الثلاثاء، يونيو 28، 2005

Still There !





عذراً

مازلت في أذربيجان .. رجوعي سيكون يوم الخميس القادم إلى العاصمة التركية أنقرة .. إن شاء الله تعالى

أهم شي إني بلّشت بالفصحى !؟

السموحة (على قولتهم) لأني ما رديت على ضيوفي اللي سيروا علي هني .. و لأني ما عقّبت على الكثير من بوستاتكم الييديدة يا جماعة الخير

الحديث عن الجمهورية الأذرية اهو محور حوارنا -!!- بعد ردّتي .. إذا الله عطانا عمر

فمان الله

الخميس، يونيو 23، 2005

! كُفرٌ .. إنترنتّي



أنا
لست بملتحي .. لست من يقتني دشاديشاً قصيرة .. لست من يحضر دوماً محاضراتٍ دينية .. لست بسلفي .. كما أعلمُ أنّني لست مفتياً .. كذلك لست ضليعاً في العلم الشرعي
و لست .. و لست .. و لست

أنا
ألبس الجينز الأمريكي .. ألف رقبتي يومياً بربطة عنق فرنسية .. أتعطر بزجاجات أتت من باريس .. أرتدي ما صممه أرماني و خاطته أناملٌ إيطالية .. أعرف وقتي عن طريق ساعة سويسرية .. تتلاعب أناملي الآن على جهازٍ ياباني أحضروه لنا من إمبراطورية الساموراي .. أستنشق في بيتي بخوراً من بلاد الهندوس و السيخ
تساندني في عملي موظفتان شقراوتان لهما الفضل بعد الله سبحانه في إتمام أعمالي المكتبية .. أتدرب في نادي الفروسية على يد شقراءٍ أخرى .. كما أتلقى دروساً خصوصية على يد شقراءٍ رابعة

و رغم أن حائطي تزينه شهادات علمية و عملية دنيوية لا دينية من الكويت و أوكسفورد و لاهاي و بروكسل و أنقره - ربي لك الحمد – و ليست من قندهار و تورابورا و الشيشان .. إلاّ أنني كنت و مازلت و سأظل – بإذن الله - أشكر رب العالمين على أنّني أعتز بسجودي له و إذلال هامتي أمامه عشرات المرات يومياً ضمن صلواتي الخمس .. ألهج إليه بالشكر لأنه جعلني حتى في بلاد الصليب بل و في أرض العلمانية أجد لذّةً لا تضاهيها لّذة عندما أركع متضرعاً و راجياً رحمته و عفوه .. أحمده تعالى لأنّه لم ينزع منّي تلك الفطرة التي وُلِدَت عليها كل نفس بشرية
***
آنَ
تحجيت عن المظاهر لأن البعض قاموا يكشون من الدين باعتقاد إنه ضد هالشكليات
!
تكلمت عن الشهادات لأن البعض يعتقدون إن مخهم اللي وزنه أقل من كيلو و نص صار عقب جم سنه دراسيه و جم كتاب قروه و جم دورة تدريبيه أرقى من تعاليم الدين الحنيف اللي قامت على أساسه أمم و إمبراطوريات و خلافات إسلامية من أسبانيا لما ماليزيا
!
يبت طاري بلاد الكفر لأن البعض ينسى جبلته و ريحة سيادته اذا عاش برّه
!

آنَ
من جمن يوم نصحت أكثر من رفيج و أخت بلوقرز بتطنيش المهزلة و الحجي الفاضي اللي يدور هني و هناك .. و كان شعاري اهو : الحقران يقطع المصران .. و طنش تعش تنتعش .. و مثل ما قال الشاعر
أعرض عن الجاهل السفيه ** فكل ما قال فهو فيه
ما ضرَّ بحر الفرات يوماً ** إن خاض بعض الكلاب فيه

