Nineth : !! مغازل بين السما و الأرض

.

هالكلمات سطرتها (حلوة مني سطرتها صح؟) سنة الألفين و أثنين

السلام عليكم و رحمه الله و بركاته ... ادري اني غطيت عنكم فتره طويله بس لا تلوموني تراني لاهي بالدوام و الدراسه .. الغربه صعبه يا جماعه الخير ... بس عندي سالفه قصيره أحب اني اقولها لكم ..

سالفتي أو بالأحرى ملاحظاتي شفتها بالطياره و أنا راد من لندن ( مطار هيثرو بالتحديد) لما وصلت الكويت .. الطياره طارت بليل و طبت الكويت حروة ال7 الصبح لأنها بريتيش ايرويز مو كويتيه (يعني منهم) همممم ..

ملاحظتي الاولى اللي شفتها و صج لاعت جبدي منها .. اربع صبيان و بنتين كانوا مع بعض و مبين انهم مو اهل لا تقولولي شلون بس مبين و مو قاعدين يم بعض بس كانوا قراب وايد و احتمال انهم يدرسون مع بعض ببريطانيا .. ضحك و كركره و كعكعه جنهم اول مره يركبون طياره بدون اي احترام حق الأوادم اللي بيرتاحون و بدون مستحى جنهم بروحهم .. ناس لا تستحي و لا تنتخي الصراحه .. أنا كنت حاجز سيت يم الدريشة بحيث ضمنت ان الاثنين اللي يمي فاضين فخذيت راحتي بالسدحه و صارت مجموعتهم جبالي و لانه ظلمه ما افطنوا اني قاعد اتطمش عليهم و مسوي زووووم .. مره اقرى بالكتاب اللي بيدي و مره اشوف المهزله اللي جدامي ...

فجأة قام واحد من الفرقة و اشتغل تصوير !! البنات يضحكون معنه وحده منهم وااااضح انها منحرجة و تحاول تخش ويهها وجنها تقول بقلبها : ابتلشنا فيهم و ليش طيحنا الميانه شوفوا شصار !! المهم .. الفلاش ازعج الناس خاصة انه الطيارة مظلمة ليش انها حزة نوم فحذفت كتابي و طفيت التريك اللي فوقي .. تالي استحوا على ويوهم و وقفوا تصوير و كركرة ..

ملاحظتي الثانيه .. الصبي اللي وراي كان يسولف مع بنيه وراه ( غير الفرقه ذيج ) و انا كنت قاط اذني و بلاغة الشف اشتغلت عندي هيهيهي .. المهم .. فهمت انهم يدرسون بمنطقة وحده و الظاهر بينهم مواد مشتركه و كان الصبي حد التكانه و كلامه بين انه ثجيل و سمت و ماعنده كيري ميري ..

بعد شوي انثبروا يمه 3 صبيان من الفرقة اللي تحجينا عنها اول شي !! اثاري هذيله شلة و كلهم يعرفون بعض .. البنيه استحت و اسكتت و الظاهر انها ماتعرف باجي المصبنه .. الشباب اشتغلوا تفلسف و كلك و صواريخ يعني سمعينا يا الحلوه ترى احنا منهم .. مت من الضحك و كسروا خاطري على مستوى طرحهم ! المهم .. البنيه قامت فجأة و راحت عزكم الله الحمام ( مكياج او غيره مادري ؟! ) هني اطلعت الصجيه و بدى الحش و الحجي الخايس (سوري) بينوا المصبنه انهم من بره هالله هالله و من داخل يعلم الله !!! تدرون شقالوا ؟!؟

يتناجرون .. منهوا اييب راس البنيه ؟! وخزياه على قولة القايلة ! وين اللي مساعه تكانه و مسوي روحه سنع ؟ قال لحد اييب طاريها تراني راسم عليها و هذي زميلتي و بمنطقتي ( مو الاخ يدته اليزابيث ) و الشباب يعلقون عليها و على جسمها و اهي ماشية و المسكينه ماتدري باللي ينقال من وراها

الوم البنيه انها لابسه لبس مادري شلون قايل و انها بروحها بهالغربه .. بس هم الشباب كانوا جليلين حيه و طاقين الشرف جنهم كلش ! .. اييييييييييه الله كريم

ماني مكثر هذرة .. ادري حلقه اليوم ماهي قوية بس اهي سالفه كانت تقرقع بقلبي و حبيت اقولها لكم .. اعذروني تراني ساعات اعيش الدور و احس اني غيور على ديرتي و اهل ديرتي .. واخاف على بناتنا و اتمنى صلاح شبابنا

شفيه لاري كينج ؟ .. يالله يا جماعه الخير .. اترخص الحين .. فمان الله .. و نلتقي انشالله بحلقه يايه :)

Eight : يو آر إن لندن .. نت جليب الشيوخ :PpP

هالكلمات عتيجه بالنسبة لي .. كتبتها لما كنت ببريطانيا .. أوكسفورد سِتي بالتحديد

kel shay feeh elzeen :) welsheen :( .. o makamel ela wayha seb7anah .. o mako ensan aw mokan aw sha`3la ela feeha salbeyat o eejabeyat ..
eb hal7alQa bagreg 3aleekom 7o0l ele ga3ed asho0fa Here ( in Uk ) everyDay ..

1) أول شي لازم أقوله .. انه الحلو ما يكملش -على قولة اخواننا المصاروة- ولازم نلقى نواقص بأي شغلة في هالدنيا .. فلما أنتقدأشياء موجودة عندي في بريطانيا فهذا لا يعني انه بريطانيا كلها سكة ( سوري على هالكلمة ) انما اهي سلبيات ديرو بالكم منها و حطو مخكم براسكم لما تزورون انجلترا ( لندن على قولتهم ) .. و بس

2) لحد يقول ( هذا يدرس هناك و يحش فيهم ؟! شحقه يرفس النعمة ؟) ترى الحمدلله محنا طرارين و نتشرط .. يايين بفلوسنا و بعضنا يايين على حساب ديرتنا و الانجليز يبونها من الله أصلا عشان يبلعون بالبيزات و احنا اللي مخابينا تقرقشلهم مو يايينهم عشان نشتغل و لا نمص من حكومتهم بيزات مثل كثير من الاجانب اللي بالكويت ! للأسف

3) لما نمدح هالديرة فاحنا نقول الصج .. محد بيعطيني بوسة على راسي ولا بوكي بينترس باوندات .. الصج ينقال .. و الزين زين لو قام من النوم , و الشين شين لو غسل عويناته

4) لندن و بالأخص ( الاجوار رود ) يبيلها مقالة بروحها لأنه فضايح العقد ماتخلص و سوالفهم يبيلها حجي و قعدة جاي ضحى على قولة الحريم .. بس تكفون ترى بريطانيا عودة مو تعششون بشارع واحد جنكم مو رهن الإقامة الجبرية !! بققوا عويناتكم و طلقوا رويلاتكم .. ترى هذي المملكة المتحدة مو البحرين او منتزه الخيران

5) أنا رحت مصر مرتين ( مرة و انا بيبي و عندي صورتي و أنا فوق بعير ) و( مرة دزوني عشان أنظم مع اثنين من الربع انتخابات اتحاد الطلبة هناك) و انشالله ما أطب هالديرة بعد مرة ( ولا يزعلون اخواني المصاروة) بس ماشفت ديرة وصخة مثلها الا لندن !! رحت الهند (كشمير) قبل الغزو 88 تقريبا و يشهد الله انها أنظف من فيينا و مصر و لندن ( شحقه عيل نتطنز على الهنادوة ؟) بريطانيا جوها ملوث و مبانيها سودة و شوارعها وصخة و باصاتها قلقة .. يعني لازم ترد البيت أجلح املح

6) الناس و ما ادراك ما الناس هني .. فرنسا يقولون أن اهلها ريحتهم حلوة بس من بره هالله هالله و من داخل يعلم الله .. بس هني الناس ( وايد منهم مو كلهم ) من بره الذوق بطيييخ و من داخل فسيييخ !! شلون ؟ خلك معاي بالنقطتين اللي بقولهم بعد شوي

7) اللبس .. قبل كنا نقول ( شعرف القيزان بأكل الرمان ؟ و شعلم المعيدي أكل الزبيدي ؟ ) بس العجيب انه الانجليز اللي المفروض يكونون اكشخ ناس تلقاهم ما يعرفون قطرة من الذوق !! فمثلاً : اييك المدرس من صباح الله خير و تلاحظ ان الجوتي ( كرمكم الله ) يلد مقلوب منتف لونه أبيض مع دلاق زيتي و بنطلون أحمر و قميص كحلي و بلوفر أدعم و مقلم !! تناسق الألوان عندهم مو طبييييعي !! و هذا عند الرياييل و الحريم طبعا

8) صج لي قالوا النظافة من الايمان .. لا تقعد الصبح ورا وحدة بالباص !! الله لا يوريك .. لو تدقق يمكن تلقى بلاوي تدبي بشعرها و شغلات لازقة بالجل اللي صارله اسبوع على كشتها و الريحة فايحة تلوع الجبد .. رفيجي نوبه كان متكلون (حاط كلونيا) ذاك اليوم و بس ركب الباص طمرت اللي يمه جنها مقروصة و سدت خشمها !! ليييش ؟ مو متعودة على العطورات و التكلون من الصبح الله ياخذ ابليسها .. و ذاك اليوم بخرت البيت جان تهوش عَلي العيوز و تسويها زيطة و زنبليطه عبالها من الهنود الحمر أو قاعد أسوي سحر !!؟؟

9) الحمدلله اللي خلقنا مسلمين .. نتناقش وياهم بالكلاسات ساعات .. يستغربون شلون الدين ألزمنا انه نتوضى خمس مرات .. و نتسبح كل يومين بالكثير .. و نحلق و نشيل و شيسمونه (خلكم معاي على الخط ) و الله يغربلهم حدهم يحطون ديودرن

10) الصج ينقال .. مكياجهم خفيف (هذا اذا حطوا اصلا) مو جايد مثل ربعنا اللي لو وحده منهم تروح الجمعية اللي يم بيتها ( حذفة عصى ) تقول هذي رايحة عرس أو انها طقاقة زكرتية !! الدفاشة و التخبص و التلوص مو حلو ترى

11) الزكاير .. عندنا الشباب يسحكون .. عندهم شباب و بنات و ياهال و عيايز و شياب !! الله يكفينا شر السرطان .. بس الصراحة انهم ملتزمين بسالفة عدم التدخين في ( الباصات و المحلات و القطارات و الأماكن اللي التدخين ممنوع فيها ) .

12) جرب تعبر الشارع ( على خطوط المشاة ) و انت مغمض .. تذكرني عقبها و ادعيلي .. ماكو سياره تتجرأ تطوف هالخطوط و انت على طرفها و تشوفهم يوقفون قبلها و يكعون بريك جنهم جدام الاشارة الحمرة محد فيهم يتلحلح .. بس اعبر من مكان ثاني و شوف من يشلعك ( الليه يحفظكم كلكم) و شلون يسفلون فيك اذا ما تلفت ييمين و شمال

13) لاتبوق لاتخاف .. القانون قانون بالديرة هذي .. اذا غلطت لا ترادد و لا تمصخها ترى يا غريب كون اديب .. بس لي كان الحق معاك اخذهم بشراع و ميداف و لا تخاف من شي ترى حقك مايروح عليك .. و لكل قاعدة شواذ

14) لا تستحي من عاداتك و تقاليدك .. تبي تصلي بالهايد بارك صل و جنه العيد .. تبي تطلب أكل بدون واين و كحول و بورك و هام اطلب و لا يهمك .. ترى الله عزنا بالدين

15) لما يسكرون (يعني عقب ما يدردعون) خاصة بالويك اند , انحش و شيل قشك تراهم مايعرفون وين هوا دارهم و وين الله قاطهم .. اينون و يطقون اطوف جنهم ذبان راشينه بفليت !! الله يكافينا الشر شنو منظر البنيه السكرانه حقييير . تشوفها تتطوطح و تهوبي بمشيتها تالي الليل .. أعوذ بالله !! الله يستر علينا و عليكم بس .. ماكو على اللبن الخاثر و بس

16) الانترنت كافيه عندهم مكان ثقافي علمي .. الغالبية يدشون حق دراستهم و شغلهم .. شوف كافيهات الديرة تلقاها مواخير الله يكافينا الشر مزابل من وصاختها و مداخن من الزقاير و مصبنة من الألفاظ اللي تسمعها و سايتات تلوع الجبد تجابلك اول ما تتربز على الجهاز

17) الغلى و الاسعار عندهم شي مو طبيعي (و هذا شي كلكم تعرفونه) .. ببسيهم يسوى 3 صمونات فلافل بالديرة ( تقريبا ) صج محد فينا بيموت من اليوع بس الله يعز الكويت صج رخص و نعمة الله يديمها علينا و عليكم

18) الهوم لِس .. اللي اهمه المشردين اللي مالهم سكن ولا عايلة ولا وظيفة .. ماكو ربعة بأكسفورد ( مثلا ) الا منسدح فيها طرار أو وحدة مادة ايدها تطلب خردة !! بالكويت أيام رمضان تنزل الطرارة من سيارة ريلها أو يمكن دريولها و تطق الجرس و تتشرط ! الناس بالديرة تحب عمل الخير و كلنا نبي نساعد الناس بس ترى جلة الحية و الجذب و الكلك شي مو مقبول الصراحة ! هني اللي يطرون تشوفهم صج محتاجين و حالتهم كسيفة ! أتصور انكم شفتوا غالبيتهم و شلون يلفتون النظر ؟ يحط يمه جلب ( اجلكم الله ) أو يدقدق بقيتار أو ينفخ بهبان أسكتلندي .. بس الصج ينقال ، الكثير منهم يصرفون بيزاتهم على مشروب او مخدرات .. شفتوا الادمان شلون يذل ؟

آخر شي .. الحمدلله على كل حال .. و اعتذر على هذرتي الزايدة .. و أدري اني كالعادة غلطت و خرتها شوية بس عاد طوفوا حق أخوكم المغترب .. مو المخترب :PpP


Thanks 3ala eVeRyThinG .. an6eR mola7a`6aTkom

Seventh : !! صور و أرقام بنات

..

hala o `3ala beljemeee3 :) .. neltege 3ala el`7eer TodaY eb7alQa yedeeda men selselat : el9ara7a ra7a .. o maw`6o03na halmarra yetkalam 3an fe`6aye7 elNet .. ehe joz2eya 9`3eera jeddan bas ana 7abeet afredlaha E.mail kamel Cause ehe 7adha important ..

1) الفضايح اللي بالنت لها أنواع مختلفة .. سياسية و أخلاقية و غيرها .. و أكثرها انتشارا و حساسية هي المتعلقة بالأعراض و الناس و الأسامي .

2) أماكن انتشار الفضايح .. الايميلات , الجاتينج .

3) أشكال هذي الفضايح .. أفلام , صور , أسامي , أرقام تليفونات , عناوين بيوت و غيرها .

4) من يوزع هذي الأمور و ينشرها ؟ أغلبهم مصبنة رايحين فيها و بعضهم بنات نص جم تعددت أسباب شطانتهم و قلة أدبهم بس النتيحة وحدة : الفضيحة و التشهير .. للأسف !

5) أكوهتليّة هدفهم الوناسة بس .. يعني الشاب اللطيف مسوي شي ييديد و مكتشف شغلة خطيرة ! .. هذا يبي يسد نقص فيه و يبي يستانس بالفراغ !!

6) أكو حثالة (كرم السامعين) يسوون هالحركات انتقام من بنية لأنها مثلا ما عطته ويه أو انها كانت تعرفه و اختلفت معاه أو .. أو .. .. ماعتقد انه تصحيح الغلط يكون بغلط أردى منه .. بس ما أردى من المربوط الا المفتلت !!

7) هم أكو بنات يسوون برفيجاتهم جذي من باب الانتقام , ليش رفيجها حلو و ليش تكلمت فيني و ليش اهي وضعها أحسن من وضعي و سوالف حسد و غيرة .. و كلهم منحطين و بمستوى دوني .. عنبر أخو بلال !

8) ديروا بالكم يا جماعة .. خاصة خواتنا البنات .. لا تحفظون أي صورة أو أرقام تليفونات أو خصوصيات بالجهاز سواء كان لابتوب أو بي سي عود .. و لا تعتمدون على الحماية و الفاير وول أو انه ماتدشون جاتينج أو انه محد يستخدم الجهاز غيركم .. ترى أهل الشر جايدين و كل شي يسوونه !!

9) لا تدزين صورتج حق أحد بالايميل حتى لو سويتي سكان بسرعة و مسحتيها .. لأنه منتي ضامنة انه اللي بتدزيلها سواء كانت تصيرلج او رفيجتج انها بتمسحها سيدة ! ترى مو كل شي متطور لازم يكون آمن

10) من باب الاحتياط خنوخر عن الأماكن المخطورة و اللي يدشونها العقد و المغازلجية (مقالتي الثالثة كان عنوانها : العقد ؟!) مثل العرب جات و البالتوك و الخرابيط هذي .. ابعد عن الشر و ترن ترن .. ديروا بالكم

11) لما اييك انفايت او سايت عن فضيحة أو شي يشوق أو غريب لا تبطله كلش و لا تقرب صوبه ترى هني تكون أغلب مداخل الهاكرز .. سيده سَوْو بلوك أو ديليت يا جماعة الخير .

12) ديروا بالكم من الداونلود .. مو أي شي انزله بجهازي ..و ترى مو كل شي نظيف و مافيه باك دور .

13) خلنعتبر من البلاوي اللي صارت و القصص الصجية اللي نسمعها .. يكون بعلمكم سالفة المغنية اللي انفضحت بالنت و حطوها بجرايد الكويت ولا شي مقارنة بالبلاوي اللي تحصل بين فترة و فترة .. و الباب اللي اتييك منه الريح سده و استريح .

أدري انه المقالة هذي مو وايد دسمة :) .. بس حبيت أركز على هّنقطة لأنها وايد وايد مهمة -برايي- .. الله يستر علينا و عليكم .. و الله ينتقم من اللي يشهرون بالعالم اذا مو اليوم فباجر بيي يزاهم .. و ترى الله سبحانه ما يطق بعصى ، لأنه عقابه غير

و على الخير نلتقي مرة ثانية انشالله

Sixth : ! الو حوّل :D~

ملاحظة : هالكلام كتبته قبل سنين .. يعني عتيج الصوف يا جماعة الخير

...
السلام عليكم .. اشتقتولي ؟ (حد الدوسه ) انا الصراحة اشتقت مو لكم انما اشتقت حق الحجي الصريح الواضح اللي مافيه لف و دوران .. هممم .. قعدتنا اليوم بيدور الحجي فيها يا عيالي الحلوين (حبّابه الله يرحمها !) حول موضوع التليفونات .. عاد من كلمة التليفون أو المبايل أو الجوال أو النقال بيطلع ستين موضوع و موضوع بس أنا بحاول أحصر أهم الأشياء اللي تهمنا و تهمكم و تهم المجتمع ( حجي خطير ) و خلكم وياي مثل ما تعودنا بأسلوب النقاط .. وحده وحده

1- أول شي لازم نتذكر ان التليفون سواء كان مال البيت أو النقال اهو وسيلة مو هدف .. يعني اهو شي يوصل حق أشياء أهم مو اهو بحد ذاته غاية لنا .. و هني كل واحد يسأل نفسه : شحقه أستخدم التليفون ؟ ليش أدق منه ؟ شحقه أحطلي واحد ؟

2- النقطة هذي أربطها باللي قبلها .. ناس تحط تليفونات عشان الطوارئ بس مثل البنات اللي يحاتون بنجر السيارة أو انهم ما يدلون الطريج .. و ناس يحطون مبايل عشان الشغل و الدوام و الشركة و الموظفين و الأسهم و الصفقات .. و ناس يحطونه عشان التواصل الاجتماعي يعني اجيك على الاهل و العيال و الربع و الجماعة .. وكل الامثلة اللي طافت ممكن نقتنع فيها و نعتبرها ضرورات لا باس فيها .

3- أكو ناس ناس و أكو ناس مداس .. البعض يبون و للأسف النقال من باب التقليد (ليش حاطه؟ ما يدري) و ناس حاطينه من باب الكشخة (يعني شوفوا عندي كمنيوكيتر ييديد) و ناس يحطونه عشان اللعب و الوناسة (سنيك - جاتينج - مسجات ..) و ناس حق المغازللل !! و هذيله جنهم يراد من كثرهم يعلهم الماحي اللي يمحي أباليسهم .. :))

4- أتذكر أيام الجامعة (كلية التجارة اللي يسمونها الحين علوم ادارية) مرت يمنا وحدة و احنا قاعدين تحت النخل جنه بالبصرة و قاعدة تهذر بالتليفون و فجأة تررررن ولا التليفون يلعلع بأذونها !! أثاري أم السعف و الليف مو قاعدة تكلم أحد و ناسية تحطه سايلنت هيهيهي أشوة انها متحجبة ولا جان ما لقت تلثومة تغطي فيها ويها

:PpP

5- يبطون جبدي اللي لما ندش السينما يلعبون بنغمات التليفون .. يعني شوفوني ترى عندي سيرفس هني .. وايد عليك .. و طول الفلم يسمعنا كلامه : ألو حياتي أنا بالسينما اكلمج بعدين !! اي شي انت و حياتك البصوه

6- مد ريولك على قد الحافك .. اللي ماعنده بيزات شحقه يشتريله جهاز غالي و تصليحه لي اخترب يعور الظهر ؟! يا اخي اشترلك شي بسيط يأدي المهمة و يكون كد و مد و مو حساس و يتحمل الطيحات .. آخرتها تلقاه واقف يبي تأشيرة عند سوق شرق ولا راكبلة قرمبع قسطها أقل من سعر التليفون !!

7- المكالمات و ما ادراك ما المكالمات .. هذررررة و قرقةةةة و آخرتها الله يعين اللي بيدفع ! اذا الوالد او الوالدة فمال عمك ما يهمك للأسف ! و اذا انت بتدفع او انتي بتنقين من مصروفكم فهني الصلخة السنعة .. ترى كل شي زاد عن حده انقلب ضده و التوسط و الاعتدال بكل شي أمر مطلوب .. و القهر لما بنية تدفع حق رفيجها و اهي ما تدري انه يكلم غيرها !! اي كلام يا عبدالسلام

8- اكو ناس عليهم حركات مادري شلون قايلة .. يدق عليك رنة وحدة عشان تدق عليه و تصير المكالمة عليك انت ! اذا تليفونه كروت و ميزانيته صعبة اوكيييي ما قلنا شي بس اكو جعووص تلقاهم مريشين و يعطيك رنة وحدة خاصة اذا عرف انك تبيه بشي او تبي منه غرض معين .. يلدَه الله يهداه و الحزرة تقطر منه تقطير

9- انا رقمي حلو الصراحة و كلمن يتمنى نفسه .. بس شريته ابيزاتي و بعرأ جبيني على قولة المصاروة .. أما انه ايلي واحد زبوط النقعه ولا وحدة زعطوطة و تفضي مخابيها و تطير عياديها و تينن أهلها عشان رقم حلو فهذا شي مو منطقي خاااااصة حق البنات .. شكو تشترين رقم ذهبي و تخلين المعقدة يدقون عليج : الغالية رقمج للبيع ؟ و شيفكج منهم عاد !! احطلي رقم زوين و لا باس فيه و كان الله غفورا رحيما

10- ترى مايصير ندق على بيوت العالم و نقول : ألو من معاي ؟! .. انت اللي داااااق و المفروض انك انت اللي تعرف بنفسك أول شي أو انك تطلب شخص معين .. تحقيق ؟

11- اللي يدق المفروض يبدي بسلام و ترحيب مو سيدة : ألو ممكن اكلم فلانة ؟ ألو شصار على موضوعنا ؟ عيب عيب ترى الذرابة زينة ..

12- يبط جبدي واحد من ربع أخوي .. كل مايدق و يسأل عنه و نقوله : لا و الله مو موجود .. يسد الخط طوط طوط طوط بدون شكرا ولا ثانكس ولا فمان الله .. وين السنع ؟!؟

13- آآخ يا المسجات .. أشكال و أرناق .. اهي نكت و اهي أغاني و اهي صور و اهي رنات و للأسف أغلبها ملاقة و حجي فاضي .. بس حتى لا نظلم الكل ترى أكو شغلات طيبة و تعجب الواحد مثل الأدعية أو النكت الييديدة أو ... أصابع ايدك مو سوى

14- ليش بعض الناس يدقون عليك و يحولونه بيجر ؟ أو يدقون و يخلونه مسج ؟ أو يدق و لما تتصل عليه بعد شوي مايرد عليك ؟ الصبر زين ترى ..

15- يسولفولي عن وحدة نسرة و نحيسة و لسانها أطول من جسر بوبيان تتعمد تدق على رفيجاتها من تليفون البيت و تسوي جاي الضحى و جاي المغرب و جاي نص الليل بالتليفون على حساب المسيجينة اللي ردت عليها .. لو انا جان سديته بويها و قلتلها تالي : سوري بس الشحن خلص .. من له حيلة فليحتال ..

16- يا بنات .. الرقم الغريب لا تردون عليه ترى جليلين الأصل و الهيلق زايدين هاليومين و بس يسمع حس بنية اضربت العدادات عنده و اشتغل عليها تليفونات و مسجات و سيدة يقولها احبج !! حبه برص أيرب شلون يحبها من صوتها ؟ مالت عليه يعطي بحة بصوته يعني منهم:)) و اهو جنه قملة مقصوعة ..

17- اذا أحد أذاج سيدة قولي حق اهلج .. ترى العقد لما ما اتييهم العين الحمرة يتمادون و يقولون : ايه هذي مستانسة ولا جان خلت ابوها او اخوها يزفني ..

18- ديري بالج تكلمين صبي بحجي خاص حتى لو شوية ترى يسجلون اصواتكم و يهددونكم فيها بعدين .. و ترى صارت هالسوالف و تشرشحوا بنات بسبتها ..

19- اكو ناس مقصة و نوعية تنتشر بين البنات خاصة .. بس يرقمها مغازلجي بالسوق او بالنت تروح تجيك على صاحب الرقم من ديسك الاتصالات مسكيييييييينه ترى نص الارقام مو بأسامي أصحابها .. ارقام انباعت و ارقام تبدلت و ناس تزور و ناس تسجله بأسامي غيرها و طحيحة يشترون من كبارية عشان يبقى الاسم القوي بالديسك و ما يتغير !! شي مو طبيعي اللي صاير

20- اعرف واحد سوى جريمة بمصبنجي شكل على تليفون اخته لووووول صج حمش .. دق على العقيدي و شرشحه و قاله بتندم لي دقيت او دزيت شي .. قام المغازلجي عقب يومين و هم دز مسج حق البنية .. جان يقوم اخوها و ياخذ رقم العقيدي و يدش العرب جات بأوصخ الجنلات و انتوا بكرامة و يوزعه : (يا جماعة هذا رقم فلبينية رايحة فيها دقوا عليها لوووووووووول) .. الصراحة دقة خطيرة و ما اشجع عليها بس اتصور ان المغازلجي حرم يرقم و باع رقمه اللي مثل ويهه هيهي

21- وحدة انزعجت من واحد كبر ابوها .. جان تقول حق امها و كلموا الداخلية و الاتصالات و يابوا الريال و هزؤووووه .. شسوت عليه تمرمط جدام خلق الله ؟! ناس كل ما تكبر تدبر

22- عيب نشبك الخطوط و نخلي الناس تتسمع على بعضها .. عدل ولا أنا غلطان ؟

23- لما تشوف عند غيرك خط ثاني ليش تشكل عليه ؟ أكو ناس مزعجين بشكل مو طبيعي .. شوي شوي علينا يبه مانقدر نكلم اثنين بوقت واحد ..




في النهاية نقولكم (مشكورين) على المتابعة و نعتذر عن الطوالة و نلتقي مستقبلا انشالله بحلقات ثانية و مواضيع غير .. عندي حجي بس جني مصختها !! فمان الله

Fifth : شنهو نوع حجابج ؟ :PpP

السلام عليكم و رحمة الله و بركاته .. أتمنى ان الجميع بخير و بصحة و عافية .. أدري اشتقتولي -حدي ثقة- و هذي اهي وقفتنا الخامسة ضمن سلسلة المغامرين الخمسة -يملقك- قصدي سلسلة -الصراحة راحة- و يمكن الوقفة هذي ماهي بالمستوى المطلوب -يعني متواضع- بس ترى الموضوع اللي فيها مع انه يضحك الا انه شديد الاهمية - اتعب على الأسلوب .. خلكم معاي سواء كنتوا بنات أو شباب لانه يخصكم و يخص اللي حولكم

الحجاب .. أشكال و أرناق

ترى الحجاب يا جماعة القصد منه الستر .. و الهدف منه صون المرة و حفظها .. و الالتزام فيه ينبع من الدين و الأخلاق .. و معني أحث عليه بشدة الا أن البنية السفور مو معناته انها سكة -سوري على الكلمة- خاصة انه في من اهلنا متحجبات و في تنتة أو كشف .. و لا يعني ان المتحجبة اهي لازم تكون دايما ذيج السنعة الزينة اللي ما منها قصور .. الحجاب مبدأ و شرع مو مجرد مظهر .. و ترى الناس أجناس مثل ما قلنا أكو متحجبات يفشلون و تصرفاتهم وخزياه منها و بعضهم تلقى لبسهم يكشف أكثر مما يستر في مقابل أن أكو بنات كشيشهم قايمة ولاهم متحجبات الا انهم تكانة و لبسهم مقبول و مرتب بدون تفصخ و تلزق .. هممم جني كثرت القرقة ؟ خلكم معاي الحين مع بعض أنواع الحجابات أو الأحجبة أو الحجايب أو اللي يصير

1- الحجاب الاسلامي .. مو معناته ان غيره احجاب مسيحي ولا بوذي .. بس يسمونه جذي لأسباب البنات أخبر فيها مني .. و غالبا يكون أبيض و بنات الائتلافية الله يحفظهم يلبسونه غالبا :)))

2- حجاب بو ربطة مكشوفة .. اللي يصير من تحت جنه كرفتة و غالبا السوريات و الفلسطينيات يستخدمونه .. زين و ساتر بس يكبر البنية وايد

3- حجاب بو ربطة مخشوشة .. هم خوش حجاب ترى و تصير العقدة تحت الحنج امبينه بس الكرفتة تحت العباة أو البالطو .

4- حجاب بو حنج .. اللي يستخدمونه الشيعة غالبا .. عندهم معتقد أن الحنج يدخل ضمن الرقبة و هذا شي لازم يتغطى .. أختلف معاهم بالراي بس هم أحترم حريتهم في الشي هذا .

5- حجاب المغصوبة .. ماله شكل معين بس تلقى البنية مجبورة انها تتحجب أو أهلها عسرين أو انها خفيفة و اخوانها مغطينها غصب - زين يسوون فيها - و راعية هالحجاب غالبا يكون لبسها مو محتشم و تلقاها شيطانة .

6- حجاب العازة .. هذا يا جماعة حجاب تستخدمه بدون قناعة و لأنها مضطرة البنية اللي صلعت أو حت شعرها !! أو تقصفت خصلها .. فتكون معتازة الستر .. و ماعتقد انها بتاخذ أجر من الله عشان الحجاب لأن نيتها ما كانت الستر .. وعلية .. الله يشافيها و يعافيها و يقوي مافيها .

7- حجاب بو قطعتين .. ييديد .. أو بالأصح انتشاره ييديد و الحين هابين فيه .. يصير غالبًا بلونين متناسقين يعني كحلي و سماوي أو أسود و أبيض بحيث يبين اللي تحت من جدام و اللي فوق يرد ورا شوي .. حلو و ساتر بس اللي ماعندها ذوق لا تستخدمه بلييييز ترى الاصفر و الاسود يعني ممنوع الوقوف و الاخضر مع البرتقالي مو شي كلش .. الذرابة زينة .

8- حجاب قوس قزح .. كوكتيل من الالوان تلقاها في هذا الحجاب .. شحقه متحجبة دامج تبين تلفتين النظر ؟

9- الملفع .. زين اذا لفيتوه عدل .. و كل ربطة لها معنى و تدل على بيئة .. ربطة الحضر غير ربطة البدو .

10- البخنق .. اييييه الأول تحول .

11- البرقع .. راحت أيام بيوت الشعر .

12- البوشية .. عتيج الصوف ولا ييديد البريسم .

13- النقاب .. بدون تعليق .

14- حجاب بو قذلة .. ايييه با بوقذيلة يا بوقذيلة .. شبيه الريم شحليله .. يفشللللل و يطلع البنية بالشينة و تصير علج بحلوج العالم .. عيب ترى عيب و الله .. و أتصور انه الناس تفرق بين اللي متعمدة تطلع قذلتها و اللي مع الحركة و اللوية طلع شعرها بالغلط .

15- حجاب التلثومة .. يصير جنه غترة بدون عقال .. حط غترة على راسك و سبلها لي جدام بعدين سو حرف -اكس- بحيث تقط الذيل الييمين جهة الييسار و العكس صحيح .. أغلب اللي يلبسونه كبار .. أغلبهم .

16- حجاب بو فوطة .. هذي الموضة الفاشلة عاد .. صوف مادري قطن و غالبا ايي بألوان مو حلوة و تلوع الجبد !! .. بس في أحيانااا يكون لايق على بعض الناس .

17- حجاب التسبيلة .. مثل الغترة لما يسبلونها بحيث تصير عراويها جدام .. المصريات يحبونه .. تحتاج اللي تلبسه انها تستخدم جلاب أو بروش يشبكه من جدام :PpP

بس .. أنا كلمرة أقول اني ماني مكثر حجي و آخرتها أقرق قرقة العالمين .. أتمنى اني ما زودة الجيلة شوي و عسى ان هذرتي تكون خفيفة لطيفة عليكم .. و في النهاية أحب أقول : احم احم
1- الستر زين
2- النية أهم شي
3- لكل قاعدة شواذ
4- من راقب الناس مات هما -علم نفسك- احم
5- الزين زين لو قام من النوم .. و الشين شين لو غسل عويناته .

فمان الله .. و نلقاكم على خير انشالله في حلقات ييديده من : الصراحة راحة

Fourth : للبنات بس

حلقتنا اليوم مقتبسة نوعا ما من ايميل انجليزي كان كاتبه واحد
من الشباب و قمت انا بتحريفه و الاضافة عليه من باب الفايدة
بس اتمنى ان الخوات ما يعتقدون انه هجوم عليهم .. لاني هني اخاطب بعض مو كل بعضضضض البنات اللي عسى الله يهديهم

1- التلفت وايد و الخز و التمقل بويوه العالم عيب .. و بعض البنات تلقاهم يكاسرون الصبيان و يبحلقون عويناتهم جنهم بايقين حلال ابوهم لاااا و المشكلة انها تقول : قاعد يخزني قطيعة !! و اهي اللي معطيته غمزة اصلا و يمكن دقرها وما عطاها ويه

2- الضحك الجايد و الحركة الزايدة بالسيارة تعبر عن الشخص خفيف و اللي مافيه ثقل كلش .. نتبوسم حق بعضنا و نسولف بس ما نستعرض و نقول : مالنا شغل باللي حولنا .. امبله لكم شغل لانكم بالشارع مو بالبيت

3- البتاوين و التنحش من المصبنة شي مو سليم لانه اولا خطر و ثانيا يعني شوفوني اعرف ابتون ؟ .. ترى المصبنه يدورون هالسوالف

4- ترى مو حرام تروحون سوق شرق ولا جمعية الضاحية ولا الدائري الثاني (الحب !) ولا تتمشون على البحر .. بس كل شي بوقته حلو يعني ليش تدورون الزحمة و الويك اند عشان تتسرسحون هناك ؟؟

5- السهر بره البيت -عمداً و بدون ضرورة- صفة ما تتصف فيها الا البنية اللي لك عليها ! و سوري على هالكلمة .. بس ترى حتى احنا الشباب مو عدل انه نكون سهارية على طول .. بنات طالعين من سينما الفنار 4 الفير ؟؟

6- المكياج و الميك آب له أصوله ترى .. و كل شي زاد عن حده انقلب ضده .. شكو تتسوقين و انتي حاطة حمرة فااااقعة جنج بعرس ؟ ولا قاعدة بهاجينداز و اهي لابسة كشكش جنها بالعيد !! شي يفشل الصراحة

7- ستاربكس كافيه يعني قهوة يعني مقهى يعني استراحة يعني مطعم صغير مو صالة افراح عشان نكشخ فيه و ما بقى الا نلبس بدلة عرس ! و البعض يتربزون فيه بالساعااات و ما عندهم شغل غير انهم يطالعون الرايح و الراد !! و الله حالة

8- الحجاب .. ستر و من الدين .. لا تخلونه استعراض ! لا تخلين الناس تقول عنج مغصوبة ولا حاطتة كعازة عشاان يغطي البلاوي ! للأسف بعض المحجبات يطلعون القذلة و لازم تكون مصبوغة يعني شوفوا لون كشتي !! مايجووووز هالحجي

9- الترصص بالهدوم الضيجة !! .. لا تقولون الناس بس بقلوبها لا لا مو صح .. عيل شحقه نلبس هدوم ؟ شحقة نتنظف ؟ شحقة نحلق ؟ دام القلب اهو كل شي على قولتكم !! اي صح المفروض مانحكم على الشخص من شكله و وايد بنات لبسهم حده فري احسن من منقبات لكنننن اكو ستريتجات تفشل و جينزات تلوع الجبد !؟

كتبت عن هالموضوع تحت عنوان .. ليش نلبس هدوم ؟ .. ثاني مقالة

10- ترى العصقولة - الرشيقة لها لبس و الوان خاصة .. و هم المتينه - المربربة لها لبسها و الوانها اللي تلوق عليها .. ضبطوا حالكم

11- للعلم .. الكلك الزايد مكشوووف , ماله داعي بفرايديز مثلاً تعلين صوتج و انتي مع رفيجاتج و تقولين : شعري قبل و انا صغيرة كان اينن و يهبل وناعم بس شمسنا ما ترحم و جونا يتعب البشرة !!! اللي محتت شعوركم اهو
:)) الصبغ و الخرابيط الصناعية

الحنة و اقطع

عسى اني ماكنت انفخ بجربة مقضوضة !!

Third : !! العَقَد

....

حلقه اليوم نناقش بها مصطلح مهم انتشر بين الأوساط الشبابية بقوة الا وهو ( العقد ) حيث أنها كلمه انتشرت منذ مده تعبيرا عن آفة انتشرت في أرجاء البلاد و للأسف .. و من أجل رفع الحرج و الغاء اللبس أحببنا طرح هذه الكلمه ( الحشرائية ) للنقاش

الحشرائية : كلمة مشتقة من الحشرات و تستخدم للذم ، من تأليف صديق

-1- الكل متفقيييين على أن كلمة عقد يقصد بها مجموعه من المصبنه المزعجين في تصرفاتهم و المهتملين

-2- كلمة عقد باللغة لها في ملبسهم عدة معاني : عقده الخيط (و هم كذلك حيث تجدهم مشربكين مو واضحين ) و العقده النفسيه ( و هذه تتجلى في تصرفاتهم ) و العقد من الزمان أي عشرة أعوام ( و هذا هو السن الذي يبدأ به أحدهم بممراسة المهنة ) و الله أعلم

-3- تصريفاتها اللغوية : أحدهم عقيدي .. المجموعه عقد .. الصفة العامة معقعدة .. البدلية عقيدات .. اللفظ الشبابي بو عقاد

-4- منبعهم .. أغلبهم يتربون في مجتمعات مسحوقة و طبقات ضعيفة مادية و في بيئة منحرفة غير تربوية مع طفولة بائسة .. و لا نقصد بذلك أي أصل أو فصل أو نسب فكلنا بشر انما نقصد النسق الاجتماعي الذي تربوا فيه

فيهم حضر و بدو و .. و .. و

-5- أشكالهم مميزة معروفة .. و هي كالتالي : ( المدشدش ) غولته طابقين أو أكثر مع تخصر في الوسط و اصفرار في طرف الأكمام و الدشداشة من تحت اضافة لسواد ممزوج باللون البني على الغولة و طرف الأكمام .. (المغتر) تارسها نشا و تكون الغترة ميبسه و غالبا كوبرا و اذا كان شماغ فهو أكثر نوع فيه نقشات و زري و لازم عليه ختم ملكي مع عقال بو لمعه كان سابقا ذو حجم كبير كانه تاير نساف أما الآن فصاروا يختارون الرشيق حتى لا يتم كشفهم ولا ننسى عزكم الله الجوتي اللماع أبو حديده اللي يكون له كعب ارتفاعه 6 انش تقريبا مع دلاق لونه باهت او انه يلبس تميمه .. (المتجنز) و هو الذي لبس السبورت على قولتهم بدون ذوق طبعا بحيث لاتعرف الوانه التناسق فالقميص اللي مطلع صدره تلقاه ازرق جويتي مع بنطلون درينكسوت تفصال لونه أسود و برتقالي اضافة لصندل بحري محزر اما اذا لبس التي شيرت فلازم تكون بدي مرصصة و في حالات المعقدة المتقدمة يلبس حفر و يطلع زنده

-6- سلبياتهم و مشكالهم .. التحرش في بنات خلق الله و الترقم و احيانا مدة الايد و طوالة اللسان و للأسف .. الجز او القز بالسياره بدون هدف سوى خز العالم و ملاحق البنات و السرعة الجنونية .. الهوشات و التفلسف على الشباب من باب استعراض العضلات أو استغلال وجودهم كشرذمة تتراوح بين 4 و 9 أشخاص

-7- أماكن تواجدهم .. على البحر , الأسواق و المجمعات التجارية خصوصا شرق و الفنار و المهلب و غيرها , المقاهي و الكافيهات , المطاعم العائلية الرخيصة مثل بيتزا و بيرجر كينج , حول الكليات و المعاهد , الجمعيات التعاونية الخاصة بالمناطق الراقية مثل الضاحيه و النزهة و مشرف و الشويخ باء و السرة و اليرموك و غيرها

-8- وسائل المواصلات لديهم .. التكاسي اللي تكون تحت الطلب ( حطه)أو الوانيتات التأشيرة (حق العبرية ) أو التكود والتجعص في سيارة قرمبع

-9- يستخدم العقد الكبار سيارات كشخه و فارهة مع لوحات العاصمة عشان يغرون بعض البنات المقصة .. اما انها تجاري ماخذها بالأقساط بحيث ماتبقاله بيزات حق اهله أو البانزين يمكن .. تأجير من أحد المحلات يفرفر فيها و تالي يرجعها .. يكون موظف بالجمارك أو بمكتب سيارات أو بوكالة أو بكراج و يكشخ فيها من تحت لي تحت و غالبا تلقاهم يعلقون باج المستقلة يعني شوفوني زكرتي و اهو ماعنده متوسطه يمكن .. و لا يغرك شراعه تراه سماري

-10- بلاويهم .. مشاكل أسرية و فشل دراسي و لا مستقبل وظيفي و سمعة سيئة و بلاوي بالمخافر و جرايم و مخدرات و تخريب و وصاخه

-11- يدشون النت طبعا و كانوا بالعرب جات و الدالنت بس حاليا انتقلوا للأندرنت و الاي اف نت و تلقاهم يتفلسفون بالانجليزي و يحترفون التحرش بالبنات و يرقمون بتليفونات كانت بأسماء سنعه بحيث ماتغير الاسم القديم اللي كان بالديسك و الجذب الله لايوريك شي مو طبيعي

أخيرا .. أحس اني طولت عليكم بس الموضوع مهم و الظاهره تستاهل ..
نصيحتي لكم بس ديروا بالكم و فتحوا عويناتكم و خلكم حديد و مفتحين باللبن و فطينييييين حق هالنوعيات الودره .. و اتمنى ان محد يفهمني غلط و يعتقد اني متحامل على شريحه من المجتمع ترى كلنا عيال قرية وكلمن يعرف اخيه بس الصج ينقال و الحق ما نستحي منه

Second : بعارين البراري .. أو بورش و فراري ؟

..

هممم .. السيارة و القعده فيها تاخذ جزء كبير من وقتنا .. من الصبح لي تالي الليل .. فحبيت أدردش معاكم عن بعض الأمور الخاصة بالسياقة أو السواقة أو اللي يصير .. و الحاضر يبلغ الغايب و اللي ماعنده ليسن يخبر اللي عنده ليسن

-1- أول شي لازم نتذكر دعاء الركوب .. اللي أوله : سبحان اللذي سخر لنا هذا .. و أتصور انه الادعية موجوده بحيث تتعلق تحت المرايه .. لأنه الله الحافظ و ذكروني بعدين اقولكم شلون فادني الدعاء هذا يوم انقلبت اربع قلبات بالوفره


-2- ثاني شي حزام الأمان .. لازم نتعود نربطه يا جماعه و نخلي الايد تتبرمج على الحركه هذي حتى لا ننسى .. و ترى و الله اهو صج شي سيفتي و للسلامة بس هم زكرت و يخلي الواحد تكانه .. و ماني خابر ان بينا وايد امكرشين أو حوامل


-3- قبل لا نتحرك من البيت لازم شويه نحرر السياره يعني نخليها مشتغله قبل لا ننقل الجير للدرايف .. مثل الانسان قبل لا يسوي رياضه لازم شويه يلعب سويدي او يهرول على الخفيف


-4- هم أكو شغله ثانيه لازم نسويها قبل لا نمشي .. اللي اهي التجييك على عدادات البانزين و الحراره .. ماتسوى بنص الطريج توقف علينا ليش مافيها بانزين أو انها لا سمح الله تحتر ليش ناقصها ماي


-5- السرعه يا جماعه .. ترى في العجله الندامه .. صج اني احيانا ما التزم بالشي هذا بس و الله بعدين نتحسف لما نتذكر نظره الناس حق المستعيلين !! انما في ناس مستهترين صج بالبتاوين و العيله الزايده عن اللزوم


-6- خلنتلتزم شويه بالاشارات .. قصدي لما نلف ييميمن او شمال خلنتذكر انه في غيرنا بالشارع مو بروحنا نحذف هالصوب و ذاك الصوب !!


-7- كثر مانقدر خلنبتعد عن الحاره الأسرع .. اللي تصير على الشمال .. لان أغلب اللي يستخدمونها اهمه المستعيلين سواء كانوا ناس عاديين او دوريات او اسعاف بعيد الشر عنكم .. و ماشالله ترى شوارعنا الرئيسية من افضل شوارع العالم كله


-8- الهذره بالتليفون اثناء القياده خطره يا جماعه .. تخليك تسوق وانت فاقد ايد وحده بعدين تشتت تركيزك و انتباهك خصوصا لي كانت المكالمه خاثره !! اكو اختراع اسمه هيتفون او اي تجهيزات ثانيه ممكن تتعلق بالسياره


-9- خففوا شوي من الهرنات و هم الليت العالي ماله داعي نحرق عوينات العالم !! و اللي عنده جيب او يوكن او جمس بليييييز عند الاشارة خليطفي الليت ترى الكشاف يذبح لما يعكس بالجام


-10- آآآآخ من المغازل و الملاحق .. مصيبه المصايب و الله .. و الصراحه يبيله هالموضوع مقاله كامله .. نتطرق للسالفه هذي بعدين

ركز على : نتطرق


-11- مسألة الدوريات و المخالفات هم متشعبه و يبيلها تفصيل بس أحب أقول شي مهم .. لاتبوووووق لا تخااااف .. يعني لما تعرف انك غلطان اعترف بغلطك و اخذ مخالفتك بس لما يكون الحق معاك لا تتنازل .. القانون يلزم راعي الدوريه انه ينزلك من سيارته لو كان عقيد و انا سويتها .. و القانون يلزم اللي يسحب منك الليسن او الاجازة انه يعطيك مخالفه او تفصيل عن دوريته و اسمه حتى تراجعه .. و للأسف بعض مو كل الضباط مغازلجيه و يوقفون البنات عشان يتعرفون !! صج قلة ادب

Sorry 3ala elHathra .. nsHo0fKom 3al `7eeeeR

First : ليش نلبس هدوم ؟

..

الله بالخير .. وقفتنا الأولى في سلسلة الصراحه راحه راح تكون مع مسألة اللبس و حرية

الانسان فيه

-1- أول شي لحد يحسب اني أقصد البنات من دون الشباب ! لا لا ترى كلنا في الهوا سوى مع شويه اختلاف بسيط .. يعني الكل ابيه يشتح أذانيه و يسمعني عدل

-2- احنا ليش نلبس ؟!! خوش سؤال ترى يطرح نفسه بقوه ..... احنا نلبس أول شي عشان نتستر يعني مايجوز نمشي مزلطين مثلا !! و ثاني شي احنا نلبس عشان صحتنا يعني عن البرد او عن الحراره مثلا أو الخ الخ ... و هني لازم نتذكر ان اللبس أولا و أخيرا أساااااس مو مجرد شي كمالي

-3- أدري ان البعض بيقولون : ترى مظهر الانسان شي مهم .. ادري ادري شي مهم و ترى النظافه مفروضه بالدين و بالعادات و هم حسن الملبس أو الكشخه مثل مانسميها التزكرت و الشياكه على قولتهم .. يعني مو شي سنع ان الواحد يكون قلق مثلا و يقول انا متواضع ! أو وحده مهتمله و تقول بعدين ترى أهم شي الاخلاق

-4- بس يا جماعه مو جنه كل شي زاد عن حده انقلب ضده ؟ يعني ترى الفخفخه الزايده و بكل وقت مو حلوه ترى و الناس تنقد على النوعيات هذي .. و كل شي بوقته حلو و لكل مقام مقال .. يعني مثلاً صلاة اليمعه مانروحلها بجينز و تي شيرت ! و زواره الأهل مانروحلها بستريتش و حفر !! و الشاليه مانروحلح سكبه على سبيل المثال ! عدل ؟

-5- في شي مهم .. يمعوديين ترى قبل يقولون : مد ريولك على قد الحافك .. يعني الناس مقامات و لحد يفهمني غلط بس الحافي المنتف ليش يشتريله مثلا حزام جوتشي ب 40 دينار و اهو يالله يالله يدبر بانزين حق سيارته ؟ و اللي اهله مقتصدين شويه و يحبون التوفير شالله حادها تفسفس بيزاتها بالصالونات و على المكياج و اهي يا دوب تشتري كتب الجامعه أو تدفع رسوم التسجيل ؟ في شي اسمه أولوياااااات .. يعني الأهم ثم المهم

-6- نجي حق مسألة واايد مهمه و اللي اهي الحكم على الناس من مظاهرهم .. و هذي الشغله لازم الانسان ما يتسعيل فيها .. تلقى واحد امبسط بستار بكس و حاط ريل على ريل و الغتره ميبسه و مزورقه من النشا و يطالع العالم بنظره حقيره و اهو بالواقع بوكه شبه فاضي و الاقساط كاسرة ظهره و ساكن بقلعه وادرين مادري وين !! و في المقابل تشوف واحد ياي السوق بطرق الدشداشه او بتي شيرت و جينز عاديين و ويه سمح و شكله متواضع و ماشالله عنده خير و حالته ميسوره نفس الشي بالنسبه للبنات .. فلانه كشتها واقفه و جنطتها ال في و ساعتها أوميجا و بوكها من كارتير و مكياجها جوتشي و اخرتها يطلع كله تقليد معنها منفسه و رافعه خشمها جنها ديج مع ان الديج ماعنده خشم .. و الثانيه لبسها بسيط بس مرتب و شحليلها ماتلفت النظر بتعجرفها و تكبرها و تحس انها متواضعه معنها بالصج ماشالله بنت جخ و عندها خير ..

-7- نيي حق كلمه الحريه يا جماعه .. ترى الانسان مو مقيد بسلاسل لكن اكو شي اسمه أخلاق دين و عادات و قانون و حياااااء .. يعني الواحد ياخذ راحته بس مو لي الدرجه اللي نشوفها هاليومين ؟!!؟ و حول هالنقطه انشالله بنفرد مقاله كامله بتشوفونها قريبا انشالله .. بس ترى عيب البنت تترصص بهدومها !! و هم خليستحي الصبي اللي لابسلي شورت لما نص فخذه و ملوع جبود الناس بعصاقيله !! عشنا و شفنا

نشوفكم على خير انشالله