الثلاثاء، أكتوبر 04، 2005

تَقَبَّل الله صياَمكُم و طاَعتكُم

































هَل علينا شهر الخير و البركة
و عساكم جميعاً تعودونه كل سنه
و يا رب تتقبل الطاعات و الصيام و الجيام
و كل عام و انتوا بخير و صحة و سلامة يا محفوظين السلامة
اليوم -الأربعه- يبدي رمضان عندنا بتركيا .. و الجماعة مضبطينه بالرزنامة هالسنة على أساس إنَّ 29 يوم
و آخر جم يوم برمضان بيتغير التوقيت ساعة كاملة لأن التوقيت الشتوي بيبلش عندهم
***
ناوي أرجع الديرة خلال جم يوم .. و بتم فيها لما عقب العيد بيوم يومين إنشالله
ما أظن إني بدش النت خلال قعدتي بالكويت إلا حق إيميل الدوام
أحاول إني أتطمش على بلوقات الشباب و الخوات إذا لقيتلي فجّة
***
أستغرب من بعض اللي يتحجون عن الديمقراطية و الحرية و الليبرالية و الإنفتاح .. و اهمه أكثر ناس يوقفون ضدها إذا خالفت الآراء و الظروف هواهم و قناعاتهم
و اللي على راسه بطحه .. يحسس عليها
يعني : اللبيبُ بالإشارةِ يفهمُ
***
Georges Braque
رسام فرنسي مشهور من طقّة بيكاسو بس أغلب لوحاته إنباقت بالحرب العالمية من قبل النازيين .. له لوحة يملكها كويتي و يُعتقَد إنها إنباقت أثناء الغزو العراقي الغاشم للكويت .. اللوحة ماهي واضحة بس فيها طير أو يمكن طيارة .. اللي عنده فكره عن راعيها خل يخبرني يا جماعة الخير يمكن نقدر نساعده بشي
***
كتبت مقالة أو بالأصح إيميل كوميدي ! قبل جم سنة بعنوان : صيام آخر زمن !! و سبق إني نشرتها بمدونتي هذي منزمان
و ودي إني أرزها هني كتعبير عن واقع الحال المتكرر خلال كل رمضان .. للأسف
***
شباب و بنات .. مبارك عليكم الشهر .. و بدون القرقة المعتادة بدْفر على الموضوع
ترى رمضان يا جماعة الخير ماهو بس تسكيرة حلج من فير الله لما أذان المغرب ! الصيام سَنَع و أخلاق و احساس داخلي و قناعه تامّة بأنه هذا شهر مقدس عندنا كمسلمين .. ندري ان السنه كلها عبادة و صلاة ، لكن هالشهر الفضيل له خصوصية اكثر يا الربع .. خلكم مع هالجم بند .. عالطّاير ;)
1- صايمه و تلبس مرصص لي درجة ان أي بنية تقدر تعرف تفاصيل جسمها و مقاساتها كلها !؟! و ترى اكو متحجبات تنانيرهم ألعن من جينزات البنات السفور
2- صايمه و تارسه الويه مكياج و الحمره جنها كجب و الكحل لما الاذون و لابستلي عدسات و حاطه مسكره و شدو ؟ أظنتي يسمونه تبرّج .. صح ؟
3- صايم و تتمقل بالمشهدين و اللقطتين اللي قلنا عنهم قبل شوي ؟ لا تقول اهمه السبب .. اهمه عليهم اثم الفصاعه و انت عليك اثم الخز و انك ما غضيت بصرك
4- صايم و ترقم و تقز على البحر ؟ و لاحق بنات بالحب جنك ما تدري و قاعد تتمشى ! تقص على الناس اوكي .. و على الله شتسوي يا الدايخ ؟
5- صايم و تاخذ معاش بدون دوام ؟ لا اجازه ولا استئذان جنه الوزارة مالت اللي خلفوك .. شكو مو حاضر ؟ معنه الدوام خفيف و اقصر برمضان .. الله يهداك بس
6- صايمه و تحشّين بهذي و هذيج ؟ ترى الغيبه حرام .. و القرآن شبه اللي تغتاب باللي تاكل لحم انسان ميت ! و الله سبحانه ما يطق بعصى .. اليوم تحشين هني و باجر يحشون فيج هناك
7- صايمة و تتعمدين تتمخطرين على الممشى العصاري و قبل الفطور بشوي و انتي لابسه بنطلونات و برمودات تدرين انها تشكل جسمج و بديات (جمع بَدي) مطلعه شحومج و لحومج ؟
8- صايم و قاعد يم الممشى و ما عندك شغله و لا مشغلة الا انه تبحلق عويناتك بالرايحه و الراده على الخط و مسويلهم زووووم مو طبيعي ؟ يا اخي اقرالك صفحه من القرآن او كلش كلش نام .. نامت عليك العافيه و الديايه الحافيه
9- صايمين و طايحيله رضاع لما اذان الفير ؟ استحوا على ويوهكم .. قلنا عشّاق و تحبون بعض .. (تصبحين على خير حياتي) او ( .. تسحر عدل يا عمري) و خلااااص .. ليش نطولها و احنا بشهر فضيل ؟
10- صايم و تسهر بشيشه ؟ ندري انك حزتها فاطر .. بس بنفس الوقت اكو اوادم احسن منك يروكعون بمسيد و يصلون جيام و اكو ناس زايرين اهلهم من باب صلة الرحم و اكو بشر امبسطين ببيوتهم و مجابلين التلفزيون .. هذيله أهوَن بوايد من اللي طايحله معسل و قدو .. صح ولا انا غلطان ؟
11- صايم و تبلش فطورك على زقاره ؟ الرسول صلى الله عليه و سلم وصّانا على تمره و ماي .. و اكو ناس تفطر على لبن مثلاً .. و الناس العاده تدعي اول ما تفطر و تردد ورى الاذان .. زقاره يا الظالم ! لي هالدرجه سحيك يا السبندي
12- صايمه و نفسج خايسه و على طريف زين ما تطلع من خشمج على امج و خواتج و خدامتكم !؟ شنو متنسيه ولا يايتج الحاله ؟ .. اذا يوعانه او عطشانه قفلي على روحج الدار و جابلي المنظره لما يأذن المغرب
13- صايمه و رفيجتج يمج تتعلج بالسياره ؟ لا حيى و لا مستحى !! .. اذا انتي عادي عندج ترى الناس لهم احترام .. و شلون رفيجتج توري الصبيان انها فاطره و (...) عييييييب لي هالدرجه انحط مستوى بعض البنات ؟! صج ناس هيلق لا يستحون ولا ينتخون !!
14- صايم و داش الدوام و ريحه البخور واصله لي الخفجي ؟ تبخير الهدوم بروحها جايز بس ترى استنشاق البخور و تبخير الدشداشه و انت لابسها حرام على الصايم لانه يدش بالرئتين .. ماني مفتي الديار المقدسة بس هذا راي السنه و الشيعه .. مانقول تعال دوامك و ريحتك فايحه و معطنه ! بس تعطر او حط دهن عود مثلا بكمية معقولة
15- صايم و كله ماد بوزك جنك بعزى ؟! ابتسم يا اخي لانك مسوي شي زين و قاعد ينكتبلك اجر .. عاد لا تشق الحلج و الكشره شقاقيه جنك شيسمونها اللي على جبنه -لاباشكيري-.. بس خلك فرايحي و نفسيتك عال العال و اترك عنك التقلدم .. و سلملي على البوز
16- صيّام و نطرش ايميلات و مسجات وصخه ؟! قلة أدب .. بوقت ثاني بالطقاق اللي يطق ابليس .. بس برمضان لا عاد يصير الوضع من زفت لي ازفت .. مهي حاله ترى ! يه
17- صايم و معلي على الأغاني بالسكّة و انت تحوس بسيارتك بين الفرجان ؟! يبه اسمع دقدقة اذا تبي و عساك تصير دي جي .. بس خلها تالي مو بالوقت اللي الواحد ينفذ فيه أمر الله سبحانه.. و بعدين لا تسَمّع الناس غصب .. اسمع بروحك .. و على شينه قوات عينه تلقى الذوق مثل ويهه شغل البرتقاله و اللي من طقتها
18- صيّام و تبوقون ايميلات ؟ ليش تجذبون و تقولون انكم كاتبينها ؟ و انتوا بس شايلين ايميل الكاتب الأصلي و حاطين ايميلاتكم او مو حاطين شي .. حسد حسد يعل ابليسكم الواوي و الذيب اللي يعاوي
******
يالله .. نشوتكم على خير .. فمان الله يا الطيبين :)