أنما الصج ينقال .. قص علي الشيطان اليوم عالعصاري و قالي : دش موقعي و اقرا اللي انا كاتبه .. جود يعجبك !!؟
بدون مبالغه يا جماعة الخير .. اللي قريته مو طنازه على مطاوعه ولا سب و كلام وصخ موجه حق حزب اسلامي ولا تسفيه بآراء شرعية و دينية و فتاوى ولا ولا ولا .. اللي قريته كفر .. ك ف ر
!!
أعرف مدى خطورة تكفير المسلم .. و أدري بمدى حساسية الموضوع .. و كنت و مازلت ضد اللي يكفرون بدون علم .. و ما يعجبني لما يكَفِّر الناس كلمن هب و دب .. و أعتبر نفسي من الساعين للتقريب بين المذاهب و الأحزاب الإسلامية مع نبذ تكفير بعضها البعض .. إنما كل شي له حدود .. و كل أمة لها ثوابت .. و كل مجال فيه خطوط حمرة .. حتى أجهل المسلمين و أقلهم علم يدري إن الله سبحانه و تعالى و الرسول صلى الله عليه و سلم و الملائكة عليهم السلام من أقدس ما يجلّه و يحترمه المسلمين من لما تباركت الأكوان والكرة الأرضية بالدين الحنيف
بس للأسف .. اللي قريته كان احد أقذر النصوص الكفرية اللي مرت علي
يا جماعة الخير .. اللي أسميه كفر ماهو مجرّد نقاش ديني ولا خلاف مذهبي ولا مسألة تتعلق بصحابي جليل أو فتوى شرعية .. النجاسة اللي شفتها كانت تستهزئ بالله سبحانه و تعالى و جبريل عليه السلام و الرسول صلى الله عليه و سلم
!!!
طبيعي إني ماراح أنقل الكفر .. و شي أكيد ماراح انوصخ مواقعنا بعنوان ذاك الموقع او اسم كاتبه .. و ادري انه الكثير منكم يعرفون ذاك الموقع منزمان و منكم اللي كتب عنهم و منكم اللي حقرهم .. بس لي حجوتين بقولهم قبل لا أختم

نحمد الله إن السواد الأعظم من الناس اهمه اللي على سماحة الاسلام و على قولتهم : امصلين و امسمّين
البشارة انّ المدونات الطيبة و النظيفه اهي اللي عليها اقبال جبير و تواجد حافل و نقاشات تختلط فيها الجدية
مع الضحك .. اما مواقعهم فاهي خاوية على عروشها و خرمس ما تلقى فيها الا جم واوي
!
للأسف .. الجم واوي اللي يعلقون بالمدح و الضحك على ذيج المقالات الكفريه ما يدرون إنهم مشاركين
بنفس الإثم الاكبر و الذنب الأعظم
!
الحمدلله إني بكلامي هذا أستند على راي الجماعه و اللي ما عليه خلاف أو شك .. سني شيعي مكي مدني أزهري حنفي حنبلي مالكي شافعي جعفري الخ الخ .. الحين محد يقدر يقول إنّ المسألة مختلف فيها
!
شي يونس .. أغلب اللي انتقدولي ذاك الموقع و شلّته الزفره لاهم مطاوعه ولا منقبات مثلا –والنعم بالجميع طبعاً- بس اللي يتضح إن الناس عندنا فيهم غيره للدين و فزعه حق ثوابت الأمة
***
الكلام ما يخلص .. و هذرتي ما تنتهي .. و مابي ينقال عني : قرقه .. بس لا تلوموني على الطوالة يا
جماعة الخير
خلونا دايماً نتذكر قول الله سبحان و تعالى
يُرِيدُونَ لِيُطْفِئُوا نُورَ اللَّهِ بِأَفْوَاهِهِمْ وَاللَّهُ مُتِمُّ نُورِهِ وَلَوْ كَرِهَ الْكَافِرُونَ

