن أمه ! لأني أحبها .. و لأن اللي يقرا الحين هم يحب أمّه

أيام الإحتلال البعثي كانت الوالدة كل شي بالنسبة لنا .. اخوي العود كان برة الديرة .. انا كنت صغير .. الوالد الله يحفظه كان مطلوب من الصدّاميين و بنفس الوقت لاهي مع المقاومة و لجان التكافل الإجتماعي .. أذكرها لما تبجي على سيادتها .. كنت متيقن إن هاللي تسويه اهو فرجنا .. بس ساعات احسبه احساس مراهقين .. لكن يوم تحررت الكويت تأكدت انّ دعاء أمي و أمك و أمج اهو اللي دمّر أحد اكبر الجيوش الدكتاتورية في العالم

أفتخر باعتدالها و وسطية فكرها .. مع إنها أول محجبة بجامعة الكويت .. كانوا 3 طالبات مع بعض بزمَن الميني جوب و الميكرو جوب و قمة التحرر و حرق العباة و صعود التيار الليبرالي .. يشهد لهم وزير يساري سابق : زميلاتنا المحجبات بذاك الوقت 3 (فلانه) بنت وزير أسبق و (فلانه) بنت تاجر معروف و رئيس جمعية خيرية و (فلانة) بنت رمز شيعي مشهور الله يذكرهم بالخير ..

عقب ما تفوقنا كلنا -الا انا البطة السودة اللي ترتيبي 3 و 4- قَرّرَتْ اتييب الماستر .. و حصلت على الماجستير بألفاظ القرآن الكريم و اهي أم حق 7 .. يوم قدمت رسالتها كنت بين الحضور طاير من الفخر و ودي اقوم و أقول باعتزاز : هذي امي

أغبطها .. و اتمنى اني اشوف اللي شافته بعيالها .. ابي عيالي يمسكون مناصب .. ابي ذرّيتي فالحه و صالحه .. ابي اللي يدعيلي مثل ما الله رزقها باللي يدعيلها

**

اللهم آتها في الدنيا حسنة وفي الآخرة حسنة وقها عذاب الناراللهم أسألك لها من خير ماسألك منه عبدك ونبيك محمد صلى الله عليه وسلم وأعوذ بك لها من شر ما استعاذ بك منه عبدك ونبيك محمد صلى الله عليه وسلم

***

و على الخير .. نلتقي

18 : ! الفروسية .. و البيت المسكون

يِلدِز .. مدربتي بنادي الفروسية .. عمرها بأول الخمسينات او على الأقل آخر الأربعينات .. مربربة و قصيرونة .. شقرة و عويناتها مخوضرة .. اللي يشوفها يسأل : جم حفيد عندها ؟ .. بس اهي مو متزوجة .. و متخصصة بقفز الحواجز -اللي اهو برنامجي معاها- .. تتكلم إنجليزي و طبعاً تركي و شوية عربي .. تقول إنها اشتغلت بالسعودية حروة السنة عند اميرة في اسطبل و ميدان و مضمار مْغَطّى .. نشيطة ماشالله عليها مو مثل حريمنا -أصابع إيدك مو سوى- اللي اذا الوحده دشت بال 35 نست شي اسمه صحة و رياضة و حركة و نشاط .. كثير من الحريم هاليومين يركزون على المظاهر اللي تقصر العمر و تتلف الجسم و ما تعطيها أي مردود إيجابي بصحتها مثل المكياج و عمليات الشد و غيرها من الخرابيط اللي هابين فيها بإيران و لبنان و مصر و انت رايح ، و كل ما بعدت عن الكويت زاد السعر ! .. خلصت دورتي مع يِلدِز و المفروض تييبلي شهادة دورة قفز الحواجز من نادي الفروسية .. هاليومين

