الثلاثاء، أكتوبر 04، 2005

تَقَبَّل الله صياَمكُم و طاَعتكُم

































هَل علينا شهر الخير و البركة
و عساكم جميعاً تعودونه كل سنه
و يا رب تتقبل الطاعات و الصيام و الجيام
و كل عام و انتوا بخير و صحة و سلامة يا محفوظين السلامة
اليوم -الأربعه- يبدي رمضان عندنا بتركيا .. و الجماعة مضبطينه بالرزنامة هالسنة على أساس إنَّ 29 يوم
و آخر جم يوم برمضان بيتغير التوقيت ساعة كاملة لأن التوقيت الشتوي بيبلش عندهم
***
ناوي أرجع الديرة خلال جم يوم .. و بتم فيها لما عقب العيد بيوم يومين إنشالله
ما أظن إني بدش النت خلال قعدتي بالكويت إلا حق إيميل الدوام
أحاول إني أتطمش على بلوقات الشباب و الخوات إذا لقيتلي فجّة
***
أستغرب من بعض اللي يتحجون عن الديمقراطية و الحرية و الليبرالية و الإنفتاح .. و اهمه أكثر ناس يوقفون ضدها إذا خالفت الآراء و الظروف هواهم و قناعاتهم
و اللي على راسه بطحه .. يحسس عليها
يعني : اللبيبُ بالإشارةِ يفهمُ
***
Georges Braque
رسام فرنسي مشهور من طقّة بيكاسو بس أغلب لوحاته إنباقت بالحرب العالمية من قبل النازيين .. له لوحة يملكها كويتي و يُعتقَد إنها إنباقت أثناء الغزو العراقي الغاشم للكويت .. اللوحة ماهي واضحة بس فيها طير أو يمكن طيارة .. اللي عنده فكره عن راعيها خل يخبرني يا جماعة الخير يمكن نقدر نساعده بشي
***
كتبت مقالة أو بالأصح إيميل كوميدي ! قبل جم سنة بعنوان : صيام آخر زمن !! و سبق إني نشرتها بمدونتي هذي منزمان
و ودي إني أرزها هني كتعبير عن واقع الحال المتكرر خلال كل رمضان .. للأسف
***
شباب و بنات .. مبارك عليكم الشهر .. و بدون القرقة المعتادة بدْفر على الموضوع
ترى رمضان يا جماعة الخير ماهو بس تسكيرة حلج من فير الله لما أذان المغرب ! الصيام سَنَع و أخلاق و احساس داخلي و قناعه تامّة بأنه هذا شهر مقدس عندنا كمسلمين .. ندري ان السنه كلها عبادة و صلاة ، لكن هالشهر الفضيل له خصوصية اكثر يا الربع .. خلكم مع هالجم بند .. عالطّاير ;)
1- صايمه و تلبس مرصص لي درجة ان أي بنية تقدر تعرف تفاصيل جسمها و مقاساتها كلها !؟! و ترى اكو متحجبات تنانيرهم ألعن من جينزات البنات السفور
2- صايمه و تارسه الويه مكياج و الحمره جنها كجب و الكحل لما الاذون و لابستلي عدسات و حاطه مسكره و شدو ؟ أظنتي يسمونه تبرّج .. صح ؟
3- صايم و تتمقل بالمشهدين و اللقطتين اللي قلنا عنهم قبل شوي ؟ لا تقول اهمه السبب .. اهمه عليهم اثم الفصاعه و انت عليك اثم الخز و انك ما غضيت بصرك
4- صايم و ترقم و تقز على البحر ؟ و لاحق بنات بالحب جنك ما تدري و قاعد تتمشى ! تقص على الناس اوكي .. و على الله شتسوي يا الدايخ ؟
5- صايم و تاخذ معاش بدون دوام ؟ لا اجازه ولا استئذان جنه الوزارة مالت اللي خلفوك .. شكو مو حاضر ؟ معنه الدوام خفيف و اقصر برمضان .. الله يهداك بس
6- صايمه و تحشّين بهذي و هذيج ؟ ترى الغيبه حرام .. و القرآن شبه اللي تغتاب باللي تاكل لحم انسان ميت ! و الله سبحانه ما يطق بعصى .. اليوم تحشين هني و باجر يحشون فيج هناك
7- صايمة و تتعمدين تتمخطرين على الممشى العصاري و قبل الفطور بشوي و انتي لابسه بنطلونات و برمودات تدرين انها تشكل جسمج و بديات (جمع بَدي) مطلعه شحومج و لحومج ؟
8- صايم و قاعد يم الممشى و ما عندك شغله و لا مشغلة الا انه تبحلق عويناتك بالرايحه و الراده على الخط و مسويلهم زووووم مو طبيعي ؟ يا اخي اقرالك صفحه من القرآن او كلش كلش نام .. نامت عليك العافيه و الديايه الحافيه
9- صايمين و طايحيله رضاع لما اذان الفير ؟ استحوا على ويوهكم .. قلنا عشّاق و تحبون بعض .. (تصبحين على خير حياتي) او ( .. تسحر عدل يا عمري) و خلااااص .. ليش نطولها و احنا بشهر فضيل ؟
10- صايم و تسهر بشيشه ؟ ندري انك حزتها فاطر .. بس بنفس الوقت اكو اوادم احسن منك يروكعون بمسيد و يصلون جيام و اكو ناس زايرين اهلهم من باب صلة الرحم و اكو بشر امبسطين ببيوتهم و مجابلين التلفزيون .. هذيله أهوَن بوايد من اللي طايحله معسل و قدو .. صح ولا انا غلطان ؟
11- صايم و تبلش فطورك على زقاره ؟ الرسول صلى الله عليه و سلم وصّانا على تمره و ماي .. و اكو ناس تفطر على لبن مثلاً .. و الناس العاده تدعي اول ما تفطر و تردد ورى الاذان .. زقاره يا الظالم ! لي هالدرجه سحيك يا السبندي
12- صايمه و نفسج خايسه و على طريف زين ما تطلع من خشمج على امج و خواتج و خدامتكم !؟ شنو متنسيه ولا يايتج الحاله ؟ .. اذا يوعانه او عطشانه قفلي على روحج الدار و جابلي المنظره لما يأذن المغرب
13- صايمه و رفيجتج يمج تتعلج بالسياره ؟ لا حيى و لا مستحى !! .. اذا انتي عادي عندج ترى الناس لهم احترام .. و شلون رفيجتج توري الصبيان انها فاطره و (...) عييييييب لي هالدرجه انحط مستوى بعض البنات ؟! صج ناس هيلق لا يستحون ولا ينتخون !!
14- صايم و داش الدوام و ريحه البخور واصله لي الخفجي ؟ تبخير الهدوم بروحها جايز بس ترى استنشاق البخور و تبخير الدشداشه و انت لابسها حرام على الصايم لانه يدش بالرئتين .. ماني مفتي الديار المقدسة بس هذا راي السنه و الشيعه .. مانقول تعال دوامك و ريحتك فايحه و معطنه ! بس تعطر او حط دهن عود مثلا بكمية معقولة
15- صايم و كله ماد بوزك جنك بعزى ؟! ابتسم يا اخي لانك مسوي شي زين و قاعد ينكتبلك اجر .. عاد لا تشق الحلج و الكشره شقاقيه جنك شيسمونها اللي على جبنه -لاباشكيري-.. بس خلك فرايحي و نفسيتك عال العال و اترك عنك التقلدم .. و سلملي على البوز
16- صيّام و نطرش ايميلات و مسجات وصخه ؟! قلة أدب .. بوقت ثاني بالطقاق اللي يطق ابليس .. بس برمضان لا عاد يصير الوضع من زفت لي ازفت .. مهي حاله ترى ! يه
17- صايم و معلي على الأغاني بالسكّة و انت تحوس بسيارتك بين الفرجان ؟! يبه اسمع دقدقة اذا تبي و عساك تصير دي جي .. بس خلها تالي مو بالوقت اللي الواحد ينفذ فيه أمر الله سبحانه.. و بعدين لا تسَمّع الناس غصب .. اسمع بروحك .. و على شينه قوات عينه تلقى الذوق مثل ويهه شغل البرتقاله و اللي من طقتها
18- صيّام و تبوقون ايميلات ؟ ليش تجذبون و تقولون انكم كاتبينها ؟ و انتوا بس شايلين ايميل الكاتب الأصلي و حاطين ايميلاتكم او مو حاطين شي .. حسد حسد يعل ابليسكم الواوي و الذيب اللي يعاوي
******
يالله .. نشوتكم على خير .. فمان الله يا الطيبين :)

هناك 36 تعليقًا:

Ra-1 يقول...

ناطرينك :)

True Faith يقول...

كل عام و إنت بخير

و تقبل الله منك إنشاالله

chatterbox يقول...

بس نسيت الناس اللي المفروض مسلمين بس مايعترفون برمضان ويطبخون غدا وعشا كل يوم ولاجنه الناس صايمة لا والمشكلة بعد انهم يروحون المسجد يصلون مع الناس!!! واذا سألتهم يقولون اصلا احنا مو مقتنعين بسالفة الصيام هذي!!!!وعذرهم ان في ناس مسلمين(بنات) بس مو متحجبين يعني كل واحد ينقي اللي عاجبه بالدين ويسويه والباجي يقطه عادي

LiTTLE BiG يقول...

مبارك عليك الشهر
:)


" يعل ابليسكم الواوي و الذيب اللي يعاوي "
عجيبة هالجملة
:p

johnwoolkerjwo يقول...

بسم الله الرحمن الرحيم
السلام عليكم ورحمة الله وبركاته

eb9ara7a

منا ومنك صالح الأعمال إن شاء الله ، تيي وتروح بألف خير

بالنسبه للحريه والديمقراطيه .. من وجهة نظري الشخصيه أنها نقيض للإسلاميه فليس لوجود الحريه بحق العباده بغير الله ولا للديمقراطيه بإختيار حاكم يحكم ( يحكم ) غير بما أنزل الله ، فالحريه أن أطلق العنان لفكري والتأمل من محيطي بلا قيود دينيه أو سياسيه أو إقتصاديه أو إجتماعيه بشرط ألا أتعدى على غيري لأجل ممارسة حريته ، أما الديمقراطيه وهي تحكم بحكم الأغلبيه لا الأقليه على أن يتقبل هؤلاء الأقليه هذا الحكم بصدر رحب مع ممارسة الحريه

بكل شفافايه ووضوح .. إن ما قرأته أو إستمعته أنت لمن يدعي الليبراليه .. هو ليس ليبرالي الفكر ، فكثيرا ما نصادف دعاة العلمانيه وهم أبعد ما يكونو عن هذا الفكر بتقبل ما يزيد الإنحطاط للأمه العربيه ، ولكل ما هنالك أن هؤلاء يدعون الليبراليه والعلمانيه وتجدهم يدعون الإلحاديه لأجل الإطاحه بخصومهم .. كالتقاذف المذهبي أو الديني أو حتى الإقتصادي لأجل الوصول للمكسب السريع

قد ( قد ) أكون ليبراليا لكنني لست ضد العقيده التي أوجدها الله لنا وكما أن لكل شريعه أحكام وقوانين وجب مني الإلتزام بعدم إهانتها ، وقد ( قد ) أكون إسلاميا لكنني لست أحد أدوات التنوين .. التي تتخذ شكلا حسب أهوائها ، عموما أنت تعيش مؤقتا بالدوله العلمانيه ولك أن تطرح بمقال آخر الفرق بين العلمانيه الحقيقيه التي أتى بها الغرب والخاليه من الشوائب .. والعلمانيه العربيه التي خلطت الحابل بالنابل فبتنا لا نعرف من هو المتستر ومن هو العلماني .. وأخيرا تشكيكهم بأحاديث نبينا ورسول الله - صلى الله عليه وسلم

مع ملاحظة : أن هناك شتان ما بين الليبراليه والعلمانيه .. فالليبراليه تدعو لحرية الفكر والإعتقاد والرأي ، أما العلمانيه فإنها تفصل المدنيه عن الأحكام الدينيه كمثال : الحكم على السارق بالسجن أو الغرامه دون قطع يده وهكذا لباقي الأمور

ومن له رأي آخر ويعتقد أن ما سطرته أناملي مناقضا للحقيقه ، أوجب له مناقشتي

ملاحظه : تم تحديث هذا التعليق مرتين إثنتين

والسلام عليكم ورحمة الله وبركاته
والسلام عليكم ورحمة الله وبركاته

شرقاوي يقول...

الصراحة

مبارك عليكم الشهر

eb9ara7a يقول...

Ra.1
ok .. :P
..

T.F
و انتي بخير و صحة و سلامه
و الله يتقبل منا و منكم

eb9ara7a يقول...

C.B
الناس اجناس
للأسف اكو نماين بمجتمعنا مثل اللي تفضلتوا فيها

الله يهدي الجميع
..

L.B
:P
علينا و عليج حجيه

eb9ara7a يقول...

أمان
:)
صدقت بأغلب كلامك
شكراً على الاضافة

قد يأتي المجال لنقاش أعمق و أكثر تفصيل

تحياتي لك
..

شرقاوي
هلا بأهل شرق
و هم انت .. مبارك عليك الشهر الفضيل

~ se3loah ~ يقول...

تشوتنا؟؟
وش دعوه ؟ :P

مبارك عليك الشهر عيب والله كان ودي ابارك من زمان بس موقع بلوقر انحجب عندنا بالسعوديه يومين وفتحوه
الظاهر من كثر ما ازعجتهم :P

ودي اعلق على كل نقطه من كلامك
احسك جبتها على الجرح
وسالفه العلك والله هينه عند اللي تطلع الظهر من الجامعه وتروح تتغدى بالفنادق

والاغاني يا كثرهم اللي تلعلع من اخر الدنيا ولا كأنهم برمضان

الله يرحم الحال والله شي يضيق الخلق
والواحد قام يخاف من عقوبة الله
:)

BLaSha يقول...

o aham shai elli y9moon o 7alt-hom 7ala bs may9sloon :s

o mbarak 3leak eshahar :D

eb9ara7a يقول...

Se3loah
الوحيده اللي صدتي الشوته
:P
و سالفه الفنادق هذي اول مره اسمع عنها ! عندكم و عندنا خير يا بنت الحلال
!
..

Blasha :)
اي و الله ! نفس اللي يركب تايرين بس تايرين اثنين حق سيارته
!
مع فرق التشبيه طبعاً

و مبارك عليك الشهر حجيه

Brava Valentia يقول...

توصل الكويت بالسلامه انشاءالله
رمضان بالكويت طعمه غير

وعساك من عوادة

ray يقول...

:) مبارك عليك الشهر

خووش بوست

بس شنو يعني سبندي ؟

ray يقول...

على فكرة هالفنان مو طبيعية لوحاته , من التعبيريين الفرنسيين و الرسامين التكعيبيين

french fauvist + cubist

اللوحة , مو اهيا اللي فيها 3 طيور ؟ و لونها رمادي و أبيض ؟

eb9ara7a يقول...

M.C :)
الله يسلمج و يخليج
اي و الله طعمه غير نمونه
و عساج تعودينه كل سنه
..

Ray :D
LOL
سبندي يُقصد فيها الشخص السيء أو الهتلي أو اللوتي و ربما أكثر من ذلك
!
أصل الكلمة فصيح يرجع للغه العربية

و اللوحه اللي سولفتي عنها مو اهي اللي مبيوقه .. بس ترى اهو عنده وايد من هالنماين اللي فيها طيور
:)

Enter-Q8 يقول...

حا تنور بلدك يا ريس
بذمتك ما اشتقت
حق الربع لما كل واحد يقول وين يصلي التراويح او وين بيصلي الجيام

يازين الكويت ويازين اهلها

قاعد احرك علشان توله على الليقمات
وترد لديرتك بالسلامة

ray يقول...

عُلِم :)

معلومة يديدة , أول مرة أسمع عن هالكلمة

نون النساء يقول...

أهم شي الشووته اللي اخر شي

تشوتنا على خير هاا ؟؟؟


ههههههههههه


وتنور ديرتك واهلك ماكو احلى من ارمضان بين الأهل

eb9ara7a يقول...

