الأحد، أبريل 17، 2005

19 : ليش أحبها ؟



معنّه ويك إند .. إلاّ إنّي ما ارتحت .. هايلنا من مكان لي مكان .. فزعت من صباح الله خير بسبّة الدكتور محمود .. شكّل علي من عيادته و انا معطيه طاف حد الدوسة ! .. تريقت كورن فليكس .. بالكويت أشربه مع حليب حار بس هني تعودت على البارد .. دق أبو العَبِد نوبة ثانية جريب صلاة الظهر جان أرد عليه و بدون مقدمات قال : ها شْريك وايناك ؟ بائيلي مريض واحد بَدّو حشوة و بعدها خلاص ماعَندي شي ، شو لِبلان ؟ -يعني شنهي الخطّة؟- .. هني بدت طلعتنا !
رحنا المطار مع أحمد المقاول عشان انييب اخوه سُعاد -الاسم متعوب عليه- اللي أخيراً خلّص 5 شهور من الخدمة الإلزامية -تجنيد- وبالمطار بغت تدمع عينه يوم شافنا لان ما هقى انَّ نتعنى عشانه .. علاقتنا فيه سطحية
تالي زرقنا على سوق الجمارك .. يبيعون فيه البضاعه المتروكة في الشحن او اللي تصادرها الحكومة او المهربة ! طب و تخيّر .. العبرة من الروحة اهي التطمش و التمشي مو التشري .. شرينا مدّتين-بساطين- حق كشتاتنا -نسولف عنها تالي انشالله- و عقب ما هدّينا احمد و سعاد طلعنا مع هاندان زوجة الدكتور و رافجنا نوري التحفة .. رحنا الشارع السابع -قهاوي و مطاعم- و هناك نوعين من القعدات .. اكل و شرب أو جنجفة و شطرنج و دامه و اوكي -القمار ممنوع بكل تركيا- قررنا نلعب كوت بو 4 -معلمهم الكويتية طبعا- و لعبنا قيمين 51 و 51 فزت انا و هاندان بالاول و فاز أبو العَبِد و نوري بالثاني .. و التسميات بلغتهم كالتالي : الحاس = كُبّا ، الديمن = كارو ، الكلفس = سِنيك ، السبيت = ماجا
***
أحبها .. و اللي مثلها لازم تنحب .. و مقتنع إنها متميزة .. و غيري هم يحس إنّ اللي عنده اهي المتميزة .. احلف انها اول من حبيته .. و ما زالت الأولى .. هفواتي تنساها من كثر ما تموت علي .. و ما قط شفت تجاهي و من صوبها زلّة .. محد يخاف علي كثرها .. و من سابع المستحيلات إني أكسر كلمة قالتها لي .. بجت عشاني من سنين .. حاتتني يوم طوَّلت بغيبتي .. اشتاقتلي لما امتدّت سفرتي .. وَلَهت و مازلت ولهان عليها .. ادعيلها بصلاتي و احس اني مهما سويت فماراح اوفيها الحق اللي يتوجب علي .. أبَد
ليش انا متأكد إن أمّي غير ؟ مع إني متيقن إن كلمن يقرا هالكلمات بيقول نفس الشي عن أمه ! لأني أحبها .. و لأن اللي يقرا الحين هم يحب أمّه
أيام الإحتلال البعثي كانت الوالدة كل شي بالنسبة لنا .. اخوي العود كان برة الديرة .. انا كنت صغير .. الوالد الله يحفظه كان مطلوب من الصدّاميين و بنفس الوقت لاهي مع المقاومة و لجان التكافل الإجتماعي .. أذكرها لما تبجي على سيادتها .. كنت متيقن إن هاللي تسويه اهو فرجنا .. بس ساعات احسبه احساس مراهقين .. لكن يوم تحررت الكويت تأكدت انّ دعاء أمي و أمك و أمج اهو اللي دمّر أحد اكبر الجيوش الدكتاتورية في العالم
أفتخر باعتدالها و وسطية فكرها .. مع إنها أول محجبة بجامعة الكويت .. كانوا 3 طالبات مع بعض بزمَن الميني جوب و الميكرو جوب و قمة التحرر و حرق العباة و صعود التيار الليبرالي .. يشهد لهم وزير يساري سابق : زميلاتنا المحجبات بذاك الوقت 3 (فلانه) بنت وزير أسبق و (فلانه) بنت تاجر معروف و رئيس جمعية خيرية و (فلانة) بنت رمز شيعي مشهور الله يذكرهم بالخير ..
عقب ما تفوقنا كلنا -الا انا البطة السودة اللي ترتيبي 3 و 4- قَرّرَتْ اتييب الماستر .. و حصلت على الماجستير بألفاظ القرآن الكريم و اهي أم حق 7 .. يوم قدمت رسالتها كنت بين الحضور طاير من الفخر و ودي اقوم و أقول باعتزاز : هذي امي
أغبطها .. و اتمنى اني اشوف اللي شافته بعيالها .. ابي عيالي يمسكون مناصب .. ابي ذرّيتي فالحه و صالحه .. ابي اللي يدعيلي مثل ما الله رزقها باللي يدعيلها
**
اللهم آتها في الدنيا حسنة وفي الآخرة حسنة وقها عذاب الناراللهم أسألك لها من خير ماسألك منه عبدك ونبيك محمد صلى الله عليه وسلم وأعوذ بك لها من شر ما استعاذ بك منه عبدك ونبيك محمد صلى الله عليه وسلم
***
و على الخير .. نلتقي

هناك 29 تعليقًا:

Eb9ara7a and his Wife يقول...

W.
LOL :D
WeekEnd .. what about you ?

Eb9ara7a and his Wife يقول...

W. :))
يزاج الله الف الف خير .. و انا اكتب هالجم كلمة أذن الفير بتوقيت السعودية على قناة روتانا
ما قصرتي .. هقيت انج ناسختها -كوبي- اثاريج متعنية و كاتبتها 1 ورى 1 ! ماشالله عليج
..
أشهد انهم ماراح يمرّونج عقب هالادعية الطيبة :D

غسان يقول...

الله يحفظها لك ويخليها ويطول بعمرها:)

بصراحة I beg to differ
مثل ما جود كانت تقول:)
هل المناصب مطلب؟ عطني راحة البال وخذ الدنيا وإلي فِيها. راحة البال مالها شغل بمنصبك، ماله شغل بجم بجيبك، ولالها شغل بشي. راحة البال، آه عليها، من يقضبني اياها

انا بالعشرينات، انت صاك الخمسه وثلاثيين:) يلا مو مشكلة، بس هل المُفترض الى بعمرنا يحسون فيها؟ ولاوقتها موالحين حزت النشاط والشباب والشغل والجد؟ ومانحس فيها إلا بالخمسين؟
سُؤال يبحث عن إجابة.

بومريوم يقول...

الله يخليها لكم و يطول بعمرها
مهما نكبر و نعييل و نفتح بيوت نظل صغار بعيونها
كل زياره لها ننسى ان احنا اباء و نصيرر عيالها الصغار

Ra-1 يقول...

edma3at 3enee :'(
great words ... she must read this :)

True Faith يقول...

The best that I've ever read in all blogs.

و الله مو مجامله

Eb9ara7a and his Wife يقول...

غسّان :)
أول شي من قال إني صاك ال 35 ؟! بعدي بآخر العشرينات ياللي بتشيبني غصب ! ادري فيك ناوي تطوّف عني القطار و تشبب روحك يا الكلكجي :P
صاج .. راحة البال اهم شي .. المنصب و البيزة ماهي الأهم .. و ترى طبيعي إنّ بهالسن تكون همومنا جثيرة .. دراسة و وظيفة و زواج و فلوس و غيرها من الأمور اللي بو خمسين سنة افتك منها و تجاوزها من سنين و بنين :)

Eb9ara7a and his Wife يقول...

بو مريوم :D
حسّيت إن المكان منوّر اليوم .. هقيت مغيرين الللمبات و حاطين نيون
:P
مشكور على الزوارة
و انت كذلك .. الله يخليهم لك و يبلغك احفادك مثل ما بلغها مريوم المتربية بعزك :)

Eb9ara7a and his Wife يقول...

R.1 !!!
اذا قلتلج إني توقعت هالرد منج .. تصدقيني ؟
أحلف ؟
..
Yes Show her please , why not :)

Eb9ara7a and his Wife يقول...

T.F :s
أوف ! حدّي انحرجت من صباح الله خير
خدودي صارت وردية معنّي بو سمرة ، شلون مادري :P
يزاج الله خير على الإطراء الطيّب .. أعتز بشهادة السنعين من أمثالج
;)

esTeKaNa يقول...

كل البوست بصوب وكلامك عن الوالدة بصوب ثاني:)
انا بعد دمعت يعني وصج هالمرة كسرت خاطري:)
انا واثقة كل الثقة ان الوالدة غير
قوتها وتربيتها لابناء ناجحين وحبوبين
اعتدالدها ودينها اللي انزرع فيكم
جهادها وثباتها على الحجاب والدين
اكمالها حق دراستها بموضوع مهم
ومتاكدة هذا غيض من فيض
من قلبي:
عسى ربي يثبتها ويطول بعمرها ولا يحرمكم من حنانها
ويجمعكم بدنيا وجنة الاخرة
هذا ارقى واحلى حب
هذا الحب ولا بلاش..حب يدششك الجنة:)
ولا تحط فكرة البطة السودة بالك مو خوش:))

maha يقول...

الله يحفظها و يطول عمرها
و يخليها لكم

دعواتي لها بالتوفيق و الثبات

تصدق ذكرتني بأمي مع إني اليوم الصبح شايفتها

دوامي لي الساعة ثلاث و نص العصر
بعد الوقت مبجر على ما أرد البيت

بدق على أمي أسلم عليها
و أدعوا كل المتواجدين بهالصفحة إنهم يدقون على أمهاتهم
(( الحين ))
و إذا كانت أمهم قريبة منهم خل يقومون يبوسون راسها

أمهاتنا غاليين
غاليين حيل

================
بصراحة
البوست وايد قوي
قواك الله

True Faith يقول...

Maha,

I have been caling my mom since I read this post but her mobile is switched off.

Eb9ara7a and his Wife يقول...

mano0ra :D
Thanks alot sister
آمين .. الله يسمع منج
و الله يخليلج حبايبج كلهم و على راسهم أميمتج الغاليه
و على قولتج : هذا الحب ولا بلاش .. حب يدشش الجنة :))
..
و سالفه البطة السوده مالي فكّة منها ! ترسخت في بالي منذ نعومة أظفاري
:P

Eb9ara7a and his Wife يقول...

maha :)
من بؤك لي باب السما حجيه
و الله يحفظلج ماماتج .. قولي آمين
..
إقتراحج أصلي حدّه :))
و لقى نتيجه .. الحمدلله

Eb9ara7a and his Wife يقول...

T.F
ماشالله عليج ! حار بحار
قريتي النصيحه و وحدة بوحده
:)
الله يجمعج مع الوالده على الخير دنيا و آخره

ray يقول...

اشسويت فينا يا ابصراحة

البجية واقفة ببلعومي

---

الله يحفظ لنا امهاتنا ... والله ماعرف أسوي شي بدونها ... اهيا الكل بالكل

عسى الله يحفظهم ان شاء الله

Eb9ara7a and his Wife يقول...
أزال أحد مشرفي المدونة هذا التعليق.
Eb9ara7a and his Wife يقول...

Ray :s
ماكو الا العافيه انشالله
انتي اهم شي تحرصين على الدعوة حق الوالدة بصلاتج .. و ربي راح ياجرج و يوفقها اذا كانت كلماتج طالعه من القلب
..
مشكورة على زيارتج :)
ننطر كتاباتج الحلوة في بلوقج المجكنم

AL-3ANAN يقول...

الله يخليها لكم و يفرحها فيكم انشاءالله :)

Eb9ara7a and his Wife يقول...

al3anan :D
You two
أجمعين

MASS يقول...

Asalamu aleykum

MashaAllah great post
:)
Allah ya7fa'6 umahat aljamee3
wa yu3eenunaa 3alla barihim

Eb9ara7a and his Wife يقول...

leon !
ماشالله علييييك ! فلته فلته عيني عليك باردة :)))
Yes I`m from Tahran City ! :pPp
...
q8ibloger :D
thanks brother , أجمعين انشالله
long time no see !

بومريوم يقول...

مشكور على الترحيب الجميل

MASS يقول...

yeah
inshallah i ll pass by more often

are you a fan of Clay or you just like his pictures:P

Eb9ara7a and his Wife يقول...

Q8ibloger :D
اي نعم حياك الله .. تشرفنا بزياراتك .. و رداً على سؤال سعادتكم عن محمد علي كلاي : اي نعم انا من المعجبين بشخصيته ، مع علمي بوجود ملاحظات سلبيه عليه .. لكن خيره اكثر من شره :P

Eb9ara7a and his Wife يقول...

Kuwait passion :)
اول شي : مبروك على مدونتك الييديده .. ماهي بتي ، بس هم ماهي عتيجه حيل
ثاني شغله : حياك الله في بلوقي المتواضع .. أسفرت و أنورت
ثالث نقطه : ردك اهو احد مقالاتك المنشوره في بلوقك و لا له علاقه وطيدة بموضوعي اللي علقت علي ! بس هم عجبني كلامك و نقدر نعتبره في محله
...
دعوة للجميع من اجل زيارة مدونتك الحلوه :)

Eb9ara7a and his Wife يقول...

Kuwait passion :)
you welcome brother
goodluck

غير معرف يقول...

That's a great story. Waiting for more. boating montville new jersey camp gas cooking stoves Xanax on line in fioricet boating lakeland Car insurance 21 Zoloft and well butrin Clemson basketball shorts 1963 jeeps keno numbers tracker Vacances camping 1973 porsche 911 coupe canvas boating shoes nissan skyline Witf scholarship