***

بيت الرعب .. هذا اهو الموضوع اللي وعدت بعضكم اني أييب طاريه اليوم ! تخيل انك تعيش بالمكان التالي : شقة 4غرف و 4 حمامات و صالتين -كبيرة و صغيرة- و مخزن او غرفه الغسالة و بلكونتين .. بروحك .. الصبح تييك خدامه عيوز تكون برة البيت متحجبة و بالبيت تربط حجابها على اليبهه جنها رامبو ! -شكلها عادّتني أصغر عيالها- !! .. تالي الليل اذا طليت من دريشة هالمكان بالزور تشوف لمبه ! الشارع مافيه شبّات و المباني اللي حولك يا يغطيها الشيَر أو إنها أصلا امظلمة ! يعني خرمس بمعنى الكلمة .. بالشتا ما تسمع إلا صوت قرقعه الجينكو او البيبان اللي تتصافق بسبة الهوا ! بليالي الصيف تسمع اصوات قطيع الجلابه -كرمكم الله- اللي تنابح و تعوي مثل الذيابة ! هالمكان كل نص ساعه تسمع فيه صوت ساعه كوك و خشب عمرها حروة ال50 سنة -طنننن طننننن طننننن- و الصوت له صدى بعد لأن الأرض مو مفروشة ، يا رخام او خشب ! اكو كائنات غيرك بهالمكان -مو ذا أذَرز اللي مثلت فيه نيكول كيدمان- بس لما تسمع الميااو او الوااو راح تعرفهم ! -أسولف عنهم تالي إنشالله- .. الوضع بالنهار مختلف تماماً لأنه يا أخضر من الزرع او أبيض من الثلج .. المكان من برة مبني من رخام احمر على عنّابي ، أكشخ مبنى بالمنطقة .. بس بنفس الوقت يعتبر اكثرهم بشاعه و رعب لما تظلم الدنيا !! .. دوّر هالمكان ، اذا لقيته نادني من برة السور .. بس ذنبك على جنبك إذا طلعلك عزيمَت أو رستم !! .. نسولف عنهم بعدين

***

تعشينا بشركة أحمد المقاول .. كنت انا معاه و الدكتور و هاندان هانم و تالي يانا نوري و خطيبته ! كان عشانا خفيف -همبرقع و جيبس- و تالي سولفنا عن سُعاد أخو أحمد -ترى ماهي بدلية- سعاد دش التجنيد و قطّوه بمنطقة -وان- اللي على الحدود التركية الإيرانية -يعني امقوينه- و بعدها انتقلنا للحجي عن عرس نوري و خطيبته .. نوري من عايلة محافظة و كذلك زوجة المستقبل المتحجبة -بس عادي عندهم الطلعه خلال فترة الخطبة- .. عندهم نظام مثل العانيّة بس على شكل أذرب ، يا فصوص او عملات ذهب .. او انك تطلب لستة احتياجاتهم و تحدد اللي بتتكفل فيه .. طاولة او مايكرويف او انك تتشارك مع احد بالثلاجه مثلاً .. اتفقنا انا و الدكتور و المقاول إنه نلبِّس أرضية شقة نوري بخشب عازل مادري شيسمونه ، نوري ما رضى -حالتهم المادية ممتازة- بس احنا أصرّينا -المقاول بيضبطنا بسعر زين- .. الدكتور سولف عن نغزة حلوه يستخدمونها بلبنان اذا بغوا يفتكون من لوية الياهال بالعروس ، يقول انهم يكتبون على الكرت : جَنَّةُ الأَطفالِ في دِيارهم ! .. على وزن : تتعشى ؟ ولا تنام خفيف أحسن ؟

***

صج انّ الويك إند بلَّش .. بس نام بكّير و اصحى بكّير و شوف الصحة كيف بتصير

***

خوش كلام

http://estekana.blogspot.com/2005/03/blog-post_27.html

16 : أبو العَبِد

أحد أقرب الناس لي في تركيا .. دكتور ضروس .. لبناني الأصل .. انتقل من طرابلس لي هالديرة قبل حوالي 13 سنة .. كافح -كعادة اللبنانيين- و تخرج من كلية الطب في العاصمة التركية أنقرة و حصل الجنسية التركية و تزوج من هني .. و له حالياً عيادة أسنان مشهورة يتقاسمها مع دكتور تركي إسمه بُراق .. مع انهم اثنينهم في اوائل الثلاثينات .. عيني عليهم باردة

***

لقب -أبو العَبِد- صار علّوقته من كثر ما يقولّي نكت عن هالشخصية اللبنانية العتيجة اللي كان راعيها من اهل طرابلس الشعبيين حيل و اللي يلبسون الطربوش مع تفتيلة الشنب مثل ما يسوي بو العناتر رفيج غوار الطوشة

