السبت، يناير 08، 2005

Sixth : ! الو حوّل :D~


ملاحظة : هالكلام كتبته قبل سنين .. يعني عتيج الصوف يا جماعة الخير

...
السلام عليكم .. اشتقتولي ؟ (حد الدوسه ) انا الصراحة اشتقت مو لكم انما اشتقت حق الحجي الصريح الواضح اللي مافيه لف و دوران .. هممم .. قعدتنا اليوم بيدور الحجي فيها يا عيالي الحلوين (حبّابه الله يرحمها !) حول موضوع التليفونات .. عاد من كلمة التليفون أو المبايل أو الجوال أو النقال بيطلع ستين موضوع و موضوع بس أنا بحاول أحصر أهم الأشياء اللي تهمنا و تهمكم و تهم المجتمع ( حجي خطير ) و خلكم وياي مثل ما تعودنا بأسلوب النقاط .. وحده وحده

1- أول شي لازم نتذكر ان التليفون سواء كان مال البيت أو النقال اهو وسيلة مو هدف .. يعني اهو شي يوصل حق أشياء أهم مو اهو بحد ذاته غاية لنا .. و هني كل واحد يسأل نفسه : شحقه أستخدم التليفون ؟ ليش أدق منه ؟ شحقه أحطلي واحد ؟

2- النقطة هذي أربطها باللي قبلها .. ناس تحط تليفونات عشان الطوارئ بس مثل البنات اللي يحاتون بنجر السيارة أو انهم ما يدلون الطريج .. و ناس يحطون مبايل عشان الشغل و الدوام و الشركة و الموظفين و الأسهم و الصفقات .. و ناس يحطونه عشان التواصل الاجتماعي يعني اجيك على الاهل و العيال و الربع و الجماعة .. وكل الامثلة اللي طافت ممكن نقتنع فيها و نعتبرها ضرورات لا باس فيها .

3- أكو ناس ناس و أكو ناس مداس .. البعض يبون و للأسف النقال من باب التقليد (ليش حاطه؟ ما يدري) و ناس حاطينه من باب الكشخة (يعني شوفوا عندي كمنيوكيتر ييديد) و ناس يحطونه عشان اللعب و الوناسة (سنيك - جاتينج - مسجات ..) و ناس حق المغازللل !! و هذيله جنهم يراد من كثرهم يعلهم الماحي اللي يمحي أباليسهم .. :))

4- أتذكر أيام الجامعة (كلية التجارة اللي يسمونها الحين علوم ادارية) مرت يمنا وحدة و احنا قاعدين تحت النخل جنه بالبصرة و قاعدة تهذر بالتليفون و فجأة تررررن ولا التليفون يلعلع بأذونها !! أثاري أم السعف و الليف مو قاعدة تكلم أحد و ناسية تحطه سايلنت هيهيهي أشوة انها متحجبة ولا جان ما لقت تلثومة تغطي فيها ويها
:PpP

5- يبطون جبدي اللي لما ندش السينما يلعبون بنغمات التليفون .. يعني شوفوني ترى عندي سيرفس هني .. وايد عليك .. و طول الفلم يسمعنا كلامه : ألو حياتي أنا بالسينما اكلمج بعدين !! اي شي انت و حياتك البصوه

6- مد ريولك على قد الحافك .. اللي ماعنده بيزات شحقه يشتريله جهاز غالي و تصليحه لي اخترب يعور الظهر ؟! يا اخي اشترلك شي بسيط يأدي المهمة و يكون كد و مد و مو حساس و يتحمل الطيحات .. آخرتها تلقاه واقف يبي تأشيرة عند سوق شرق ولا راكبلة قرمبع قسطها أقل من سعر التليفون !!