السبت، يونيو 18، 2005

!! عزى الدكتور .. و عرس الييران



***
ساركان الله يرحمه
قبل جم يوم كتبت عن اخو هاندان زوجة الدكتور محمود و شلون ان مخه مات .. اليوم راح الدكتور منطقة تركية اسمها -دوزيا- و اهي من أشهر مناطق مزارع العيش التركي عشان يصلون عليه و يدفنونه
الله يرحمه و يغفرله و يصبر اهله
عمره محاري 22 .. بيبي فيس و مملوح و يتميز بانه هادي جداً لما يتكلم .. كان يدرس ادارة الاعمال بجامعة -اسكي شهير- .. يقولون انه توفى بسبة خطأ طبي لما حطوله درب او سووله تخطيط قلب -ماني متأكد- .. المهم انه شرحوه امس بالطب الشرعي ! لا حول ولا قوة الا بالله
***
كولولوووش
اليوم من صباح الله خير -بالنسبة لي 11- و بعز الويك اند قعدتني دقدقة و موسيقى و طبول و هرنات سيارات ! جان اطلع البلكونة و انا لابس روبي الأصفر - جني رشدي أباظه- واتطمش على زفة ولد او بنت ييراننا .. الجو كان روعه بس هم حسيت انه العرس تضيع نكهته اذا ماكان تالي الليل ! الحريم يصفقون و الفرقة الشعبية بطبولها و ابواقها و رباباتها داشه جو طرب .. عالبركة
***
أذربيجان
اثبتت الرؤية اخيراً .. 26 الشهر بروح أذربيجان .. بقعد جم ساعه ترانزيت بأسطنبول و تالي بشلع حق العاصمة الأذرية -باكو- .. بتم هناك محاري ال 5 أيام .. شغل طبعأً ماهي رحلة سياحية .. البوس مالي بيي عقبي بيوم
يا جماعة الخير .. اللي يدل فيها مكان او يعرف فيها شي يسوى اني آخذه .. خل يقول
***
حماس
كل شريكين بمشروع لازم يكون تفاعلهم فيه متساوي أو على الأقل متموج بحيث اني أنا أتحمس الحين و أشجعك معاي في مقابل إنك تتحمس باجر و تشجعني معاك
ترى الواحد يحوشه إحباط اذا لقى نفسه يكرف بريحاته في مقابل إن اللي جدامه بارد و يالله يالله يقدم الأساسيات ! عدل ولا انا غلطان ؟
و الإيد الوحدة ما تصفق
***
آلِش فرِش = تسوق باللغة التركية
اليوم الصبح طقيت الشبح 95 ! و طرت فيها السوبرماركت -من طقة سيف وي و مركز سلطان- و ترست العربانه باللي اكو و ماكو .. و كانت هذي أبرز الغنايم
طبق بيض .. 3 جياس توست أسمر .. 6 بطول حليب -حقي و حق قطاوتي- .. 6 بطول ماي صحة .. همبرجع .. فيش فينقر .. جيكين نقتس .. عصير مشمش .. عصير خوخ .. عصير برتقال .. نوعين من اكل القطاوة .. كجب -بالغلط يبت الحار- .. كيلو كرز أسود
اقلط يا ولد
***
بطيخة
غدى اليوم ما ترس بطني .. بطلت الثلاجة جان أشوفها متنعزة بريحاتها بالربعه .. تلق .. مربربة .. مخوضرة شوي .. جان أكمشها و أصوبنها بالمغسلة و تالي سمّيت و قجيتها بالسجينه ! الحين نصها بالثلاجة .. و النص الثاني ابطني -الحمدلله- .. حلوة و معسلة و على قولة القايل : مشيَّر من ضاقه تحيَّر
***
برد على عادتي القديمه .. بنقل شغلات عتيجة قريتها بمدونات غيري و لقيت انها تستحق النشر
**
في أمان الله

الأربعاء، يونيو 15، 2005

Back


..
عدنا و العود أحمد .. على قولتهم
..
اليوم بكلم روحي .. فمن أولها أحذر اللي ما يحب يضيع وقته .. اللهم هل بلغت ، اللهم فاشهد
..
كنت أزرق على هالبلوق كل جم يوم .. و كنت أسير على الربع و أقرى آخر مقالاتهم و سوالفهم .. بس شيين امنعوا تعليقاتي : الوقت و الكمبيوتر
..
صارلي يومين بأنقرة .. و الجت لاق و النومة المعفوسة و خبصة البيت اهي اللي مأذيتني
..
أم الدكتور محمود توفت بلبنان ! الله يرحمها .. أخو هاندان اللي عمره بأول العشرينات مات مخه و الحين معتمد على الأجهزة !! الله يشافيه و يصبر أهله .. ما حضرت عرس نوري لأني مددت قعدتي بالكويت
..
شيصير بالبيت اذا خليت فيه 4 قطاوة بدون حسيب أو رقيب ؟! ؟
..
الجو روعة .. ماشالله .. بالعشرينات .. و هم يتحلطمون اذا صكت ال 25 ! يا الله تمم علينا و عساها ما تعدي 35 بعز الصيف
..
انا و البوس مالي بنستمر .. ال 3 الباجين توزعوا بين الكويت و دبي ! .. 4 يدد بيوصلون على التوالي خلال شهر و نص .. عساهم يكونون خوش اوادم مثل ما سمعنا عنهم .. عشان ما نقول : خلك على مينونك لا اييك أين منه
..
احتمال أروح أذربيجان آخر هالشهر .. لما الحين ما انحسم الموضوع
..
الكبت يولد الانفجار .. و هذا اللي صار ! .. قلتلهم : اتق الحليم اذا غضب .. و للأسف ، غضب
..
الأهل و هم الربع يخططون يمرون تركيا خلال الصيف .. ماكو شي اكيد لما هاللحظه
..
ما هقيت إنَّ يلدز تطنش ! لي الحين ما طرشت الشهادة ؟! أشهد إنها عيوز ما تنعطى ويه
..
احتمال أشيل تقويمي خلال أسبوعين .. باذن الله
..
ونّسوني اللي مروا معرضي .. و اللي مروا مدونتي .. و اللي كنا على بالهم .. و الغايب عذره و سدّه معاه
..
شفت بالكويت بلاوي متلتله .. و سمعت سوالف ما تنقال .. المهم .. لي وقفه أهذر فيها حول ديرة الخير .. اذا الله أحيانا
..
سرينا ؟
فمان الله