***

هالريال ما يزورني بالمكتب و إيده خالية ! لازم معاه بوكيه ورد أو جاكليت أو قروضات ، و ذاك اليوم تغشمرت معاه و عقبها ما ياب شي ! مع ويهي قلتله : انت تبي تتلف ضروسنا عشان نعالج بعيادتك .. مو ؟

و من ذيج الحزة ما يابلي شي

***

قبل لا أتعرف عليه ركَّبت تقويم -و مازال- و دايماً ينتقد المستشفى اللي انا ركبته فيه .. بس عطيته كلمة و وعد إني أسوي تبييض و تنظيف و هالسوالف الكمالية بعيادته عقب ما افتك من التقويم

***

بو العَبِد تعرفت عليه بديوانية القطريين اللي تتيمع فيها الجالية العربية مرتين بالاسبوع و يطيحوله فيها كوت و هذرة و نقاشات سياسية و احياناً يستضيفون شخصية معروفه بتركيا من باب توطيد العلاقة بين العرب و الاتراك ... و كنت ذاك اليوم ناوي أشتري شوزن قبل لا يبلّش موسم الصيد و الظاهر ان الدكتور محمود قط اذنه او اني كنت اسولف بصوت عالي ! فوصّاني بأسلوبه اللبناني الذرب على محل اهو اشترى منه -بندئيّة- يعني -شوزن- قبل اسبوع .. صدفة ! .. و كانت هذي أول علاقتنا يوم إني رافجته حق محل الشوازن

***

ساعات يسميني (شْريك) -اشتقاقاً من الشراكة- و أحياناً يناديني بلقب (رفيق السلاح) لأني طلعت معاه القنص أكثر من مرة -بنسولف عنها تالي باذن الله- و اكو تسمية أخيرة اهي -بو زكي- لاني ساعات أطفره بالسوريين و أتحجى معاه بلهجتهم خاصةً لما أقوله : شو هالحكي يا بو زكي ؟! .. و مباشرة يرد علي بجملة : سوريا آوت سوريا آوت

***

زوجة الدكتور -هاندان- تركية من أصل شركسي .. قمة في الهدوء و الأدب .. و معنى إسمها هو : إبتسامه ... وايد توصي الدكتور و تحرصه اني اشرب جاي عندهم او حتى اتعشى -تخيل العشا المخلوط بين الطباخ التركي و اللبناني- و تالي اكتشفت سر هالعزايم ! أثاريها متضايقه ليش اني خذيت ريلها البيتوتي منها و قمنا نطلع وايد حق القنص و البولينق و أسواق الأنتيك -هم بنأجل السوالف عنها- فقرر من يومها انه يعوضها .. قام يحرص انه يزورها بزامها الليلي بأحد أكبر المستشفيات الحكومية هني .. لأنه المدام مالته متخصصة بالأشعة في قسم الحوادث .. الله يكافينا الشر

و عقب ما اعرفتني -هاندان هانم- و تاكدت أنّي خوش آدِمي و ما عندي كيري ميري و انه زوجها بأيدي امينه .. خفَّت عزايمها حقي و اتصالاتها اللي تلج فيها ريلها لما يطلع معاي

***

قبل لا اكتب هالكلمات بحروَة الساعة كنت طالع مع بو العَبِد و أم العَبِد حق إفتتاح مطعم يملكه واحد من ربعهم و زوجته الأوكرانية .. و عقب ربع ساعه من دشتنا المطعم مشينا بشكل اضطراري لأنه واحد تونسي من ربع الدكتور كان بمستشفى الولادة مع مرته الحامل اللي قطّت ولدها !؟!! .. و احنا بدرب الردة قالي بالانجليزي -عشان هاندان تفهم- : يوم لك و يوم عليك ، ناس مستانسين بافتتاح المطعم و ناس يبجون على ولدهم اللي مات قبل لا يشوف الدنيا .. و الخيرة فيما اختاره الله

***

خوش شي

http://ra1.blogspot.com/2004/12/true-story.html

15 : قرار

:) الله بالخير

***

يا الربع .. من جم شهر و أنا أنشر بهالمدونة (تييبلي الحارج هالكلمة) خمطة مقالات عتيجة سبق إني كتبتها من سنة الطفحة و اهي حول 14 من المواضيع المختلفة و المتنوعة مثل -العَقَد و الأمريكان و الحجاب و المواتر و سوالف البنات و رمضان و التزلّط و لندن و المغازل و المُبايلات و التبجبج و صدّام و الصور الخليعة و المسلسلات الكويتية- و كنت أحسب إن صداها ماراح يستمر مدة طويلة ، إنما بعد ما طرشتها حق قروبات عن طريق الإيميل و هم لم نشرتها هني لقيت إن التجاوب معاها كبير مو عشاني او بسبّة أسلوبي مثلاً -خاصة إنّ مداح نفسه يبيله رفسة- إنما لأنه ذاك الحجي كان يعتمد على مبدأ سحري إسمه -الصراحة راحة- و إنه الصج ينقال و كلمة الحق ما تنخش .. و اللي يتبع هالقاعدة سواء كتابةً أو في تعامله اليومي بيربح من صوبين ، أول شي بيريح قليبه لما يفضفض الكبْت و يفرّغ المتكوّد داخله .. و ثاني شي بيوَصّل القمندة و زبدة الحجي بشكل مباشر و بدون لف و دوران حق اللي يقرا أو يسمع بحيث تدش كوره و مخه (إذا كان موجود طبعاً) أو تدخل إذنه المشنتحه (و في رواية اخرى : مشتَّحة) فيكون لها بالغ الأثر و الوقع

فهمتوا شي ؟! ما اعتقد

***

خلك معاي يا محفوظ السلامة .. البلوقات -جمع بلوق- أشكال و أرناق .. بس أبرزها قسمين : النوع الأول اهو اللي اللي تلقاه متخصص بالنقاشات و المقالات الطويلة او اللي يسمونها هاليومين : مواضيع الحواريه (أخاف بس الإتجاه المعاكس) و هالنمونة إهي اللي أنا -و أعوذ بالله من هالكلمة- اتبعتها من بلشت بعالم البلوقات .. اما الشكل الآخر المنتشر هني فاهو كتابة اليوميات و الحوادث اللي تمر على الآدمي في بيته او دوامه او السكة أو أو أو .. و شكلي ببَلّش بهالأسلوب من الجابلة إذا الله أحيانا

***

معلوم إنّ المقالات الطويلة لها إيجابياتها و سلبياتها .. و هم المذكرات -من طقة مفكرة العجيري اللي قبل نكتب فيها شسوينا و ما سوينا- لها مميزاتها و عيوبها .. قد تكون احداث يومي ما تهم اللي قراها و قد تهمه في احيان اخرى .. قد يمل المتابع لقرقتي و قد يندمج فيها .. قد تلوع جبد اللي بيفكر يعلق على كلماتي و قد يسترسل من كثر ما اهو متحمس لها .. الناس أجناس ، و أصابع إيدك مو سوى (أعرف واحد عنده الثلاثه اللي بالنص نفس الطول) .. و على قولة القايل : لولا إختلاف الأذواق لبارت الأسواق -و في رواية : لبارت السلع- .. و الله يكتب اللي فيه الخير

***

فمان الله يا جماعة الخير :D

Fourteenth : !! صيام آخر زمن

الله بالخير :) كالعادة .. هالسالفة اللي بتبلشون بقرايتها بعد شوي ماهي من حجي هاليومين .. اهي عبارة عن كلمات صففتها بشهر رمضان اللي طاف .. و للأسف وايد قروبات انسختها و باقتها و الهفتها و طرشتها على أساس ان هالهذرة من إعدادها !! الله يسامحكم .. شدعوة ماخذين مقالة نجيب محفوظ

******

شباب و بنات .. مبارك عليكم الشهر .. و بدون القرقة المعتادة بدْفر على الموضوع .. ترى رمضان يا جماعة الخير ماهو بس تسكيرة حلج من فير الله لما أذان المغرب ! الصيام سَنَع و أخلاق و احساس داخلي و قناعه تامّة بأنه هذا شهر مقدس عندنا كمسلمين .. ندري ان السنه كلها عبادة و صلاة ، لكن هالشهر الفضيل له خصوصية اكثر يا الربع .. خلكم مع هالجم بند .. عالطّاير ;)


1- صايمه و تلبس مرصص لي درجة انك تقدر تعرف تفاصيل جسمها و مقاساتها كلها !؟! و ترى اكو متحجبات تنانيرهم ألعن من جينزات البنات السفور

2- صايمه و تارسه الويه مكياج و الحمره جنها كجب و الكحل لما الاذون و لابستلي عدسات و حاطه مسكره و شدو ؟ أظنتي يسمونه تبرّج .. صح ؟

3- صايم و تتمقل بالمشهدين و اللقطتين اللي قلنا عنهم قبل شوي ؟ لا تقول اهمه السبب .. اهمه عليهم اثم الفصاعه و انت عليك اثم الخز و انك ما غضيت بصرك

4- صايم و ترقم و تقز على البحر ؟ و لاحق بنات بالحب جنك ما تدري و قاعد تتمشى ! تقص على الناس اوكي .. و على الله شتسوي يا الدايخ ؟

5- صايم و تاخذ معاش بدون دوام ؟ لا اجازه ولا استئذان جنه الوزارة مالت اللي خلفوك .. شكو مو حاضر ؟ معنه الدوام خفيف و اقصر برمضان .. الله يهداك بس

6- صايمه و تحشّين بهذي و هذيج ؟ ترى الغيبه حرام .. و القرآن شبه اللي تغتاب باللي تاكل لحم انسان ميت ! و الله سبحانه ما يطق بعصى .. اليوم تحشين هني و باجر يحشون فيج هناك

7- صايمة و تتعمدين تتمخطرين على الممشى العصاري و قبل الفطور بشوي و انتي لابسه بنطلونات تدرين انها تشكل جسمج و بديات (جمع بَدي) مطلعه شحومج ؟

8- صايم و قاعد يم الممشى و ما عندك شغله و لا مشغلة الا انه تبحلق عويناتك بالرايحه و الراده على الخط و مسويلهم زووووم مو طبيعي ؟ يا اخي اقرالك صفحه من القرآن او كلش كلش نام .. نامت عليك العافيه و الديايه الحافيه

9- صايمين و طايحيله رضاع لما اذان الفير ؟ استحوا على ويوهكم .. قلنا عشّاق و تحبون بعض .. (تصبحين على خير حياتي) او (تسحر عدل يا عمري) و خلااااص .. ليش نطولها و احنا بشهر فضيل ؟

10- صايم و تسهر بشيشه ؟ ندري انك حزتها فاطر .. بس بنفس الوقت اكو اوادم احسن منك يروكعون بمسيد و يصلون جيام و اكو ناس زايرين اهلهم من باب صلة الرحم و اكو بشر امبسطين ببيوتهم و مجابلين التلفزيون .. هذيله أهوَن بوايد من اللي طايحله معسل و قدو .. صح ولا انا غلطان ؟

11- صايم و تبلش فطورك على زقاره ؟ الرسول صلى الله عليه و سلم وصّانا على تمره و ماي .. و اكو ناس تفطر على لبن مثلاً .. و الناس العاده تدعي اول ما تفطر و تردد ورى الاذان .. زقاره يا الظالم ! لي هالدرجه سحيك يا السبندي

12- صايمه و نفسج خايسه و على طريف زين ما تطلع من خشمج على امج و خواتج و خدامتكم !؟ شنو متنسيه ولا يايتج الحاله ؟ .. اذا يوعانه او عطشانه قفلي على روحج الدار و جابلي المنظره لما يأذن المغرب

13- صايمه و رفيجتج يمج تتعلج بالسياره ؟ لا حيى و لا مستحى !! .. اذا انتي عادي عندج ترى الناس لهم احترام .. و شلون رفيجتج توري الصبيان ان يايتها (...) عييييييب لي هالدرجه انحط مستوى بعض البنات ؟! صج ناس هيلق لا يستحون ولا ينتخون !!

14- صايم و داش الدوام و ريحه البخور واصله لي الخفجي ؟ تبخير الهدوم بروحها جايز بس ترى استنشاق البخور و تبخير الدشداشه و انت لابسها حرام على الصايم لانه يدش بالرئتين .. ماني مفتي الديار المقدسة بس هذا راي السنه و الشيعه .. مانقول تعال دوامك و ريحتك فايحه و معطنه ! بس تعطر او حط دهن عود مثلا بكمية معقولة

15- صايم و كله ماد بوزك جنك بعزى ؟! ابتسم يا اخي لانك مسوي شي زين و قاعد ينكتبلك اجر .. عاد لا تشق الحلج و الكشره شقاقيه جنك شيسمونها اللي على جبنه -لاباشكيري-.. بس خلك فرايحي و نفسيتك عال العال و اترك عنك التقلدم .. و سلملي على البوز

16- صيّام و نطرش ايميلات و مسجات وصخه ؟! قلة أدب .. بوقت ثاني بالطقاق اللي يطق ابليس .. بس برمضان لا عاد يصير الوضع من زفت لي ازفت .. مهي حاله ترى ! يه

17- صايم و معلي على الأغاني بالسكّة و انت تحوس بسيارتك بين الفرجان ؟! يبه اسمع دقدقة اذا تبي و عساك تصير دي جي .. بس خلها تالي مو بالوقت اللي الواحد ينفذ فيه أمر الله سبحانه.. و بعدين لا تسَمّع الناس غصب .. اسمع بروحك .. و على شينه قوات عينه تلقى الذوق مثل ويهه شغل عراقيين والبرتقاله

18- صيّام و تبوقون ايميلات ؟ ليش تجذبون و تقولون انكم كاتبينها ؟ و انتوا بس شايلين ايميل الكاتب الأصلي و حاطين ايميلاتكم او مو حاطين شي .. حسد حسد يعل ابليسكم الواوي و الذيب اللي يعاوي

******

يالله .. نشوتكم على خير .. فمان الله يا الطيبين :)

Thirteenth : Uncle Sam الله يهداه

كعادتي .. أنقل في مدونتي هذه .. كلماتٍ سطرتها أناملي بالأمس البعيد ، فاليوم أنشرها و غداً قد يعتريها غبارُ النّسيان

أحرُفي هذه ، قطراتٌ تقاذفتها شلالاتُ أفكاري .. عسى أن ألمح عابرَ سبيلٍ يرتشفها .. في مدونتي

...

لول :))) .. انا مادري شقلت .. بس أدري انه اللي قرا أسلوبي اللي طاف راح يلاحظ انه اكو شي غلط اليوم :pPp

ملاحظه : الحجي الياي عتيج و صارله شهور و دهور

السلام عليكم جميعا .. شالاخبار ؟ شكو ماكو ؟ شلونكم ويه صفارات الانذار ؟ صج ربعنا حق الشماته يعجبونك لانهم حتى بهالسوالف اللي الناس تبجي فيها تلقاهم يتضحكون و يتطنزون على بعض و يطرشون مسجات تفطس من الضحك (من باب : شر البلية ما يضحك) .. شزينهم و الله و اهمه متصبرين و يحاولون يتناسون (سكود) هدام العراق .. الله يحفظ اهل الكويت و كل المقيمين فيها ( اللي مو مصلحجيه طبعا ) .. خلكم معاي .. كتبت آخر مره جم كلمه عن صدام حسين طاغية أرض الفرات (على قولة القايل) .. و شرحت بمحاري (جمع حروة) العشرين نقطه ليش اهو مجرم و خسيس و شحقه احنا نشتغل ضده و لابد من ازالته (جيك على لابُد) .. اتمنى ان الكل يقراها -تحت عنوان : رسالة حق .. عشّاق صدام !!- عشان يتذكر شنهي جرايمه بحق الكويتيين و الايرانيين و العراقيين و الاكراد و السعوديين و الانسانية و البيئة و حتى أزواج بناته و أخو مرته سجوده !!! .. اليوم بقرق عليكم شويه عن ربعنا (اذا صح التعبير) .. عن الأمريكان .. و راح أبين بكل بساطه ليش احنا نكن لهم بعض الاحترام و لأي حد نقدّرهم اكثر من بعض العرب الخونه و زمره من المسلمين اللي مايعرفون الاسلام شلون قايل أصلاً .. خلك طبيعي يا فلان و بقق عويناتك ..

* أولا .. الأمريكان اهل كتاب .. يعني مو كفار .. يعني مو مشركين .. (ادري انه بعض الشباب اللي لهم اهتمام شرعي بيقولولي انهم كفار و محرفين دينهم - هذي وجهة نظر) لكن اهل الكتاب اهمه اللي عندهم كتب سماوية مثل القرآن الكريم و الانجيل و التوراة.. فلايبدع واحد منكم و يخلي الامريكان مثلهم مثل عبدة البقر و الاصنام كالسيخ و الهندوس اللي يبيعون تواير بالشويخ او مثل البوذيين !

*نقطتي الثانية (منقولة) و متخصصة بجانب شرعي .. و هو انه حرااام شرعا نتعدى على معاهد و على اهل الذمة و اللي بينّا و بينهم اتفاق .. الرسول صلى الله عليه و سلم قال : «الا من ظلم معاهدا او انتقصه حقه أو ظلمه فوق طاقته أو أخذ منه شيئا بغير طيب نفس منه، فانه حجيجه يوم القيامة» اخرجه ابو داود، ولحديث عبدالله بن عمر عن النبي صلى الله عليه وسلم قال «من قتل معاهدا لم يرح رائحة الجنة، وان ريحها يوجد من مسيرة اربعين عاما» راوه البخاري ، ولحديث ابو هريرة عن النبي صلى الله عليه وسلم قال «الا من قتل نفسا معاهدة لها ذمة الله وذمة رسوله صلى الله عليه وسلم فقد اخفر ذمة الله، ولا يرح رائحة الجنة وان ريحها ليوجد من مسيرة اربعين خريفا» رواه ابن ماجة الترمذي وصححه، ولما كان ذلك فان الشروع بقتل المعاهدين بغير حق بموجب معاهدات عقدها أولي الأمر وصدق عليها من قبل الشعب (مجلس الامه) في هذا البلد وبذلك يكون الفعل خروجا على أمر الله ورسوله وافتئات على الحاكم لاخلاله بعقد الذمة والامان وخروجا على سلطة الدولة المتمثلة في الحفاظ على حياة الافراد وصونها من أي تعد لبناء مجتمع قوي آمن، وان التعدي على حياة الفرد انما هو تعد على حقوق الله الذي وهبه الحياة فضلا على حق الفرد في العيش مما يعد هذا السلوك منكراً قصد به المفسدة والعبث بالكيان الاجتماعي ونشر الهلع لدى المجتمع .. الخ

* ثالثاً .. اكو انسان كامل ؟ اكو احد عايش الحين منزه عن الخطأ ؟ ماكو طبعا .. رفيجك فلان اللي يصلي تلقاه ساعات يشرب زقاير .. صح ؟ يعني فيه الزين و الشين .. رفيجتج النسرة ام السان طويل راعية الحش و الغيبه و النميمه احياناً تتصدق و تقط بيزات على الفقاره و كل سنه تروح العمره نوبة وحده .. صح ؟ يعني ماكو شي دايم بين الناس و مايصير نحكم على فلانه بانها خايسه بس بسبّة هذرتها و السانها اللي يلوط اذانها ! انزين ليش نسينا ايجابياتها ؟ خنشوف الجانب الزين و نتناسى -مؤقتاً- الشين .. ادري انه الامريكان مطينينها و امصخينها بفلسطين و بعلاقتهم المتحيزة مع الاسرائيليين و هذا شي لا خلاف عليه .. لكن موقفهم من الكويت و اعتداء العراق علينا و على السعوديين يختلف تماما ولايصح انه نربط بين القضيتين .. هذي مسألة لازم نفهمها لما نتعامل مع الأوادم عموماً و لما نتعاطى بامور سياسيه بشكل خاص ..

* النقطة الرابعة .. الكويت طول عمرها تتبرع حق فلسطين و اللاجئين الفلسطن في لبنان و الاردن و و و .. و طول الحرب العراقيه الايرانيه كانت الكويت تساعد العراقيين في تعمير ديرتهم و قراهم المدمره .. شنو كان الجزاء و شلون ردوا الجميل ؟!؟ طعنه بالظهر سنه 90 اثبتت خسة حكام العراق و سفاله السلطه الفلسطينيه اللي الحين محكوره بجم كيلومتر جنها قطيع غنم بياخور .. منو اللي وقف معانا ؟ النصارى او المسيحيين (كيفكم انتوا نقوا) و اهمه الامريكان و البريطانيين و غيرهم من دول العالم الغير اسلاميه و الغير عربيه .. فالدين ما صار له أثر بهالحادثة لأنه الكثير من المسلمين تخلوا عنه .. (ادري انه اكو فلسطينيين و عراقيين كان موقفهم من الكويت مشرّف .. بس احنا نتكلم هني عن الغالبية) و لكل قاعة شواذ .. و شواذي ! :pPp
* خمسة - اهم شي انها مو 5- .. منهو اللي وقف معانا في 90 ؟ منو انقذنا بفضل الله لما غزانا العراقيين ؟ الامريكان طبعاً .. منو طرد الجيش العراقي المخذول من على ارض الكويت ؟ هم الامريكان و حلفائهم .. منو داس على راس صدام حسين و خلاه غصبن عليه يدفع تعويضات دمار الكويت و مازال يسدد فاتوره جريمته ؟ الامريكان بلا شك .. منو سحق الجيشين الشعبي و الجمهوري البعثي العراقي لما دمروا منشأت الكويت و قتلوا الناس و اغتصبوا النساء و يتموا الاطفال ؟ قلنالكم انهم الجيش الامريكيً ..

* سادساً .. منهو اللي ساعدنا في مسألة اطفاء آبار النفط و ثروتنا اللي حرقها صدام النذل و جيشه الردي لما احتل الكويت ؟ .. شي اكيد انها الفرق الامريكيه اللي تعاونت مع الفريق الكويتي

* سبعة .. منهو اللي حمانا بعد الله سبحانه و تعالى عقب التحرير بالتعاون مع الامم المتحده من تهديدات المهزوم هدام العراق ؟ .. الامريكان

* النقطة الثامنة .. منهو اللي تحرك معانا و مازال يتحرك لاطلاق أسرانا في السجون العراقيه و معاهم اسرى عرب و اجانب ؟ .. الحكومه الامريكيه و غيرها من الدول الصديقة و الامم المتحدة ..

* تاسعاً .. أدري ان وايد منكم الحين يقولون : للامريكان مصالح في كل هذا .. و ردي اهو التالي : (لهم مصالح و مالهم مصالح) .. مالهم مصالح لانهم يساعدونا من منطلق الديمقراطيه اللي يطبقونها و الحريه اللي يسعون من اجلها و اللي لايمكن أن تشم القليل منها بالعراق .. و اذا قلنا ان لهم مصالح نفطيه فهذا مو شي غريب .. طالب مصري اعرفه .. قالي أيام كنا بلندن : (امريكا عاوزه النفط اللي تحتيكوا و مش عشان بتحبكو) .. قلتله : خير يا طير ! اكو بوديقارد يشتغل ابلاش ؟ اكو حارس بدون راتب ؟ اكو جيش بدون تمويل ؟ .. ماعرَف يرد .. اي يبه نعطيهم نفط و نعوض خسايرهم ليش لا ؟ حرام ؟!! هذي مكافاة مساعدتهم لنا و وقفتهم الشريفه معانا .. مو مثل بعض العرب الخونه اللي يبون النفط لهم بدون وجه حق و اهمه اصلا ما شفنا منهم ذرة تأييد ايام الاحتلال العراقي للكويت .. و تالي يقولون بكل قواة عين و وقاحة : نفط العرب للعرب !! اي حكي يا بو زكيييي .. طير يا عمي طير .. نفط الكويت للكويت .. و اذا بغينا نساعدهم فهذا يرجع لنا و من منطلق ديننا الاسلامي و عروبتنا مو غصبن علينا .. خلي فول مصر للمصريين و تبولة لبنان للبنانيين و طرابيش سوريا للسوريين و عنب فلسطين للفلسطينيين و رقي (بطيخ) الاردن للاردنيين و ماقول الا حل عني يا زلمه و بسكم حسد .. وطبعا اصابع ايدك مو سوى .. اكو زلمات محترمين و اكو زلمات مايسوون بيزه و حدهم ازاعر (مفردها ازعر) يعني هتلي و سبندي و مو مضبوط
...

* عموما .. انا احس اني طولت عليكم و سولفت وايد (مثل كل مرة) .. بس هذا اللي قدرت عليه بحيث ألخص نقطه وحده .. ليش علاقتنا ككويتيين خصوصا و خليجيين عموما بهذي الصوره مع الامريكان .. و لا يعني هذا انه احنا نرضى عن جميع مواقفهم مع الفلسطينيين او اللبنانيين مثلا .. بس موقفهم كما ذكرت قبل شوي مع الكويت كان مشرف و اشرف من شنبات كثير من الأبضايات .. و خلكم معانا بوقفات يايّة..

:) فمان الله جميعا