الأحد، سبتمبر 18، 2005

وا خزياه
















وا خزياه
كلمه تقولها الكويتية لي بغت تعبر عن امتعاضها من شي مخزي أو غلط قد يسويه ياهل أو حتى شايب
الكلمة هذي انقالت يوم انحطت صور طالبتين كويتيتين بتلفزيونات أمريكا
ماراح أدش بتفاصيل الحدث و راح أكتفي بالزبدة حق اللي ما يعرف شصار و بعدها بركز على جم تعليق اعتقد انه يستحق الطرح
المكان : شارع في احدى الولايات الامريكية
الوقت : بعد منتصف الليل و قبل شروق الشمس
الفعل : حادث دهس أدى إلى وفاة
الفاعل : طالبة كويتية
الشاهد : طالبة كويتية أخرى
الضحية : رجل أمريكي
النتيجة : القبض على الفاعل و الشاهد

من الساعات الاولى للحادثة عرفت التفاصيل بشكل شبه كامل .. كذلك شفت اللقطات المنقولة في التلفزيون الامريكي .. و عرفت الأسامي مثلي مثلكم .. لكني ما قررت اعلق الا لما قريت الكثير من المواضيع و التعليقات المطروحة في عدد من المدونات –البلوقات- و حسيت اني ماراح اقدر أكتب بكل وحدة فيهم بشكل واضح و كافي و خاصة انه اكو وايد آراء متطرفة من الجهتين : اللي يفضحون الطالبتين و اللي يدافعون عنهم

باختصار
1
خلنتجنب كتابة الاسامي و نشر الفيديو اللي فيه صور البنات من باب الستر يا جماعة الخير .. ادري ان الغلطان يتحمل نتيجة و تبعات غلطه و لكن خلونا نكون أرفع من مستوى الشخص اللي ماعرف يستر على روحه أصلاً
2
تساؤل : آلاف الحالات المشابهة تحصل في امريكا سنوياً ، فشنهو سبب التركيز على هالحادثة في الإعلامي الأمريكي ؟ هل كان من حسن حظ الطالبتين وجود وفد كويتي رفيع المستوى في نيويورك ؟ و هل خففت مساعدة الكويت حق ضحايا إعصار كاترينا من تشدد الإجراءات الامريكية تجاه الطالبتين مما ادى للإتفاق على كفالة مالية بدال السجن ؟
3
اللي سوته الطالبتين غلط غلط غلط .. 3 مرات أقولها لأنها غلط حسب الشرع و القانون و الإنسانية
و المصدر الامريكي الموثوق اكد كلامي : قيادة بحالة سكر .. دهس إنسان أفضى إلى موته .. عدم محاولة مساعدة إنسان تعرضت حياته للخطر .. هروب من موقع الحادث .. محاولة تستر على جريمة
و الإتهامات السابقة موزعة على الطالبتين
4
التعصب الاعمى في الدفاع عن الطالبتين شي مقيت و مذموم ولا نقبله ككويتيين لأنه احنا ناس تربينا على احترام الدين و القانون و الانسانية قبل لا يتفلسف البعض و يقول ان الطالبتين من بنات الديره ! و خير يا طير ؟! اذا اخوي غلط انصحه و اذا رفيجي انحرف انبهه و اذا شفت كويتي يفشل ديرتي أتبرى منه .. انا ما اشجع ان نوقف ضد الطالبتين كما اني ارفض التبرير لهم رغم انغماسهم بالغلط من راسهم لي كرياسهم .. الله يعينهم و يستر عليهم و عسى اهلهم يكونون قدها و يطلعونهم من مشكلتهم و يرقعون فضيحتهم و يدفعون تعويض حق أهل الريال الميت بنية الدية اللي يمكن تكفر ذنبهم اللي سووه
5
مثل ما عيب ان نتطنز على الطالبتين فكذلك عيب نخلي ازهاق روح بشرية نكتة .. مثل ما قال واحد من الكائنات الحية : شكو هذا راكبله قاري او سكوتر تالي الليل ؟ خفس سيارة البنية و خرب عليها سهرتها !! قمة الوقاحة و ابراز للصورة السيئة اللي يُتَّهم فيها الخليجيين من قِبَل بعض العرب و الآسيويين
6
تطرق البعض لمسألة دراسة البنات في الخارج .. و انا مو مع تحريمها و انما مع اباحتها بضوابط حسب الراي الشرعي اللي انا اشوفه مثل ما غيري يشوف راي ثاني .. فلا تصير السالفه ممنوعة بتاتاً ولا نخليها سايبة بحيث يصير مثل اللي صار
7
الكيل بمكيالين شي تعودنا عليه من الديناصورات ربع المنبر و الطليعة و تجمعات الليبرالية العوية بالكويت .. برلماني اسلامي بغى يغرق بالمكسيك و لي يومك يدندنون على سالفة : المطوع اللي انقذوه بشاطيء العراة !! وينكم من هالطالبتين اللي خالفوا القانون ؟ وينكم من اللي ادعمت آدمي و خلته يغرق بدمه بالشارع ؟ وينكم –حسب الشرطة- من اللي تسوق بحالة سكر ؟ وينكم من اللي نحشت رفيجتها و جنها ما داست الا قطو ؟ لكن للأسف ماكو أوادم سنعنين بذاك التيار يقدرون يعترفون بالبلوة على الأقل من منطلق انساني أو قانوني مو شرط من ناحية شرعية دامهم امطنشين الدين .. و السبب شنو ؟ ان الطالبتين من أقارب رموز ليبرالية معروفة بالكويت
اذا عرف السبب بطل العجب
!!!
***
الصورة اللي فوق
لا تعليق
:)
***
الكلمات اللي اخترتها اليوم كانت ضمن قديم الاخت قطرة مطر
اللي بيعرف شنهي .. يتفضل
http://theraindrop.blogspot.com/2005/05/me-and-al-ajmi.html
***
كالعادة .. سفرة قريبة تلوح في الأفق ! و يوم الثلاثة بليل بشلع إنشالله
لمدة 5 أيام راح اكون في رحلة عمل بمكانٍ ما خارج تركيا

أستودعكم الله

هناك 37 تعليقًا:

enter-q8 يقول...

عمو لا تحرق أعصابك
اذا على هالسالفه
ترى هيين والله

True Faith يقول...

I wish that you didn't write this post.

It would have been better if this issue wasn't discussed.

يا ناس سمعة بنات ...

و الله ما يصير جذي

Ra-1 يقول...

عندي وايد كلام بحاول أختصره :)

بالنسبة للي يقولون ليش الشماتة
إحنا مو قاعدين نتشمت
قاعدين نعطي راينا بلي صاير
وبالنسبة للي يقولون ستروا عليهم!!!
أولا السالفة موجودة على كل لسان والصور والتفاصيل بكل مكان
يعني لو محد درا ولا سمع جان سميناها فضيحة لما تكلمنا
ثانيا آنا أولى إني أستر عليهم من غيري
ولحد يتوقع إني متعصبة برايي إلي بقوله اتجاههم
ليش؟
coz one of the girls is my second cousin
and one more info
I know details which are still kept and I wont say what
again why?
لأن من ستر على مسلم ستر الله عليه يوم القيامة

الله يهدينا ويهديهم
بس في نقاط لازم نستفيد منها ونعتبر
هل هذا هو الجيل المتحضر؟؟؟
هل ما حصل كان نتيجة بيئة صحية وملتزمة يتعاليم الإسلام؟؟؟
هل هذي هي الحرية؟؟؟
should we blame them or blame the parents???

الحكومة ادفعت امية ألف دينار
لتبرئة أشخاص أنهوا حياة إنسان
they ended a man's life!!!

بالمقابل نشوف وايد كويتيين في السجون سواء بغوانتانامو وغيرها
آنا أتكلم عن الأبرياء منهم
إلي انسجنوا لجرائم لم يرتكبوها
يعني انصادوا وصارلهم سنين يتعذبون واهمه ما سووا شي
ولكن كان في (شكوك) إنهم (سيرتكبون) جريمة في يوم من الأيام

تناقض عجيب

وسبحان الله انقلبت الموازين في هالزمان !!!

Ra-1 يقول...

eb9ara7a ...
سلم على ط. إلي بالصورة
LoL

أبو جيج يدور نعاله يقول...

الطبطبائى نائب بمجلس الأمة و يمثل أهالى منطقته الكرام و يسن و يقترح قوانين و يتدخل فى حياتنا بكل صغيرة و كبيرة

يعنى مسؤول بمنصب عام و حلال على الكل أن ينتقد تصرفاته متى إنحرف أو خربط كما هو حلال علينا ننتقد بقية النواب و المسؤولين و الوزراء إسلاميين منهم و ليبراليين و حضر و بدو فهم يمثلونا بالمجلس و لابد أن يكونوا قدوة

أما الفتاتين فهما طالبتين لا يمثلون إلا أنفسهم و عائلاتهم و لا دخل لنا بماذا يفعلون بحياتهم الخاصة و إذا راح نفتح باب محاكمة إنحراف الطلبة بإعتقادى لن يسلم أى أحد و أولهم النواب الإسلاميين اللذين طالما تعرض أبنائهم لمشاكل و حوادث فى الأردن و مصر و تدخلت الحكومة لمساعدتهم

لا يجب أن نصنف الكويتيين على حسب توجهاتهم السياسية و الحزبية فى مثل هذه الحالات فالطالب هنا كويتى وأخطأ ووقع بمشكلة و الكل بالمجتمع يتحمل المسؤولية دون المساس بسمعة العائلة أو محاولة ربط ميول الأب السياسية كإسلامى أو ليبرالى بما يتعرض له أبناءه الطلبة الكويتيين من حوادث

Eb9ara7a and his Wife يقول...

Enter-Q8
صاج :)
..

T.F
لو سمعت السالفه مني مناك جان طمطمت عليها و طنشتها .. بس المسألة صارت عامة : جرايد و تلفزيونات و منتديات و بلوقات
!
و عشانها سمعة بنات .. كتبت في البند الأول
1
خلنتجنب كتابة الاسامي و نشر الفيديو اللي فيه صور البنات من باب الستر يا جماعة الخير .. ادري ان الغلطان يتحمل نتيجة و تبعات غلطه و لكن خلونا نكون أرفع من مستوى الشخص اللي ماعرف يستر على روحه أصلاً

:)

Eb9ara7a and his Wife يقول...

Ra.1 :D
should we blame them or blame the parents???
كل كلامج عجبني .. و الجملة اللي فوق يت بالصميم .. للأسف الغلط مو غلطهم بروحهم

اي اللي معاي ط أفندي .. ترى أهله يسلمون عليج وايد
..

Bo-Tariq :)
صدقت و الله .. ترى ياما طلبة يتمشكلون مني و مناك و خاصة بالأردن و مصر بس ما تسمعلهم حس ولا خبر .. أنا ما راح أركز على البيزات و منو دفعها لان اهلهم قادرين عليها و اهو اللي القانون يفرضه لان الحكومة ماهي ملزومة تدفع كفالات المتهمين و المدانين

و انا مثلي مثلك .. عورني قلبي يوم شفت الخبر و صورهم
!
..

Bo-Jaij
شكراً على مرورك اللي قد يكون الأول
:)
صحيح ان المسألة بدت خاصة انما تطورت الى مسألة عامة من اطلعت بالجرايد و التلفزيون و الانترنت و هذا يسمحلنا ان نعلق عليها بشكل معقول بحيث ما نقول كل اللي ينقال بوسائل الاعلام كصور و أسامي البنات اللي فضلت حجبها رغم انها انحطت بالخط العريض بالقنوات الامريكية
!
ترى ماهو دفاع عن الطبطبائي .. اذا الريال كان مخالف أي قانون او مرتكب جريمة فانا اول من يوقف بويهه و يتهمه بالنفاق و تشويه صورة الكويت .. بس الريال ما ثبت عليه انه بشاطيء مفاصيخ و لو ثبت فالقانون المكسيكي ماراح يخالفه

نون النساء يقول...

واخزيااه من قلب

وأسفااه على أجيال يحملون اسم الكويت

وهذه أفعالهم

المشكله مو مشكلة الدهس والهرب

لأن الشغلات الثانية اهي اللي أدت لهالجريمة


:)

والله يستر على الكل

ii يقول...

شوف انا مو كويتيه عشان اتكلم بشكل دقيق بالموضوع

بس مع انه مالي دخل بس انقهرت من تناقل الناس للموضوع حتى بامريكا
ليش عاملوا الموضوع كانه اول مره يصير؟؟
عشانها مسلمه وعربيه؟؟
وغلطت .. طيب كل الناس يغلطون بس مو لهدرجه هم ابرياء وملائكه عشان يشوفون غلطه البنت جريمه

بعدين انا قريت رد ل
ra.1
خلتني افكر بنقطه ثانيه وهي صدق ليش اللي بجوانتنامو ما سووا لهم كل هذا
ودفعوا لهم كل هالمبلغ عشان يطلعون

انا ما ادافع عنهم وما علي منهم الله يستر علينا وعليهم
بس الموضوع اخذ اكبر من حجمه

Eb9ara7a and his Wife يقول...

نون النساء
كلامج صح اختي .. اللي خلاهم يطيحون بهالبلوة و يذبحون الريال شي ماهو هين .. الله يستر عليهم و عليج و علي بعد :)
..

Norah :)
هلا بالقاطعه
نقطتكم تستحق الاهتمام .. الخبه زادت عن حدها لي درجة اني ما قدرت اطنشها و كانت المبالغه من الطرفين سواء اللي حطوا البنتين بالتلفزيون او اللي قرروا بسرعه انهم يدفعون لهم بيزات

Mother Courage يقول...

"الكيل بمكيالين شي تعودنا عليه من الديناصورات ربع المنبر و الطليعة و تجمعات الليبرالية العوية بالكويت .. برلماني اسلامي بغى يغرق بالمكسيك و لي يومك يدندنون على سالفة : المطوع اللي انقذوه بشاطيء العراة !! "


اسمحلي بس هالفقره ماكان لها داعي ... هذاك كان نائب اسلامي حط في بالك العمر و الخلفيه السياسيه و الخ والخ والخ

هذولا طالبات صغار و مالهم شغل بالسياسه يعني المقارنه مو بمحلها

بس بشكل عام الموضوع حلو و يعطيك العافيه

جنة الحواس يقول...

ما شاء الله عليك كفيت ووفيت .. مع أني ما أتفق معاك بكل اللي قلت ..بس خوش طرح

-----------------------------------
كل شي بصوب ...وسالفة المسجات اللي انتشرت حزتها بأساميهم بصوب ..صج احتريت


الأوادم صار ما همهم الا التشهير

تافهين

يعني كأنهم توهم يدرون انه بعض بناتنا كل شي يسوون بره ..


الله يهدينا و يهديهم بس

kuwaite يقول...

اقول

صح لسانك بس

ray يقول...

الصرحة شي يضيق الخلق

حوادث الدهس وايد تصير ... سواء بالكويت و برة , ما شفنا ان أحد طلع اسمه غيرهم

والله لو تدرون اشكثر في ناس من عوايل محترمة و معروفة و عليهم قضايا برة .. يشيب راسكم

بلاوي ... بس يت على دهس ؟

غيرهم عندهم قضايا أكبر ولا أحد يدري عنهم

ليش الميديا شهروا فيهم و خلوا الباجي ؟ بسبب انتماء أهلهم السياسي ؟ اهما اشذنبهم ؟

اسمهم صار على لسان الكل ... و سمعتهم بالحضيض

صج كل اللي سووه غلط و مايترقع, بس الناس الله يهداهم مكبرين السالفة

ما بقى مكان مو كاتبين فيه ... كأنهم ما صدقوا على الله لقوا شي يتكلمون عنه , و قليل ما نلقى ناس سنعين تكتب بعقلانية عن هالحادثة

ray يقول...

o nice post :P

i agree with most of the things u said

Eb9ara7a and his Wife يقول...

M.C :)
طبعاً ماكو مقارنة بين طالبتين صغار و عضو مجلس أمة .. انا هني ما اقارن و انما أرد على ناس من اللي شلخوا العضو و اليوم يبررون جريمة البنتين رغم ان العضو ما خالف القانون حزتها
..

Broke :)
عدل كلامج .. المسجات و للأسف صايره تساهم بالفضايح بشكل اسرع من الانترنت .. العالم قامت تألف نكت ! ربعنا حار بحار ما يطولون

Eb9ara7a and his Wife يقول...

Kuwaite :D
صح ابدنك حجي
..

Ray :)

هذا اهو واقع الحال .. و الاسباب ماهي شوية ..ناس حاقدين و غيرهم ماعندهم سالفه .. لكن يبقى الغلطان الاول مو الناس اللي يتحجون و انما اللي ارتكب المشكلة و اللي خلاهم يرتكبونها .. الله يهدي الجميع

Яeema يقول...

i am totally with you, and i realy like the way you talk about this issue .

let all the girls know that they are ( kuwaiti girls ! )

and this means alot!

allah shaa2 enna yekonon example in this life, and i hop we take this as a listen in life .

Яeema يقول...

something els?

أخذت ضجة القضية لأنهم انحاشو

و تعتبر النفس في أمريكا لها قيمة حالها حال القطو و الحيان اللي يوقفون الناس علشان بطة اتعبر

أما نحن للأسف الانسان و الوقت ليس له قيمة بالمرة
و آسفة للاطالة

Eb9ara7a and his Wife يقول...

Reema :)
allah shaa2 enna yekonon example in this life, and i hop we take this as a listen in life
صح السانج
..

Elixir
عدل يا باش مهندس
و شكراً على زيارتك الاولى
;)

الجاحظ يقول...

بارك الله فيك على هذا الطرح الطيب الذي اشتمل على جوانب مهمة في قضية الفتاتين، كما أنني أعجبت كثيرا بتعليق الأخت ريما الذي جاء مناسبا و في صلب الموضوع

chatterbox يقول...

يتراوالي ان بدال ما ندفن راسنا بالتراب ونقول ليش مكبرين السالفة ونحاول نطمطمها, هذا واقع احنا نعيشه ولازم نتعايش معاه العالم كله حاط عينه عالعرب والكويتين بالاخص ليش؟ ماندري ( او ندري؟) المهم احنا كل واحد فينا يحاول يحافظ على صورة ديرته وماعلينا من الناس اللي تغلط لان لما تطلع اي سالفة ثانية راح ينسون هالسالفة المهم انها ماتتكرر عشان لاتصير عادة من الكويتين.

Eb9ara7a and his Wife يقول...

الجاحظ
انت من الناس اللي أسعد بمرورهم

شكراً أخوي
:)
..

عذابات أنثى
لا فظ فوك بلهجتنا : صح السانك

فبدوري أقولج : صح ابدنج اختي
:)

Eb9ara7a and his Wife يقول...

شوق
صدقتي .. الناس اجناس
فيهم الزين و الشين

رديت من سفرتي و لله الحمد
:)
..

ChatterBox :D
شكراً على الزيارة الاولى
و الله يوفقج بمدونتج الحلوة

و تعليقج كان صائب ، عشان جذي لازم الاوادم اللي يدرسون هناك يعتبرون و يخلون اللي صار درس مو شماتة

و الله يستر على الجميع

tamotest يقول...

والله قبل لا يوصلني النت اتصل علي واحد من الشباب الي يدرسون بامريكا وعطاني تفاصيل السالفة
طبعا حدي الي انقهرت من السالفة بس الي كلش ماتوقعته هو انه السالفة تكون وصلت الكويت
قلت مثل هالسوالف في منها وايد يصير بامريكا سكاتي فيممكن صاحبنا درى فيها لانه يدرس بامريكا ويقرا الجرايد هناك
لكن انه السالفة تكون على كل لسان بالكويت فهذا شي كلش مو متوقع
تعليقي على الحادثة هو ان ربك مايطق بعصى
آباء البنات يكافحون ويناضلون لنشر الإنفتاح الامحدود بين شباب الكويت " الليبرالية " و نتيجة هالشي شنو؟؟
شباب ضايع ...الجماعة اول مابدوا بدوا باهلهم وهذي كانت النتيجة
فعسى يكون بهالشي عضة وعبرة وعسى البنات يتوبون لربهم وتكون هالحادثة بداية حياة جديدة لهم " افضل ان شاء الله "

ادري مشاركة متأخرة شوي بس حبينا نسير عليك خيو
وترجع بالسلامة ان شاء الله

Eb9ara7a and his Wife يقول...

I am back

وا خزياه على قولتك
انا ذاك اليوم كنت لاهية بس وصلني الخبر قلت : غبره ! شلون بيتزوجون ؟

بس هم بدعيلهم بصلاتي ان الله يهديهم و يستر عليهم

اميييييين

AL-3ANAN يقول...

no comment

Eb9ara7a and his Wife يقول...

Ambitious :)
صدقت
و حق هذيله اللي هيوتوا عيالهم اقول : خبز خبزتيه يا الرفله اكليه
!
..

Qaneema :))
LOOL
هلا هلا بالمختفيه .. الحمدلله على سلامتج حجيه
و الله يهديهم .. على قولتج
..

al-3anan
ok :P

ii يقول...

UPDATE ياخي!!

Mother Courage يقول...

i second hand noura

UPDATE !

Eb9ara7a and his Wife يقول...

Norah + MC
أحرجتوني

ماني رادكم
:)

غير معرف يقول...

http://www.landofdreams.us/vb
يوتوبيا منبر ليبرالي وطني ; لجميع
التيارات الفكرية المختلفة ، من اجل رفعة الفكر والثقافة والسلوك، ويكفل للجميع قدراً كافياً من الحرية والتعايش بسلام من أجل انسان افضل ومستقبل افضل

please Join US !

iliveinq8 يقول...

السلام عليكم..

انا اتفق معالك 100% بكل اللي قلته

لكن في الموضوع عبرة لمن لا يعتبر
الجريمة حدثت وانتهت .. مهما كتبنا وتكلمنا لن نغير شئ صح؟

لكن هناك عبرة خطيرة من هذه الحادثة !! اتمنى ان يتعلم منها الجميع! سواء كويتيين او غير كويتيين

وهي الأسباب التي ادت الى الحادثة

(خط كبير بالأحمر) التربية يا ناس التربية والأسس التربوية التي اتبعها اهل البنتين التي جعلتهم يقدمون على هذه الجرائم البشعه!!) (الخط الأحمر الكبير انتهى)

والله من وراء القصد

lawyer يقول...

الحين يا اختي بعد ما مر اكثر من شهرين على الحادث و اعلن في الجرايد الامريكيه ان الي توفي كان يحاول ينتحر و انه ماخذ مخدرات بكميه تموت فيل و ان البنت لما اطلعت نتايج التحليل مافي نسبه كحول في جسمها و البنت مو سكرانه و ان الشرطي الي لبسها كل هالسوالف يهودي !! و بدال ما تدافعون عن هالشي !! رحتوا تقرظون في بنات خلق الله
!!
ان بعض الظن اثم ..
و السيده عائشه ايام الصحابه و الاسلام اتهموها في حادثه الافك ..
وانتو لي الحين ما تتعضون
بسكم ظلم
الحين في سؤال في بالي .. حق كل الي تكلم في حق هالانسانه و الي الله اظهر برائتها .. شنو شعوركم الحين
مو خجلانين من نفسكم
و مافكرتوا انكم يوم من الايام راح يصير فيكم جذي ان احد يتهمكم
و ليش تابعتو الحادث من بدايته و لا تابعتو اخر التطورات و اهي ان الي توفي مدمن مخدرات و كان متعاطي و ان البنت وقتها ماكانت سكرانه
عيييييييب عليكم

Eb9ara7a and his Wife يقول...

First
انا اخوج مو اختج :)
Second
حياج الله بزيارتج الاولى
Third
المقالة انكتبت عقب يوم او يومين من الحادث ! شكلج مو امجيكه على التاريخ
Last point ..
انا كنت موضوعي الحمدلله و تجنبت ذكر الأسامي .. و مصادري الاكيده ان السكر كان موجود و ما يهمني اذا الريال مدمن مخدرات لانه هذا ما يبرر قتله

تحياتي

lawyer يقول...

انا ادري ان المقاله قديمه لكن انا اقصد عن العبره و اهو التشهر في بنات خلق الله
ثاني شي اهو منتحر و قاط عمره
ثالث شي
البنات مافي دمهم نسبه وحده من الكحول
و مثل ما شهرت فيهم اقل شي تجاه ربك انك تحط برائتهم لان مثلك عارف
النميمه و الوشايه و التشهير جريمه اكبر من اي شي ثاني
.. انا مو قاعده اتكلم باسم البنات بس انا اتكلم عن انهم بنات ديرتي و اقل شي نسويه تجاهم ان احنا نوقف وياهم بدال ما انشهر فيهم
و اظن لو ان لو واحد فينا فكر يوم ان اي شي بيصير فيه جان ما فكر يتكلم و يظلم

Eb9ara7a and his Wife يقول...

لا اختي ما يعني انهم بنات ديرتي فلازم اتعصب لهم
انا واحد اوقف مع الحق لو كان من صوب هندي او غير مسلم

و بعدين ما اطلعت براءتهم ، رجاء تحري الدقه بمعلوماتج .. الموضوع تجمد بسبب التسوية و الفلوس مو بسبب حكم البراءة

اتمنى يكون حماسج لهم بالمواقع اللي اذكرت أساميهم و حطت صورهم .. حرصنا هني انه نستر على الاشخاص بس ما نغطي الاغلاط نفسها

تحياتي