الأربعاء، يناير 05، 2005

Fifth : شنهو نوع حجابج ؟ :PpP

السلام عليكم و رحمة الله و بركاته .. أتمنى ان الجميع بخير و بصحة و عافية .. أدري اشتقتولي -حدي ثقة- و هذي اهي وقفتنا الخامسة ضمن سلسلة المغامرين الخمسة -يملقك- قصدي سلسلة -الصراحة راحة- و يمكن الوقفة هذي ماهي بالمستوى المطلوب -يعني متواضع- بس ترى الموضوع اللي فيها مع انه يضحك الا انه شديد الاهمية - اتعب على الأسلوب .. خلكم معاي سواء كنتوا بنات أو شباب لانه يخصكم و يخص اللي حولكم

الحجاب .. أشكال و أرناق

ترى الحجاب يا جماعة القصد منه الستر .. و الهدف منه صون المرة و حفظها .. و الالتزام فيه ينبع من الدين و الأخلاق .. و معني أحث عليه بشدة الا أن البنية السفور مو معناته انها سكة -سوري على الكلمة- خاصة انه في من اهلنا متحجبات و في تنتة أو كشف .. و لا يعني ان المتحجبة اهي لازم تكون دايما ذيج السنعة الزينة اللي ما منها قصور .. الحجاب مبدأ و شرع مو مجرد مظهر .. و ترى الناس أجناس مثل ما قلنا أكو متحجبات يفشلون و تصرفاتهم وخزياه منها و بعضهم تلقى لبسهم يكشف أكثر مما يستر في مقابل أن أكو بنات كشيشهم قايمة ولاهم متحجبات الا انهم تكانة و لبسهم مقبول و مرتب بدون تفصخ و تلزق .. هممم جني كثرت القرقة ؟ خلكم معاي الحين مع بعض أنواع الحجابات أو الأحجبة أو الحجايب أو اللي يصير

1- الحجاب الاسلامي .. مو معناته ان غيره احجاب مسيحي ولا بوذي .. بس يسمونه جذي لأسباب البنات أخبر فيها مني .. و غالبا يكون أبيض و بنات الائتلافية الله يحفظهم يلبسونه غالبا :)))

2- حجاب بو ربطة مكشوفة .. اللي يصير من تحت جنه كرفتة و غالبا السوريات و الفلسطينيات يستخدمونه .. زين و ساتر بس يكبر البنية وايد

3- حجاب بو ربطة مخشوشة .. هم خوش حجاب ترى و تصير العقدة تحت الحنج امبينه بس الكرفتة تحت العباة أو البالطو .

4- حجاب بو حنج .. اللي يستخدمونه الشيعة غالبا .. عندهم معتقد أن الحنج يدخل ضمن الرقبة و هذا شي لازم يتغطى .. أختلف معاهم بالراي بس هم أحترم حريتهم في الشي هذا .

5- حجاب المغصوبة .. ماله شكل معين بس تلقى البنية مجبورة انها تتحجب أو أهلها عسرين أو انها خفيفة و اخوانها مغطينها غصب - زين يسوون فيها - و راعية هالحجاب غالبا يكون لبسها مو محتشم و تلقاها شيطانة .

6- حجاب العازة .. هذا يا جماعة حجاب تستخدمه بدون قناعة و لأنها مضطرة البنية اللي صلعت أو حت شعرها !! أو تقصفت خصلها .. فتكون معتازة الستر .. و ماعتقد انها بتاخذ أجر من الله عشان الحجاب لأن نيتها ما كانت الستر .. وعلية .. الله يشافيها و يعافيها و يقوي مافيها .

7- حجاب بو قطعتين .. ييديد .. أو بالأصح انتشاره ييديد و الحين هابين فيه .. يصير غالبًا بلونين متناسقين يعني كحلي و سماوي أو أسود و أبيض بحيث يبين اللي تحت من جدام و اللي فوق يرد ورا شوي .. حلو و ساتر بس اللي ماعندها ذوق لا تستخدمه بلييييز ترى الاصفر و الاسود يعني ممنوع الوقوف و الاخضر مع البرتقالي مو شي كلش .. الذرابة زينة .

8- حجاب قوس قزح .. كوكتيل من الالوان تلقاها في هذا الحجاب .. شحقه متحجبة دامج تبين تلفتين النظر ؟

9- الملفع .. زين اذا لفيتوه عدل .. و كل ربطة لها معنى و تدل على بيئة .. ربطة الحضر غير ربطة البدو .

10- البخنق .. اييييه الأول تحول .

11- البرقع .. راحت أيام بيوت الشعر .

12- البوشية .. عتيج الصوف ولا ييديد البريسم .

13- النقاب .. بدون تعليق .

14- حجاب بو قذلة .. ايييه با بوقذيلة يا بوقذيلة .. شبيه الريم شحليله .. يفشللللل و يطلع البنية بالشينة و تصير علج بحلوج العالم .. عيب ترى عيب و الله .. و أتصور انه الناس تفرق بين اللي متعمدة تطلع قذلتها و اللي مع الحركة و اللوية طلع شعرها بالغلط .

15- حجاب التلثومة .. يصير جنه غترة بدون عقال .. حط غترة على راسك و سبلها لي جدام بعدين سو حرف -اكس- بحيث تقط الذيل الييمين جهة الييسار و العكس صحيح .. أغلب اللي يلبسونه كبار .. أغلبهم .

16- حجاب بو فوطة .. هذي الموضة الفاشلة عاد .. صوف مادري قطن و غالبا ايي بألوان مو حلوة و تلوع الجبد !! .. بس في أحيانااا يكون لايق على بعض الناس .

17- حجاب التسبيلة .. مثل الغترة لما يسبلونها بحيث تصير عراويها جدام .. المصريات يحبونه .. تحتاج اللي تلبسه انها تستخدم جلاب أو بروش يشبكه من جدام :PpP


بس .. أنا كلمرة أقول اني ماني مكثر حجي و آخرتها أقرق قرقة العالمين .. أتمنى اني ما زودة الجيلة شوي و عسى ان هذرتي تكون خفيفة لطيفة عليكم .. و في النهاية أحب أقول : احم احم
1- الستر زين
2- النية أهم شي
3- لكل قاعدة شواذ
4- من راقب الناس مات هما -علم نفسك- احم
5- الزين زين لو قام من النوم .. و الشين شين لو غسل عويناته
.

فمان الله .. و نلقاكم على خير انشالله في حلقات ييديده من : الصراحة راحة


هناك 9 تعليقات:

غير معرف يقول...

Hmmm..

Ra-1 يقول...

hahha :p
mashaAllah emsawee ta7areyat o este6la3 !!!

Eb9ara7a and his Wife يقول...

chayek yoba chayek elbeet beetek :P
..
Ra.1 .. shlo0n Buffy ? lele7een trake'6 wara le'7yo0l ? looool :))

Ra-1 يقول...

e :p
bas Loza mankhaleha tarketh now coz lafeen 3enha maskeena :(

Eb9ara7a and his Wife يقول...

Ra.1
وعليّة ! شفيها ام اللوز ؟ و جم عين لافين ؟ ترى يبيلهم تطعيمات و فيتامينات .. منزمان ما ودوهم البيطره

و بعدين بالشتا لازم يدفونهم عدل .. العبدلي مكشوفه و اهناك سحتني اكثر من الديره

ray يقول...

salam

i had this email for years, it is still true and funny

thanks for sharing your thoughts to the public

by the way, u sound so much like my grandmother ! since i never got to meat any of my grandfathers so i say that you would sound like them too. :)

keep writing, it's nice.

ray

Eb9ara7a and his Wife يقول...

ya 9aja o ya 9aja ma chethabtay .. ya sister :)

o thanks 3ala el words ele ketabteeha .. I hope ena matko0n : la 7ayata leman tonade !!

yallah setrek

إعلامية يقول...

بدددددددددددعت
بصراحة
شكلك كان عندك بسطة حجابات من قبل
لوووول
ترى اتغشمر !!


كفيت ووفيت
:)

Eb9ara7a and his Wife يقول...

إعلامية :))
LOL
لا و انتي الصاجة .. الاحظ و أثبّت .. كل يوم نتفاجأ بشكل ييديد و نمونه عجيبة
مو معناته اني اتمقل ابّنات العالم و لا عندي شغله او مشغله :P
..
شكراً على الزيارة