Enter-Q8 :s
اي و الله حريتني
الغربه ماهي هينه لو كان كلشي متوفر عندك

و ترى الديره منوره بأهلها .. و انت منهم يا بو وليد
..

Ray :)
اي نعم .. حاضرين للطيبين
..

نووون
LOL
:))
لا ترى خفيفه مو فنقر !

و مشكوره على زرقتج علينا

الطارق يقول...

علينا وعليك يتبارك هالشهر الفضيل ، وترجع بالسلامه ، بس شقاعد تسوي بتركيا هالحزة والناس بدت دواماتها ؟! ، واكثر من مره اشوفك تتكلم عنها اسمحلي ما ادري شالسالفه ، وهم اسمحلي على السؤال :)

بلـقـيس يقول...

للصعوبة والبطيء اللي انا قريت بيهم التدوينة...كان لازم اعلق..ما ينفعش بعد لما اقرا كل دا ما اعلقش
.................
شهر مبارك عليك

Enter-Q8 يقول...

http://www.alqabas.com.kw/magazine_details.php?id=28990

اي اشعليه طلع اسموه بالقبس خوش أشاده بمقالتك وتستاهل

~ se3loah ~ يقول...

والله والله
وصرنا مشهورين
انا اقول ما صاروا يكتبون اصلا الظاهر جاهم غرور اخر زمن
:p

مبروك على هالمقاله بالجريده

Enter-Q8 يقول...

http://www.alqabas.com.kw/magazine_details.php?id=29029

اديله يا عبدالعال
اب ديت الجزء الثاني

تستاهل عمو وقلم يستاهل متابعته

الا اللحين انت على عدم دخولك البلوج شكلك بالكويت صح والا لأ
وزير السياحة السابق
اخوك
حاكي عقالي

شفتي اشلون يا نورا الواحد لما يطلع من الوزارة محد يدري عنه

i_live_in_Q8 يقول...

كل عام وانت بألف خير
ذكر ان الذكرى تنفع المؤمنين

Ra-1 يقول...

EnterQ8 ...
yes he is in Kuwait!
gelt la yeshteree eljareeda o shafha mashkooor :)

~ se3loah ~ يقول...

ايه انت ارجع لديرتك واهلك
بس مو كذا عاد ما تكتب شي

وش دعوه ماخذ عطله حتى من البلوق

تراي بديت افكر احط اعلان بالجرايد
مفقوود!!!

eb9ara7a يقول...

الطارق :)
الله يعطيك العافيه
لا سياحه ولا دراسه .. بزنس يا باشا
..

بلقيس
الله يباركلج الشهر و العيد فوقه

شكراً على زيارتج الاولى
:D
..

Enter-Q8 :))
هلا هلا بو وليد
مشكور وايد على التنبيه .. لاني ماكنت ادري عن القبس ولا اللي فيها

و على البركه .. منك المال و منها العيال .. ولا اشاعات يا معالي الوزير ؟
:P

eb9ara7a يقول...

Se3lowah
LOL
اهلا اهلا .. عفواً من حضرتج ؟
الحين ما اكلم الا عماد الدين أديب و نجيب محفوظ و فهمي هويدي و الدكتور عبدالله النفيسي
:P
..

i-live-in-Q8 :)
و انت بخير و صحة و سلامه
يزاك الله خير حجي
..

Ra.1 :P
عاش من شافكم

~ se3loah ~ يقول...

سويت لك تاق
:))

chatterbox يقول...

shof tra n6rna wayeeeeed o le9br 7dod looool
meta y3ney????na6reenek

eb9ara7a يقول...

Se3lowah :))
thank you sister
قريته .. و هم غيرج سوولي بس مو قادر ارد
يمكن لما ارجع تركيا
شكرا
..

C.B :D
LOL
كل هذا عشان العيادي ؟
مشكورين على التواصل .. و انشالله نتشاوف هني قريباً

chatterbox يقول...

looooool
la2 mo 3shan el3yadee :)

غير معرف يقول...

Very cool design! Useful information. Go on! »

mahmoud يقول...

مجهود رائع

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير