السبت، يناير 01، 2005

Fourth : للبنات بس

حلقتنا اليوم مقتبسة نوعا ما من ايميل انجليزي كان كاتبه واحد
من الشباب و قمت انا بتحريفه و الاضافة عليه من باب الفايدة
بس اتمنى ان الخوات ما يعتقدون انه هجوم عليهم .. لاني هني اخاطب بعض مو كل بعضضضض البنات اللي عسى الله يهديهم


1- التلفت وايد و الخز و التمقل بويوه العالم عيب .. و بعض البنات تلقاهم يكاسرون الصبيان و يبحلقون عويناتهم جنهم بايقين حلال ابوهم لاااا و المشكلة انها تقول : قاعد يخزني قطيعة !! و اهي اللي معطيته غمزة اصلا و يمكن دقرها وما عطاها ويه


2- الضحك الجايد و الحركة الزايدة بالسيارة تعبر عن الشخص خفيف و اللي مافيه ثقل كلش .. نتبوسم حق بعضنا و نسولف بس ما نستعرض و نقول : مالنا شغل باللي حولنا .. امبله لكم شغل لانكم بالشارع مو بالبيت


3- البتاوين و التنحش من المصبنة شي مو سليم لانه اولا خطر و ثانيا يعني شوفوني اعرف ابتون ؟ .. ترى المصبنه يدورون هالسوالف


4- ترى مو حرام تروحون سوق شرق ولا جمعية الضاحية ولا الدائري الثاني (الحب !) ولا تتمشون على البحر .. بس كل شي بوقته حلو يعني ليش تدورون الزحمة و الويك اند عشان تتسرسحون هناك ؟؟

5- السهر بره البيت -عمداً و بدون ضرورة- صفة ما تتصف فيها الا البنية اللي لك عليها ! و سوري على هالكلمة .. بس ترى حتى احنا الشباب مو عدل انه نكون سهارية على طول .. بنات طالعين من سينما الفنار 4 الفير ؟؟


6- المكياج و الميك آب له أصوله ترى .. و كل شي زاد عن حده انقلب ضده .. شكو تتسوقين و انتي حاطة حمرة فااااقعة جنج بعرس ؟ ولا قاعدة بهاجينداز و اهي لابسة كشكش جنها بالعيد !! شي يفشل الصراحة

7- ستاربكس كافيه يعني قهوة يعني مقهى يعني استراحة يعني مطعم صغير مو صالة افراح عشان نكشخ فيه و ما بقى الا نلبس بدلة عرس ! و البعض يتربزون فيه بالساعااات و ما عندهم شغل غير انهم يطالعون الرايح و الراد !! و الله حالة


8- الحجاب .. ستر و من الدين .. لا تخلونه استعراض ! لا تخلين الناس تقول عنج مغصوبة ولا حاطتة كعازة عشاان يغطي البلاوي ! للأسف بعض المحجبات يطلعون القذلة و لازم تكون مصبوغة يعني شوفوا لون كشتي !! مايجووووز هالحجي


9- الترصص بالهدوم الضيجة !! .. لا تقولون الناس بس بقلوبها لا لا مو صح .. عيل شحقه نلبس هدوم ؟ شحقة نتنظف ؟ شحقة نحلق ؟ دام القلب اهو كل شي على قولتكم !! اي صح المفروض مانحكم على الشخص من شكله و وايد بنات لبسهم حده فري احسن من منقبات لكنننن اكو ستريتجات تفشل و جينزات تلوع الجبد
كتبت عن هالموضوع تحت عنوان .. ليش نلبس هدوم ؟ .. ثاني مقالة


10- ترى العصقولة - الرشيقة لها لبس و الوان خاصة .. و هم المتينه - المربربة لها لبسها و الوانها اللي تلوق عليها .. ضبطوا حالكم


11- للعلم .. الكلك الزايد مكشوووف , ماله داعي بفرايديز مثلاً تعلين صوتج و انتي مع رفيجاتج و تقولين : شعري قبل و انا صغيرة كان اينن و يهبل وناعم بس شمسنا ما ترحم و جونا يتعب البشرة !!! اللي محتت شعوركم اهو
:)) الصبغ و الخرابيط الصناعية
الحنة و اقطع



عسى اني ماكنت انفخ بجربة مقضوضة !!


هناك 6 تعليقات:

Ra-1 يقول...

خوش مقالات !
أول نقطة LOOOL
;)

True Faith يقول...

eb9ara7a,

I was suffering reading your posts; the words are too tiny and the colors are sometimes too bright.

Anyway, your posts are funny and so true.

Eb9ara7a and his Wife يقول...

Ra.1 .. 7athreen lel6aybeen wel6aybaat siso0o :P
..
ترو .. ماكو سفر ولا معاناة مستقبلاً :)) كبرنا الخط و وسعنا الفراغات من منطلق ما يطلبه المستمعون

tasty_as_berry يقول...

عاد صج في بنات مال طق ... :))
واللي قلته اشويه بعد

تحياتي ،،،

غير معرف يقول...

I have been looking for sites like this for a long time. Thank you! » »

غير معرف يقول...

best regards, nice info » » »