7- المكالمات و ما ادراك ما المكالمات .. هذررررة و قرقةةةة و آخرتها الله يعين اللي بيدفع ! اذا الوالد او الوالدة فمال عمك ما يهمك للأسف ! و اذا انت بتدفع او انتي بتنقين من مصروفكم فهني الصلخة السنعة .. ترى كل شي زاد عن حده انقلب ضده و التوسط و الاعتدال بكل شي أمر مطلوب .. و القهر لما بنية تدفع حق رفيجها و اهي ما تدري انه يكلم غيرها !! اي كلام يا عبدالسلام

8- اكو ناس عليهم حركات مادري شلون قايلة .. يدق عليك رنة وحدة عشان تدق عليه و تصير المكالمة عليك انت ! اذا تليفونه كروت و ميزانيته صعبة اوكيييي ما قلنا شي بس اكو جعووص تلقاهم مريشين و يعطيك رنة وحدة خاصة اذا عرف انك تبيه بشي او تبي منه غرض معين .. يلدَه الله يهداه و الحزرة تقطر منه تقطير

9- انا رقمي حلو الصراحة و كلمن يتمنى نفسه .. بس شريته ابيزاتي و بعرأ جبيني على قولة المصاروة .. أما انه ايلي واحد زبوط النقعه ولا وحدة زعطوطة و تفضي مخابيها و تطير عياديها و تينن أهلها عشان رقم حلو فهذا شي مو منطقي خاااااصة حق البنات .. شكو تشترين رقم ذهبي و تخلين المعقدة يدقون عليج : الغالية رقمج للبيع ؟ و شيفكج منهم عاد !! احطلي رقم زوين و لا باس فيه و كان الله غفورا رحيما

10- ترى مايصير ندق على بيوت العالم و نقول : ألو من معاي ؟! .. انت اللي داااااق و المفروض انك انت اللي تعرف بنفسك أول شي أو انك تطلب شخص معين .. تحقيق ؟

11- اللي يدق المفروض يبدي بسلام و ترحيب مو سيدة : ألو ممكن اكلم فلانة ؟ ألو شصار على موضوعنا ؟ عيب عيب ترى الذرابة زينة ..

12- يبط جبدي واحد من ربع أخوي .. كل مايدق و يسأل عنه و نقوله : لا و الله مو موجود .. يسد الخط طوط طوط طوط بدون شكرا ولا ثانكس ولا فمان الله .. وين السنع ؟!؟

13- آآخ يا المسجات .. أشكال و أرناق .. اهي نكت و اهي أغاني و اهي صور و اهي رنات و للأسف أغلبها ملاقة و حجي فاضي .. بس حتى لا نظلم الكل ترى أكو شغلات طيبة و تعجب الواحد مثل الأدعية أو النكت الييديدة أو ... أصابع ايدك مو سوى


14- ليش بعض الناس يدقون عليك و يحولونه بيجر ؟ أو يدقون و يخلونه مسج ؟ أو يدق و لما تتصل عليه بعد شوي مايرد عليك ؟ الصبر زين ترى ..

15- يسولفولي عن وحدة نسرة و نحيسة و لسانها أطول من جسر بوبيان تتعمد تدق على رفيجاتها من تليفون البيت و تسوي جاي الضحى و جاي المغرب و جاي نص الليل بالتليفون على حساب المسيجينة اللي ردت عليها .. لو انا جان سديته بويها و قلتلها تالي : سوري بس الشحن خلص .. من له حيلة فليحتال ..

16- يا بنات .. الرقم الغريب لا تردون عليه ترى جليلين الأصل و الهيلق زايدين هاليومين و بس يسمع حس بنية اضربت العدادات عنده و اشتغل عليها تليفونات و مسجات و سيدة يقولها احبج !! حبه برص أيرب شلون يحبها من صوتها ؟ مالت عليه يعطي بحة بصوته يعني منهم:)) و اهو جنه قملة مقصوعة ..

17- اذا أحد أذاج سيدة قولي حق اهلج .. ترى العقد لما ما اتييهم العين الحمرة يتمادون و يقولون : ايه هذي مستانسة ولا جان خلت ابوها او اخوها يزفني ..

18- ديري بالج تكلمين صبي بحجي خاص حتى لو شوية ترى يسجلون اصواتكم و يهددونكم فيها بعدين .. و ترى صارت هالسوالف و تشرشحوا بنات بسبتها ..

19- اكو ناس مقصة و نوعية تنتشر بين البنات خاصة .. بس يرقمها مغازلجي بالسوق او بالنت تروح تجيك على صاحب الرقم من ديسك الاتصالات مسكيييييييينه ترى نص الارقام مو بأسامي أصحابها .. ارقام انباعت و ارقام تبدلت و ناس تزور و ناس تسجله بأسامي غيرها و طحيحة يشترون من كبارية عشان يبقى الاسم القوي بالديسك و ما يتغير !! شي مو طبيعي اللي صاير


20- اعرف واحد سوى جريمة بمصبنجي شكل على تليفون اخته لووووول صج حمش .. دق على العقيدي و شرشحه و قاله بتندم لي دقيت او دزيت شي .. قام المغازلجي عقب يومين و هم دز مسج حق البنية .. جان يقوم اخوها و ياخذ رقم العقيدي و يدش العرب جات بأوصخ الجنلات و انتوا بكرامة و يوزعه : (يا جماعة هذا رقم فلبينية رايحة فيها دقوا عليها لوووووووووول) .. الصراحة دقة خطيرة و ما اشجع عليها بس اتصور ان المغازلجي حرم يرقم و باع رقمه اللي مثل ويهه هيهي

21- وحدة انزعجت من واحد كبر ابوها .. جان تقول حق امها و كلموا الداخلية و الاتصالات و يابوا الريال و هزؤووووه .. شسوت عليه تمرمط جدام خلق الله ؟! ناس كل ما تكبر تدبر

22- عيب نشبك الخطوط و نخلي الناس تتسمع على بعضها .. عدل ولا أنا غلطان ؟

23- لما تشوف عند غيرك خط ثاني ليش تشكل عليه ؟ أكو ناس مزعجين بشكل مو طبيعي .. شوي شوي علينا يبه مانقدر نكلم اثنين بوقت واحد ..




في النهاية نقولكم (مشكورين) على المتابعة و نعتذر عن الطوالة و نلتقي مستقبلا انشالله بحلقات ثانية و مواضيع غير .. عندي حجي بس جني مصختها !! فمان الله


هناك 30 تعليقًا:

Antania يقول...

wanasaaaaa :)
lel7eeen 3aysheeen al kuwaitieen walla

eb9ara7a يقول...

ليش انهم يتحلطمون ؟ مو التحلطم علامة مسجلة للكويتيين من سنة الهدامة لي هالحزة :)

و عساهم ما ينقرضون مثل ما صار بالديناصورات و تالي يسوولهم جوراسيك بارك :(

tasty_as_berry يقول...

يعطيك العافية :)

والله التلفون في منافع ومضار ... وانا حاليا ما اقدر استغنى عنه صج تعودت عليه :)

تحياتي ،،

Tattas يقول...

Tha7aktny wallah .. your points are very true :D

eb9ara7a يقول...

خوش .. دوم تضحكين انشالله :))
..
Me and My Mobile مقالي له علاقة بهالعنوان .. صح ؟

Tattas يقول...

yes , it is some how related to it .. but in my post I'm talking about 3elaqti eb my mobile o ta'atheera 3ala my daily life :)

eb9ara7a يقول...

اي أدري .. قريتها :)
و ترى الغالبية بهالزمن مثلج .. و مثلي !
صار الموبايل او الجوال او النقال شي أساسي حيل .. لي درجة انه الواحد يطق درب رجعة لي البيت بس لانه نسى جهازه و مستحيل يطلع بدونه
..
اهو مثل القلاص .. ممكن تشربين فيه دوا او ماي .. و ممكن غيرج يشرب فيه سم او وسكي !

Tattas يقول...

Exactly !

W. يقول...

LOOOOOOL

I loveeddd the post!! 6ayb so2al.. welli tjeehom mokalamaat men 3aseer wel g9eem yboon 6air shalwa wsh ysawooon!?!!?!

eb9ara7a يقول...

W.
I don't know ! cause am not from KSA
بس احنا عندنا وضع مشابه مع اختلاف في المناطق .. هني تييج مكالمات من الجهره و الصليبية و منطقه ينقالها .. ام الهيمان :P
..
by the way , ana zert 3aseer o abha wayed .. belPast leb3eeed 6ab3an ;)

W. يقول...

اهلين...
سؤال،،، ليش رحت لعسير و وش اللي هججك منها؟ ترى هناك لين عرضوا عليك بناتهم لا ترتاع! تراهم يحفون فييييييييييك وطايرين فيييييييييييييييييك!!! انا شخصيا ما قد رحت..حدي الرياض ورماح والصمان بالمواسم


وبعدين وشلون معاكساتكم؟ اللي من القصيم مساكين والله دايم يزهمون علي ويحسبونني واحد اسمه عبدالله الفلاني (الاسم العائلي بعد تطابق) كرهوني بنفسي! ومرة واحد اتصل من الخارج وانا رديت "نعم...

الو....عبدالله الفلاني

((وين لو اني مشفطة دخان من يومني بزر - موووووووب صااااااااحييييي!

لا ياخوي غلطان

اوه متآسف.. بس هذا رقم عبدالله الفلاني؟

((يعني لو رقمه بستخف دمي وارد مثلا؟؟؟ يا شين اللي يتمييييلح

لا ياخوي هذا رقمي... مع السلامة - طرخ وسكرت الخظ

الا الاخ يدق...قلت خير؟ رديت عليه "نعم؟

"ورى تقفلين بوجهي ياللي ما تستحين؟

((لا هذا مبيت نية التحرش)) قمت و *طرخخخخخخخخخخ

ولا هو متصل مرة ثانية؟ هو هو هو.. وش يبي؟؟؟؟؟

المهم.. سفهته والا استلمني مسجات لييييييييين ما انتفخ الجوال،،، والله ان فهالدنيا اشكال تنعااااااااف

eb9ara7a يقول...

W.
LOOOOL ترى حجيكم عجيب حد الدوسه :))
..
اي و الله يبتيها رَيت !! مرة من المرات بغوا يزوجون ثنتين من بناتهم حق اثنين من ربعي العزوبيه :PpP
..
و من قال اني هجّيت منها ؟ المكان روعه مقارنه بمناطق الخليج الثانيه .. انا اتكلم عن الطبيعه .. و هم صلاله يوم رحتها اكتشفت انها نفس الطقة :)
..
الله يعين البنات على هاللي يتحرشون ! اكو نماين تلزق بالوحده لزقه عنزروت .. بس انتي على قولتج طرخ او طرباخ ولا تفتحين مجال :)

W. يقول...

والله مدحولي صلالة ودي اشوفها


وبالنسبة لحكينا.. احلى شئ لين سمعت عجايز الرياض...والله احلى من طاش ما طاش

eb9ara7a يقول...

W.
لا روحي شوفيها .. ترى حلوة مرة :P
ميزتها انها جبال و شبه غابات و بنفس الوقت قريبه من المحيط الهندي .. فيها ناريل -يوز هند- و مصانع الحلوة العمانيه غير المسقطيه
بس ترى ها .. انا مريتها منزمان بسنة الف و تسعمية و احطبه .. يعني يجوز انها تغيرت
..
طاش ما طاش بدعوا .. و كل حلقة يستلمون لهجة .. نوبه حجازية و نوبه بدو و نوبه ... الخ

W. يقول...

عجبتني ناريل ;p


inshalla I'll go on my honeymoon

eb9ara7a يقول...

W.
LOL ! لا لا .. عاد مو لي هالدرجة المكان زقرتي و يونس :))
..
معنه اغلب رياييل المستقبل بيفكرون بالمصاريف .. سيده بيقولج : صلالة ؟ افا عليج بس .. ما طلبتي شي
جك بك ولا انتي معاه بالجمس و جناطكم فوق السلة :P

W. يقول...

LOOOOOOOOOOOOOOOOOOOOL

NOOOOO WAAAAAAAAAAAAAY..

والله موب شوفة نفس على الجموس،، بس منيب "شادة الرحال" على (الله واكبر اللي يسمع يقول المالديف) على صلالة.. معليش والله ما اقصد الاهانة بس كم اون يعني وي ار توكنج ابوت الهني مون! صلالة وش زينها بالاجازة السبوعية.. اصلا مير كل مدن الخليج حدنا ويك اند ويخب بعد

eb9ara7a يقول...

W.
LOL .. I know I know
معني اعرف واحد اتفق مع مرته على شهر عسل بمكه !! ماشالله عليه و عليها .. صج انه مكان عبادة بس اهو يقول انها وايد استحسنت الفكره .. و سووها من صجهم
و على قولتج ، الخليج مال ويك اند و سلامتك و تعيش .. شهر العسل يبي مكان هادي و صخّة و ما فيه اي شي يخرب خصوصية هالايام
..
يمدحون الطايف :P

W. يقول...

LOOOL

you know something, we used to spend our summer in Taif (ayyam 3ezzha) but I wouldn't go there right now its GHOST TOWN!

eb9ara7a يقول...

w.
LOL .. me 2 , long long time 6ab3an .. o bas Once hehe :P
شحقه تغيرت ؟ الناس تتحسن و تتطور مو تتردى و تنتكس
لا طاحت عليها قنبلة ذريه ولا حاشها زلزال لا سمح الله
و تبقى جدة غير ;)

W. يقول...

NOWAAAAAAAAAAAAAAAY

I was born and grew up in Jeddah,, lakin I will forever love Riyadh. Everyone who hates it doesn't really know it well.. Riyadh is only appreciated by ahalha..

I LOVE RIYAAAAAAAADHHHHH

Jeddah is nice.. I used to love it but now I hate it soo much.. its soo confusing and its sooo crowded and sooo NASTY during the summer (riyadh is worse, but elfarg hena inni a7b ilryath LOL)

as far as Taif is concerned.. ayyam 3ez iltaif was during the reign of King Faisal and King Khaled Allah yr7amhom..

eb9ara7a يقول...

W.
اهل مكة ادرى بشعابها .. كلامج ادق و أصح من كلامي .. بس هم انا مفتر السعودية من شمالها لي جنوبها و من شرقها لي غربها
جده الرياض الدمام الخبر الجبيل عسير أبها و طبعا مكة المكرمة و المدينة المنورة
..
و انتي لي هالدرجه عيوز ؟ شدراج بالطايف و شلون قايله أيام الله يرحمه الملك فيصل و الملك خالد ؟!؟ :PpP

W. يقول...

اسمع اهلي يقولون وابي ابين نفسي (يقالك - بالشدة على اللام) اني اعرف

:p

eb9ara7a يقول...

W.
LOL قمت أشك فيج ! شكلج لاحقة على ذيج الأيام المغبرة و ما زلتي عايشه .. و السر انج من نفس فصيلة اللي بيمرونا يوم من الأيام :P

W. يقول...

LOOOOOOOOOOOOOL

لاااااااااااا والله توني فريعان شبابي حرام عليك لا تقول كذا ترى فيه بعض الناس ما يصدقون على الله

;ppp

غير معرف يقول...

كلامك صحيح أخوي
100%
والله الدنيا
صايره حاله

eb9ara7a يقول...

صح ابدنك

شكراً على الزياره
:)

غير معرف يقول...

Enjoyed a lot! Crest white strips wallmart Samples of air fresheners Oakland pilates history of acro dance Comprar meridia barato Sumitomo tire meridia free what is venlafaxine Viper software blackjack ballroom Discount meridia order online Online tenuate order online

غير معرف يقول...

Looking for information and found it at this great site... »

mahmoud يقول...

مجهود رائع

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير